ចាប់ពីថ្ងៃទី១២ ខែឧសភាខាងមុខនេះតទៅ រាល់ទំនិញនាំចេញទៅសហរដ្ឋអាមេរិកត្រូវមានលិខិតបញ្ជាក់ពីកំណើតទំនិញ ចេញដោយអគ្គនាយកដ្ឋានសេវាពាណិជ្ជកម្ម នៃក្រសួងពាណិជ្ជកម្ម។ ផលិតករ ឬ អ្នកនាំចេញទំនិញទៅសហរដ្ឋអាចស្នើសុំលិខិតបញ្ជាក់ពីដើមកំណើតទំនិញដែលផ្ដល់ជូនដោយឥតគិតថ្លៃ។
«ក្នុងករណីមានការស្នើសុំពីអាជ្ញាធរមានសមត្ថកិច្ចនៃប្រទេសនាំចូល ឬក្នុងករណីចាំបាច់ ដែលមានការសង្ស័យលើដើមកំណើតទំនិញ អគ្គនាយកដ្ឋានសេវាពាណិជ្ជកម្មនៃក្រសួងពាណិជ្ជកម្ម និងអគ្គនាយកដ្ឋានគយនិងរដ្ឋាករកម្ពុជានៃក្រសួងសេដ្ឋកិច្ចនិងហិរញ្ញវត្ថុ ត្រូវសហការក្នុងការស៊ើបអង្កេតរួម និងអាចស្នើសុំកិច្ចសហការពីស្ថាប័នពាក់ព័ន្ធ»។
«ក្នុងករណីរកឃើញថាផលិតករ ឬអ្នកនាំចេញប្រព្រឹត្តបទល្មើសក្លែងបន្លំដើមកំណើតទំនិញតាមគ្រប់រូបភាព រួមទាំងបទល្មើសជ្រកក្រោមប្រតិបត្តិការផ្ទេរមធ្យោបាយដឹកជញ្ជូន ត្រូវរងទណ្ឌកម្មដូចមានចែងក្នុងបទប្បញ្ញត្តិពាក់ព័ន្ធនៃច្បាប់ស្តីពីវិធានដើមកំណើតទំនិញ និងច្បាប់ស្តីពីគយ»។ នេះបើយោងតាមប្រកាសចេញដោយក្រសួងពាណិជ្ជកម្ម និងប្រកាសអន្តរក្រសួង។
.jpg)
វិធានការចុងក្រោយនេះ ក៏មានឡើងក្រោយពេលសហរដ្ឋអាមេរិកបានដាក់ពន្ធលើទំនិញបន្ទះសូឡានាំចេញពីកម្ពុជារហូតដល់ទៅជាង ៣៥០០ភាគរយ ទោះបីជាវិធានការដែលធ្វើឡើងតាមបណ្ដឹងក្រុមហ៊ុននានានេះ មិនទាន់ចូលជាធរមានក្ដី។ សហរដ្ឋអាមេរិកបានរកឃើញថា ក្រុមហ៊ុននាំបន្ទះសូឡាពីកម្ពុជាទទួលបានការឧបត្ថម្ភធន់ក្នុងការផលិត និងបានលក់បង្ខូចថ្លៃនៅសហរដ្ឋអាមេរិក៕
