បុរីម៉ន ដានី ក្នុងគម្រោង២៩ ស្ថិតក្នុងខេត្តកំពង់ស្ពឺ ដែលក្រុមការងារក្រសួងដែនកំពុងតែរកដំណោះស្រាយជូនពលរដ្ឋ។ រូបថត ក្រសួងដែនដី
ភ្នំពេញៈ ក្រុមការងារក្រសួងដែន នគរូបនីយកម្ម និងសំណង់ក្រោមកិច្ចសហការជាមួយភាគីពាក់ព័ន្ធបាននឹងកំពុងបន្តដោះស្រាយវិវាទបុរីដ៏ស្មុគស្មាញប្រមាណជា៣៩គម្រោង ដែលក្នុងនោះមានគម្រោងបុរីម៉នដានី ស្ថិតក្នុងខេត្តកំពង់ស្ពឺផងដែរ។
យ៉ាងហោចណាស់មានវិវាទធំៗពាក់ព័ន្ធនឹងបុរីប្រមាណជា១៣៩គម្រោង។ ប៉ុន្តែមកដល់ពេលបច្ចុប្បន្ននេះ ក្រុមការងារក្រសួងបានដោះស្រាយបានប្រហែលជា១០០គម្រោងហើយ។ នេះបើយោងតាមក្រសួងដែនដី។
រដ្ឋលេខាធិការ ក្រសួងដែនដី លោកថេង ច័ន្ទសង្វារបានឱ្យដឹងថា ក្រុមការងាររបស់ក្រសួង នៅមានវិវាទបុរីជាច្រើនដែលត្រូវបន្តសម្របសម្រួលដោះស្រាយ ទៅតាមការណែនាំពីលោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងដែនដី និងលោកនាយករដ្ឋមន្រ្តីហ៊ុន ម៉ាណែត។ ថ្នាក់ដឹកនាំបាន ណែនាំឱ្យធ្វើការតាមដានការងារវិវាទទាំងនេះ ឱ្យបានជាប់ ហើយខិតខំរិះរកមធ្យោបាយ ដើម្បីសម្របសម្រួល និងដោះស្រាយជូនពលរដ្ឋ។ បញ្ហា ដែលនៅសល់ ទាំងនោះ ក៏មាននៅក្នុងបុរីម៉នដានីផងដែរ។
.jpg)
លោកបញ្ជាក់ថា៖«ក្រុមការងារនីមួយៗបែងចែកគ្នាដោះស្រាយ។ជាង១៣០គម្រោងត្រូវដោះស្រាយ។ ក្នុងនោះ បានដោះស្រាយបានភាគច្រើនដែរ គឺយើងគិតថា១០០គម្រោង។ នៅសល់ប្រមាណជា៣០ ទៅ៤០គម្រោងទៀតកំពុងតែ រកគន្លឹះដោះឱ្យចេញ ព្រោះគម្រោងខ្លះវាស្មុគស្មាញ គម្រោងខ្លះធូរ តែគម្រោងខ្លះវាស្មុគស្មាញយកតែមែនទែន»។
ក្នុងចំណោមគម្រោងដ៏ស្មុគស្មាញទាំងនោះ គឺគម្រោង២៩ ស្ថិតក្នុងស្រុកបសេដ្ឋ និងគងពិសី ខេត្តកំពង់ស្ពឺ របស់បុរីម៉ន ដានី។
លោកបានឱ្យដឹងថា គម្រោង២៩នេះគឺជាគម្រោងមួយដ៏ធំ ដែលធ្វើនៅលើផ្ទៃដីសរុប១០០ហិកតា។ ក្នុងនោះ មាន៥០ហិកតា មានតែប័ណ្ណកម្មសិទ្ធិតែមួយប័ណ្ណ ហើយ៥០ហិកតាទៀត មានរហូតដល់ទៅ១២ប័ណ្ណកម្មសិទ្ធិឯនោះ។
លោកថ្លែងថា៖«យើងខិតខំដោះស្រាយឱ្យចេញ៥០ហិកតា ដែលមានតែ១ប័ណ្ណនេះមុន។ ៥០ហិកតា ដែលមាន១២ប័ណ្ណ វារាងតឹងមែនទែន។ គម្រោង២៩នេះវាពិបាកត្រង់ថា បុរីនេះអភិវឌ្ឍនៅលើដី ដែលមិនមែនជារបស់ខ្លួន។ នៅពេលមិនមែនជារបស់ខ្លួន យើងត្រូវទៅចរចាជាមួយម្ចាស់ដី។ ចរចាជាមួយម្ចាស់ គេសួរថាមានលុយម៉ាន?»។
លោកបានពន្យល់ថា ដោយសារតែនៅពេលដែលម្ចាស់គម្រោង បានទៅទិញដីគេនោះ គឺមានកិច្ចសន្យាត្រឹមត្រូវ មានមេធាវីទទួលស្គាល់ និងមានដាក់តម្លៃហាងឆេងដីត្រឹមត្រូវទៀតផង។ ប៉ុន្តែមិនទាន់បានប្រគល់ឱ្យលុយគេសោះ។ ហេតុនេះ គឺមិនអាចដោះស្រាយ ដោយយកដីនោះទៅពុះចែកគ្នាបាននោះទេ។ ម្យ៉ាងវិញទៀត ក៏នៅមានឈ្មោះដីម្ចាស់ដើមផងដែរ ដែលតម្រូវឱ្យមានការផ្តិតមេដៃ ក្នុងការកាត់ផ្ទេរឈ្មោះ។
លោកមានប្រសាសន៍ថា៖«ទាល់តែម្ចាស់ដីហ្នឹងផ្តិតមេដៃឱ្យ។ អ៊ីចឹងបានគម្រោងយើងស្មុគស្មាញ។ ប៉ុន្តែជាមួយនឹងការយោគយល់ ការសម្របសម្រួលរបស់ក្រុមការងារក្រសួង ម្ចាស់ដីនិងអ្នកពាក់ព័ន្ធដទៃទៀត យើងបានដោះស្រាយបញ្ហានេះមួយជំហានធំ ព្រោះ៥០ហិកតាហ្នឹង បើគិតជាឡូតិ៍ ដែលបានលក់ចេញគឺនៅខាងហ្នឹង។ ៥០ហិកតាទៀតចំនួនតិចជាងទេ»។
លោកបន្តថា ផ្ទៃដី៥០ហិកតាដែលត្រូវបានដោះស្រាយមុនគេនេះ គឺមានអ្នកបង់ប្រាក់១០០ភាគរយរួចហើយ។ រាជរដ្ឋាភិបាលបានឯកភាពផ្ទេរកម្មសិទ្ធិឱ្យពួកគាត់ ដែលសរុបទាំងអស់មានចំនួន១ ៥០២ឡូតិ៍។ ក្នុងនោះ ជំហានទី១ ដែលត្រូវផ្ទេរកម្មសិទ្ធិនោះ មាន ១ ០៩៨ឡូតិ៍។
លោកឧបនាយករដ្ឋមន្រ្តី សាយ សំអាល់បានលើកឡើងនាពេលថ្មីៗនេះថា ដើម្បីបង្កបរិយាកាសគ្មានវិវាទនៅកម្ពុជា ក្រសួងត្រូវបញ្ចប់ការចុះបញ្ជីដីធ្លីជូនពលរដ្ឋ និងបញ្ចប់រាល់វិវាទ ដែលបានកើតឡើងជាមុនសិន។ លោកបានលើកឡើងថា វិវាទនៅតាមបុរីទាំងនោះ ធ្វើឱ្យមនុស្សបាត់ការងារអស់ច្រើនណាស់។ ក្រុមការងាររបស់ក្រសួងបានខិតខំរកដំណោះស្រាយ ទាំងថ្ងៃទាំងយប់ ដែលជាលទ្ធផល ដោះស្រាយបានប្រមាណ១០០គម្រោងនេះ។
យោងតាម និយ័តករអាជីវកម្មអចលនវត្ថុនិងបញ្ចាំបានឱ្យដឹងថា ពលរដ្ឋរាប់ពាន់គ្រួសារបានរងគ្រោះពីគម្រោងអភិវឌ្ឍន៍របស់ក្រុមហ៊ុនម៉ន ដានី រៀលអ៊ីស្ទេត ឯ.ក។ ក្នុងនោះមានទាំងម្ចាស់ដី ដែលបានលក់ដីឱ្យក្រុមហ៊ុន និងអតិថិជនរបស់ក្រុមហ៊ុន ដែលបានបង់ប្រាក់ផ្តាច់ និងបង់រំលស់ផងដែរ។ ម្ចាស់ក្រុមហ៊ុនម៉ន ដានី រៀលអ៊ីស្ទេត លោកស្រីម៉ន ដានី ត្រូវបាននគរបាលឃាត់ខ្លួនកាលពីខែកមរាកន្លងមកពាក់ព័ន្ធទៅនឹងការចេញសែកស្អុយ។ ក្រៅពីនោះ ទ្រព្យសម្បត្តិទាំង៧៩កន្លែងរបស់លោកស្រី ម៉ន ដានី ក៏ត្រូវបានតុលាការខេត្តកំពង់ស្ពឺ ចេញដីកាសម្រេចលក់ដោយបង្ខំផងដែរ៕
