ព្រះសីហនុៈ វត្ថុតាងរឹបអូសពីបទល្មើសព្រៃឈើ នៅតំបន់ជួរភ្នំក្រវាញ ត្រូវបានដាក់បង្ហាញទទួលស្វាគមន៍ភ្ញៀវជាតិ និងអន្តរជាតិ នៅរមណីយដ្ឋាន Shinta Mani Wild ដែលជាកន្លែងកម្សាន្តបែបធម្មជាតិក្នុងព្រៃភ្នំមួយ មានតម្លៃថ្លៃរហូតដល់ទៅជាង៣ពាន់ដុល្លារសម្រាប់ភ្ញៀង២នាក់ក្នុង១ថ្ងៃ។

Shinta Mani Wild ស្ថិតនៅក្នុងតំបន់ទេសចរណ៍ធម្មជាតិថ្មរូង ក្នុងភូមិសាស្រ្ត ភូមិព្រៃប្រសិទ្ធិ ឃុំបាក់រទេះ ស្រុកកំពង់សិលា។ ក្រសួងបរិស្ថានបានរៀបចំទស្សនកិច្ច (Familiarization Trip) សម្រាប់ អ្នកសារព័ត៌មាន និងវិស័យឯកជនជាង៥០រូប ទៅកាន់គោលដៅលំហែបៃតង នៃឧទ្យានជាតិជួរភ្នំក្រវាញ និងដែនជម្រកសត្វផ្សេងទៀត ចាប់ពីថ្ងៃទី២ ដល់ទី៥ខែមេសា។

តំបន់ទាំងនេះ គឺស្ថិតក្នុងគម្រោង«និរន្តរភាពតំបន់ទេសភាព និងទេស​ចរណ៍ធម្មជាតិកម្ពុជា» ដែលបាននិងកំពុងអនុ​វត្ត (២០២០-២០២៧) តាមរយៈហិរញ្ញប្បទានឥណទានពីធនាគារពិភពលោក។

ទស្សនកិច្ចនេះមានគោលបំណង ដើម្បីសិក្សាស្វែងយល់អំពីទីតាំង សក្តានុពល និងឱកាសក្នុងការអភិវឌ្ឍទេសចរណ៍ធម្មជាតិ និងភ្ជាប់ទំនាក់ទំនង ជាមួយក្រសួង-ស្ថាប័នពាក់ព័ន្ធ វិស័យឯកជន និងសហគមន៍មូលដ្ឋាន ការគាំទ្រគោលនយោបាយ គោលការណ៍ណែនាំ និងលិខិតបទដ្ឋានគតិយុត្ត លើការអភិវឌ្ឍទេសចរ​ណ៍ធម្មជាតិក្នុងតំបន់ការពារធម្មជាតិ។ បន្ថែមពីនោះ ក៏ដើម្បីចែករំលែកចំណេះដឹង និងផ្សព្វផ្សាយគោលដៅ លំហែបៃតងក្នុងតំបន់ការពារធម្មជាតិ។

ទស្សនកិច្ចនេះ ក៏ដើម្បីផ្តល់ឱកាស ដល់អ្នកចូលរួម នូវបទពិសោធន៍ជាក់ស្តែង ក្នុងតំបន់ការពារធម្មជាតិដ៍ល្អប្រណិត និងមិនធ្លាប់បានជួបប្រទះកន្លងមក។

ស្ថាបនិកអង្គការសម្ព័ន្ធមិត្តសត្វព្រៃ កញ្ញា Suwanna Gauntlett និងមន្រ្តីឧទ្យានុរក្សបរិស្ថានថតរូបនៅឃ្លាំងស្តុកម៉ាស៊ីនអារឈើ ដែលត្រូវបានរឹបអូសពីបទល្មើសនៅជួរភ្នំក្រវាញ។ រូបថតអង្គការសម្ព័ន្ធមិត្តសត្វព្រៃ

នៅថ្ងៃទី១ នៃដំណើរទស្សនកិច្ចនេះ ក្រុមអ្នកចូលរួមបានធ្វើការស្វែងយល់ពី Shinta Mani Wild ដែលជារមណីយដ្ឋានលំដាប់VIP ក្នុងព្រៃភ្នំមួយ កំពុងតែចូលរួមអភិរក្សព្រៃឈើ សត្វព្រៃ និងធនធានធម្មជាតិផ្សេងៗទៀតក្នុងទំហំជាង៣០០ហិកតា នៃតំបន់ទេសចរណ៍ធម្មជាតិថ្មរូង។ ការចូលរួមអភិរក្សនេះ ធ្វើឡើងតាមរយៈការផ្តល់មូលនិធិ​ដល់អង្គការសម្ព័ន្ធមិត្តសត្វព្រៃ (Wildlife Alliance-WA)។

វត្ថុតាងរឹបអូសពីបទល្មើសព្រៃឈើ​ ក្នុងតំបន់នេះជាពិសេស អន្ទាក់ដាក់សត្វព្រៃ និងរូបគំនូរសត្វដំរី និងសត្វផ្សេងៗទៀតត្រូវបានដាក់បង្ហាញស្វាគមន៍ភ្ញៀវជាតិ និងអន្តរជាតិ។

នៅក្បែរនោះ ក៏មានទូដាក់បង្ហាញពីតួលេខ នៃវត្ថុតាង ដែលត្រូវបានរឹបអូសនាពេលកន្លងមកផងដែរ។ ក្នុងនោះមានឈើ និងអន្ទាក់រាប់ម៉ឺនម៉ែត្រគូប  និងខ្សែ ហើយនិងរណាយន្តរាប់ពាន់គ្រឿងជាដើម។

អ្នកនាំភ្ញៀវបានប្រាប់ក្រុមអ្នកចូលរួមថា តម្លៃទៅកម្សាន្តនៅរមណីយដ្ឋាន Shinta Mani Wild ត្រូវបានគេយល់ឃើញថា មានតម្លៃថ្លៃបន្តិចមែន។ ប៉ុន្តែរមណីយដ្ឋាននេះបាននិងកំពុងតែជួយចូលរួមអភិរក្សព្រៃឈើ សត្វព្រៃ ក៏ដូចជាជីវៈម្រុះផ្សេងៗទៀត កុំឱ្យបាត់បង់។

ក្រៅពីនោះ រមណីយដ្ឋាននេះ ក៏កំពុងតែជួយផ្តល់ការងារដល់ប្រជាពលរដ្ឋមូលដ្ឋានជាង១០០នាក់ បើទោះបីជាកន្លែងនេះមានតែតង់សម្រាប់ភ្ញៀវ​តែចំនួន១៥តង់យ៉ាងណាក៏ដោយ។

អន្ទាក់ ជាវត្ថុតាងរឹបអូសពីបទល្មើសព្រៃឈើ នៅតំបន់ជួរភ្នំក្រវាញ និង រូបគំនូរសត្វដំរី ត្រូវបានដាក់បង្ហាញទទួលស្វាគមន៍ភ្ញៀវជាតិ និងអន្តរជាតិ នៅរមណីយដ្ឋាន Shinta Mani Wild។ រូបថត ផាក់ ស៊ាងលី

អនុរដ្ឋលេខាធិការក្រសួងបរិស្ថាន លោកប៉ាក សុខារ៉ាវុតមានប្រសាសន៍ថា ដំណើរទស្សនកិច្ចនេះមានសារៈសំខាន់ ដោយសារតែក្នុងនោះមានទាំងធនាគារពិភពលោក ដែលជាអ្នកផ្តល់ហិរញ្ញប្បទានឥណទានដល់គម្រោង និងមានផ្នែកឯកជនចូលរួមផងដែរ។ ជាងនេះទៅទៀត តំបន់នេះមានក៏មានសារៈសំខាន់ ដែលស្របតាមយុទ្ធសាស្រ្តចក្រាវិស័យបរិស្ថានឆ្មាំ២០២៣-២០២៨ ក៏ដូចជាយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដើម្បីឈានទៅរកអព្យាក្រិតកាបូន នៅឆ្នាំ២០៥០។

លោកបញ្ជាក់ថា៖«ព្រោះថា តំបន់នេះជាតំបន់មួយ ដែលមានសក្តានុពល ដែលយើងរក្សាព្រៃឈើបានច្រើន ហើយក៏ជាលំហែបៃតងមួយល៏ល្អសម្រាប់ប្រទេសកម្ពូជាយើង»។ លោកបន្តថា ដំណើរទស្សនកិច្ចនេះ នឹងជួយផ្សព្វផ្សាយបន្ថែមពីសក្តានុពលទាំងនេះ ដែលចូលរួមទាក់ទាញអ្នកទេសចរជាច្រើនឱ្យទៅលេងកម្សាន្តបន្ថែមទៀតផងដែរ៕