លោកនាយករដ្ឋមន្ត្រី ហ៊ុន ម៉ាណែត បញ្ជាក់ថា ប្រធានាធិបតីចិន ស៊ី ជិនពីង នឹងមកបំពេញទស្សនកិច្ចនៅកម្ពុជាក្នុងរយៈពេល ២ សប្ដាហ៍ទៀត ទោះបីមានការអត្ថាធិប្បាយថា ទំនាក់ទំនងកម្ពុជាចិនបានធ្លាក់ចុះ។

លោកថ្លែងនៅក្នុងពិធីសម្ពោធដាក់ឲ្យប្រើប្រាស់ផែរាម និង មជ្ឈមណ្ឌលភស្តុភា និងហ្វឹកហ្វឺនរួមគ្នាកម្ពុជា-ចិន និងមូលដ្ឋានទ័ពរាមដែលត្រូវបានធ្វើទំនើបកម្ម ក្រោយជំនួយរបស់ចិន នៅថ្ងៃទី៥ ខែមេសានេះ។

មន្ត្រីយោធាជាន់ខ្ពស់ចិនបានថ្លែងថា ភាគីកម្ពុជានឹងចិន នឹងប្រើប្រាស់មជ្ឈមណ្ឌលហ្វឹកហ្វឺនរួមគ្នានេះដើម្បីការពារសន្តិសុខនិងសេរីភាពក្នុងតំបន់ និងពង្រឹងទំនាក់ទំនងទ្វេភាគីយោធាកម្ពុជាចិន។ លោកបន្តថា មជ្ឈមណ្ឌលនេះនឹងត្រូវប្រើប្រាស់សម្រាប់ការធ្វើសមយុទ្ធរួមគ្នារវាងចិននិងកម្ពុជា នៅឆ្នាំ២០២៥នេះ។

មូលដ្ឋានទ័ពរាមបានស្ថិតនៅក្នុងក្រសែភ្នែករបស់ប្រទេសលោកខាងលិចដែលតែងសង្ស័យថា មូលដ្ឋានទ័ពជើងទឹកនេះ នឹងត្រូវបានប្រើប្រាស់ដោយចិន ដែលគំរាមកំហែងដល់សន្តិសុខក្នុងតំបន់ និងធ្វើឲ្យបាត់បង់អធិបតេយ្យភាព និង ឯករាជ្យរបស់កម្ពុជា។

លោក ហ៊ុន ម៉ាណែត បានបញ្ជាក់ជាថ្មីក្នុងពិធីនេះថា មានតែកម្ពុជាទេដែលស្រឡាញ់អធិបតេយ្យភាព និងឯករាជ្យរបស់ខ្លួន ហើយមូលដ្ឋានទ័ពនេះមិនធ្វើឲ្យកម្ពុជាបាត់បង់ឯករាជ្យ និងអធិបតេយ្យនោះទេ។

លោកថា៖ «ចាប់ពីថ្ងៃនេះទៅ នឹងមានការបកស្រាយវាយប្រហារផ្សេងៗ។ ខ្ញុំសុំយកឱកាសនេះបញ្ជាក់ឱ្យច្បាស់ កម្ពុជា រដ្ឋាភិបាលដឹកនាំដោយគណបក្សប្រជាជន គ្មានគោលបំណង មិនថា ពីអតីតកាល ថ្ងៃនេះ និងទៅថ្ងៃមុខ ក្នុងការរំលោភរដ្ឋធម្មនុញរបស់ខ្លួន តាមរយៈការឲ្យប្រទេសណា កងទ័ពណាមកដាក់មូលដ្ឋានផ្ដាច់មុខនៅលើទឹកដីកម្ពុជានោះទេ»។

លោកបន្តថា ការធ្វើទំនើបកម្មនៃមូលដ្ឋានទ័ពរាមនេះគួរតែជាមោទនភាពរបស់កម្ពុជា។ កម្ពុជាស្វាគមន៍ការចូលចតនាវាប្រទេសផ្សេងៗដែលស្នើសុំ សូម្បីភាគីចិនក៏ត្រូវស្នើសុំផងដែរ។

លោកថ្លែងថា៖ «ចាប់ពីថ្ងៃនេះតទៅ មូលដ្ឋានទ័ពរាមបើកស្វាគមន៍មិត្តទាំងអស់... បើយើងចង់លាក់ យើងមិនធ្វើការសម្ពោធនៅថ្ងៃនេះទេ»៕