ភ្ញៀវទេសចរបស្ចឹមប្រទេសទៅទស្សនាឧទ្យានបុរាណវិទ្យាអង្គរ។ រូបថត ហុង រស្មី
សៀមរាប៖ សហគ្រាសអង្គរបានចេញផ្សាយរបាយការណ៍ចុងក្រោយរបស់ខ្លួនដែលបង្ហាញពីការផ្លាស់ប្តូរគួរឱ្យកត់សម្គាល់នៅក្នុងសមាសភាពនៃភ្ញៀវទេសចរអន្តរជាតិដែលមកទស្សនាប្រាសាទអង្គរវត្ត។
ចំនួនភ្ញៀវបរទេសសរុបបានកើនឡើងបន្តិចពី ៧៣៨៤៥នាក់ ក្នុងខែមេសា ឆ្នាំ ២០២៤ ដល់ ៧៦២៧៩នាក់ ក្នុងខែមេសា ឆ្នាំ ២០២៥ ឬ ៣,៣ភាគរយ។
យោងតាមរបាយការណ៍លក់សំបុត្រក្នុងខែមេសា ឆ្នាំ ២០២៥ បានបង្ហាញថា៖ «ប្រាក់ចំណូលសំបុត្របានកើនឡើងដល់ជិត ៣,៥លានដុល្លារ ដែលឆ្លុះបញ្ចាំងពីការបន្តរីកចម្រើននៃទេសចរណ៍អន្តរជាតិទៅកាន់ឧទ្យានបុរាណវិទ្យាអង្គរ»។
.jpg)
ភ្ញៀវទេសចរចក្រភពអង់គ្លេស និងសហរដ្ឋអាមេរិកបានកើនឡើងគួរឱ្យកត់សម្គាល់ក្នុចំណោមភ្ញៀវទេសចរអន្ដរជាតិដែលមកទស្សនាឧទ្យានអង្គរ ១៦៩ប្រទេស។
យោងតាមទិន្នន័យរបស់ក្រុមហ៊ុនសហគ្រាសអង្គរ ឬ Angkor Enterprise បានឱ្យដឹងថា៖ «ភ្ញៀវទេសចរមកពីចក្រភពអង់គ្លេសកើនឡើង ១៧,៨៨ភាគរយ កើនឡើងដល់ ៧៥៨៦ នាក់បើធៀបនឹង ៦៤៣៣ ក្នុងខែដូចគ្នាកាលពីឆ្នាំមុន»។
ទិន្នន័យបានបង្ហាញថា កំណើននេះបានធ្វើឱ្យចក្រភពអង់គ្លេស និងសហរដ្ឋអាមេរិកស្ថិតក្នុងចំណោមប្រទេសប្រភពកំពូលទាំងបីសម្រាប់ការមកដល់អង្គរជាអន្តរជាតិ ដោយជាប់ចំណាត់ថ្នាក់លេខ ១ និងទី ២ រៀងគ្នា ដែលមានចំនួនជាង ២២% នៃភ្ញៀវទេសចរអន្តរជាតិសរុបរួមគ្នា។
ទោះយ៉ាងណាក៏ដោយ មិនមែនគ្រប់ប្រទេសទាំងអស់បានធ្វើតាមនិន្នាការដូចគ្នានោះទេ។ ភ្ញៀវមកពីប្រទេសចិន ដែលពីមុនជាទីផ្សារលេចធ្លោ បានធ្លាក់ចុះយ៉ាងខ្លាំង។
ការមកដល់របស់ចិនបានធ្លាក់ចុះ ១៣,៥៩% ពី ៦០៥៧នាក់មកត្រឹម ៥២៣៦នាក់ ដោយបានថយចំនួនភ្ញៀវទេសចរ ៨២១នាក់។
ប្រទេសផ្សេងទៀតដែលបង្ហាញពីកំណើនខ្លាំង រួមមាន ប៉ូឡូញ (+២២,២៥%) ហូឡង់ (+១៤,៧៣%) និងអាល្លឺម៉ង់ (+៧,៧២%) ដែលពង្រឹងនិន្នាការនៃការកើនឡើងចំណាប់អារម្មណ៍របស់អឺរ៉ុបលើវិស័យទេសចរណ៍បេតិកភណ្ឌកម្ពុជា។
ក្នុងអំឡុងរដូវកាលខ្ពស់ក្នុងខែធ្នូ ឆ្នាំ២០២៤ ឧទ្យានបុរាណវិទ្យាអង្គរបានឃើញកំណើនក្នុងវិស័យទេសចរណ៍អន្តរជាតិ ដោយមានភ្ញៀវបរទេសសរុបចំនួន ១២៥៣៤៩ នាក់បានទិញសំបុត្រចូលទស្សនាអង្គរ កើនឡើង ២៧,៤៨% បើធៀបនឹងខែធ្នូ ឆ្នាំ ២០២៣។
សហរដ្ឋអាមេរិកបាននាំមុខភ្ញៀវទេសចរណ៍ចំនួន ១៣៧០៩នាក់ កើនឡើង ៣០,៨៨% តាមពីក្រោយដោយប្រទេសចិនដែលមានភ្ញៀវ ១២២១៧នាក់ និងបារាំងមាន ១០០៧៧នាក់។
ការកើនឡើងគួរឱ្យកត់សម្គាល់ផ្សេងទៀតបានមកពីប្រទេសកូរ៉េខាងត្បូង (+៣១,១៦%) ចក្រភពអង់គ្លេស (+២៨,១២%) និងឥណ្ឌា (+៤១,៨៥%) ដែលឆ្លុះបញ្ចាំងពីការស្ទុះងើបឡើងវិញយ៉ាងខ្លាំងនៅក្នុងចំណាប់អារម្មណ៍នៃការធ្វើដំណើរពិភពលោក។
ទោះបីជាមានការប្រែប្រួលខ្លះក៏ដោយ ឧទ្យានបុរាណវិទ្យាអង្គរនៅតែជាគោលដៅទេសចរណ៍សកលសម្រាប់អ្នកធ្វើដំណើរ ហើយតួលេខចុងក្រោយបំផុតបង្ហាញពីសញ្ញាណនៃការធ្វើពិពិធកម្មប្រភពទេសចរណ៍។
ចាប់ពីថ្ងៃទី ១ ខែមករា ដល់ថ្ងៃទី ១៣ ខែឧសភា ឆ្នាំ ២០២៥ ភ្ញៀវទេសចរបរទេសសរុបចំនួន ៥០០,៧៣១ នាក់បានទិញប័ណ្ណអង្គរដើម្បីទស្សនាឧទ្យានបុរាណវិទ្យាអង្គរ នេះបើយោងតាមទិន្នន័យចេញផ្សាយដោយសហគ្រាសអង្គរ៕
