ប្រធានាធិបតីសហរដ្ឋអាមេរិក ដូណាល់ ត្រាំ សម្រេចដាក់ពន្ធគយលើទំនិញនាំចូលពីកម្ពុជា ៤៩% ដែលកម្រិតខ្ពស់បំផុត ដោយលោកចាត់ទុកថានេះគ្រាន់តែជា ការយកពន្ធគយសងសឹកក្នុងកម្រិតបន្ធូរបន្ថយប៉ុណ្ណោះ។
លោក ត្រាំ បានប្រកាសកម្រិតពន្ធគយថ្មីនេះ នៅថ្ងៃទី២ ខែមេសា ដែលលោកចាត់ទុកថាជា «ថ្ងៃរំដោះសហរដ្ឋអាមេរិក»។
ប្រទេសផ្សេងទៀតដែលរងនូវអត្រាពន្ធគយខ្ពស់ផងដែរ គឺ វៀតណាម ៤៦ភាគរយ, ស្រីលង្កា ៤៤ភាគរយ, បង់ក្លាដែស ៣៧ភាគរយ, ចិន ៣៤ភាគរយ, តៃវ៉ាន់ ៣២ភាគរយ, ឥណ្ឌា ២៦ភាគរយ, កូរ៉េខាងត្ពុង ២៥ភាគរយ, ជប៉ុន ២៤ភាគរយ, និងប្រទេសពីសហភាពអឺរ៉ុប ២០ភាគរយ។
អាមេរិក គឺជាទីផ្សារដែលទទួលទិញទំនិញពីកម្ពុជាច្រើនជាងគេ ដោយគ្រប់គ្រងចំណែកទីផ្សាររហូតដល់ ៣៧,៩ភាគរយ តាមពីក្រោយដោយវៀតណាម ១៣,៨ ភាគរយ, ចិន ៦,៧ ភាគរយ និងប្រទេសជប៉ុន ៥,៤ ភាគរយ។
ក្នុងឆ្នាំ២០២៤ កម្ពុជានាំចេញទៅអាមេរិកក្នុងទឹកប្រាក់ ៩,៩២ ពាន់លានដុល្លារ កើន ១១,៤ ភាគរយ ចំណែកទំនិញអាមេរិកនាំចូលវិញ មានចំនួន ២៦៤,១៥ លានដុល្លារ កើន ២,៧ ភាគរយ។ ទំហំនាំចេញ-នាំចូលទំនិញទ្វេភាគីកម្ពុជា-អាមេរិក មានទឹកប្រាក់សរុប ១០,១៨ ពាន់លានដុល្លារ កើនឡើង ១១,២ ភាគរយបើធៀបនឹងឆ្នាំ ២០២៣។
ភាគច្រើនលើសលប់នៃទំនិញកម្ពុជានាំទៅទីផ្សារអាមេរិក គឺជាផលិតផលសម្លៀកបំពាក់ កាបូបធ្វើដំណើរ និងស្បែកជើង៕
