បេក្ខជនជ័យលាភីផ្នែកសន្ដិសុខសាយប័រចំនួន ៥រូបត្រូវបានសម្រិតសម្រាំងពីបេក្ខភាព១០០នាក់ ដើម្បីបន្ដពង្រឹងសមត្ថភាពប្រកួតប្រជែងថ្នាក់តំបន់។ រូបថត សហការី
ភ្នំពេញ៖ កម្ពុជាបានសម្រិតសម្រាំងបេក្ខជន ផ្នែកសន្តិសុខសាយប័រ ចំនួន ៥រូប ពីបេក្ខភាពសរុប ១០០នាក់ ដើម្បីបន្ដពង្រឹងសមត្ថភាពប្រកួតប្រជែងជាមួយក្រុមសន្តិសុខសាយប័រថ្នាក់អាស៊ីនៅខែតុលាខាងមុខ។
ក្រោយឆ្លងកាត់ការប្រកួតប្រជែង រយៈពេល ៨ម៉ោង កម្មវិធីប្រកួតថ្នាក់ជាតិ ផ្នែកសន្តិសុខសាយប័រ ប្រចាំឆ្នាំ២០២៥ បានរកឃើញបេក្ខជនឆ្នើម ដែលមានសមត្ថភាព និងអាចតំណាងឱ្យប្រទេសកម្ពុជាចេញទៅប្រកួតថ្នាក់តំបន់ ដែលនឹងរៀបចំឡើងនៅប្រទេសថៃ។
ពិធីប្រគល់ពានរង្វាន់កម្មវិធីប្រកួតប្រជែងថ្នាក់ជាតិ ផ្នែក សន្តិសុខសាយប័រ ប្រចាំឆ្នាំ ២០២៥ “Cambodia National Cybersecurity Competition 2025” បានប្រព្រឹត្តទៅនៅថ្ងៃទី១៨ ខែឧសភា នាបណ្ឌិត្យសភាបច្ចេកវិទ្យាឌីជីថល កម្ពុជា (CADT) ក្រោមវត្តមានលោក ជុន វ៉ាត រដ្ឋលេខាធិការក្រសួងប្រៃសណីយ៍ និងទូរគមនាគមន៍។
.jpg)
យោងតាមក្រសួងប្រៃសណីយ៍ និងទូរគមនាគមន៍ បានបង្ហាញថា៖ «បន្ថែមពីបេក្ខជនឆ្នើម ៥រូបនេះ កម្មវិធីក៏បានជ្រើសរើសបេក្ខជនបេក្ខនារីឆ្នើមចំនួន ១៥រូបបន្ថែមទៀត ដើម្បីទទួលបានការបណ្ដុះបណ្ដាល និងពង្រឹងជំនាញ បច្ចេកទេស ផ្នែកសន្តិសុខសាយប័រ ពីគ្រូបង្គោល រយៈពេល ៤ ខែ»។
ក្រសួងបានបន្ដថា៖ «ក្នុងចំណោម បេក្ខជនទាំង ២០រូបនេះ នឹងជម្រុះយកតែ ៤នាក់ ដើម្បីតំណាង ប្រទេសកម្ពុជា ចេញទៅចូលរួមប្រកួតប្រជែង វគ្គតំបន់អាស៊ាន (ASEAN ROUND) និងវគ្គអាស៊ានសាយប័រស៊ីហ្គេម (ASEAN Cyber SEA Game) ដែលរៀបចំដោយមជ្ឈមណ្ឌលអាស៊ាន-ជប៉ុន សម្រាប់កសាងសមត្ថភាពសន្តិសុខសាយប័រ ASEAN- Japan Cybersecurity Capacity Building Centre (AJCCBC) នៅប្រទេសថៃអំឡុងខែតុលាខាងមុខនេះ»។
ក្រៅពីការលើកទឹកចិត្ដឱ្យបេក្ខភាពកម្ពុជា ២០រូបខិតខំប្រឹងប្រែងពង្រឹងសមត្ថភាព លោក វ៉ាត បានបញ្ជាក់ថា កម្មវិធីប្រកួតថ្នាក់ជាតិសន្តិសុខសាយប័រប្រចាំឆ្នាំ ២០២៥ បង្ហាញពីការចូលរួមយ៉ាងសកម្មរបស់ក្រសួងប្រៃសណីយ៍ និងទូរគមនាគមន៍ ក្នុងការការលើកកម្ពស់មូលធនឌីជីថល នៅក្នុងវិស័យសន្តិសុខសាយប័រ និងការប្រកួតប្រជែងក្នុងវិស័យសន្តិសុខសាយប័រនៅប្រទេសកម្ពុជា និងក្នុងតំបន់។
ជ័យលាភីទាំង ៥រូប ដែលបានឈ្នះក្នុងកម្មវិធីប្រកួតប្រជែងថ្នាក់ជាតិផ្នែក សន្តិសុខសាយប័រ ប្រចាំឆ្នាំ ២០២៥ រួមមាន៖
ជ័យលាភីលេខ ១ លោក ប៉ាន់ វិច្ឆិកា ទទួលបានប្រាក់រង្វាន់ចំនួន ២លានរៀល លេខ ២ លោក ស៊ុន គីមស្រួល ទទួលបានប្រាក់រង្វាន់ចំនួន ១.៥លានរៀល លេខ ៣ លោក ហាក់ វិទូ ទទួលបានប្រាក់រង្វាន់ចំនួន ១លានរៀល លេខ ៤ លោក ប៊ុនចំណាន ទទួលបានប្រាក់រង្វាន់ចំនួន ៥០ម៉ឺនរៀល និងលេខ ៥ លោក ម៉េង រដ្ឋារី ទទួលបានប្រាក់រង្វាន់ចំនួន ៥០ម៉ឺនរៀល៕
