លោកអ៊ុក ម៉ៅ ដែលត្រូវបានឃុំខ្លួននៅពន្ធនាគារខេត្តស្ទឹងត្រែង ពីបទ ញុះញង់ឲ្យប្រព្រឹត្តបទល្មើសជាអាទិ៍ និងបទបរិហារកេរ្តិ៍ជាសាធារណៈ។ ក្រៅពីនោះ លោកមានបណ្តឹងជាង១០ទៀតនៅតុលាការផងដែរ។
ស្ទឹងត្រែងៈ អ្នកសារព័ត៍មាន “ឥន្ទ្រីផ្លាសញ៊ូ” ដែលមានបណ្តឹងជាង១០នៅតុលាការ លោកអ៊ុក ម៉ៅ ត្រូវបានឃុំខ្លួននៅពន្ធនាគារខេត្តស្ទឹងត្រែង ពីបទ “ញុះញង់ឲ្យប្រព្រឹត្តបទល្មើសជាអាទិ៍ និងបទបរិហារកេរ្តិ៍ជាសាធារណៈ។ នេះបើយោងតាមតុលាការខេត្តស្ទឹងត្រែងនៅថ្ងៃអង្គារ ទី២០ ខែឧសភានេះ។
អ្នកនាំពាក្យសាលាដំបូងខេត្តស្ទឹងត្រែង លោកឈុំ ស៊ាងហាក់បានបញ្ជាក់ថា៖«គាត់ត្រូវបានឃុំខ្លួនចាប់តាំងពីថ្ងៃចាប់ខ្លួនទី១៦ ឧសភាមកម៉្លេះ។ ដំណាក់កាលនេះ ជាដំណាក់កាលស៊ើបសួរ អ៊ីចឹងមិនទាន់សម្រេចថាគាត់មានទោសឬអត់ទេ គ្រាន់តែឃុំខ្លួនបណ្តោះអាសន្ន រង់ចាំនិតិវិធីបន្តទៀត»។ លោកក៏បានឱ្យដឹងផងដែរថា ឈ្មោះ អ៊ុក ម៉ៅ ក៏មានបណ្តឹងជាច្រើនករណីទៀតនៅសាលាដំបូងផងដែរ។
លោកអ៊ុក ម៉ៅ អាយុ៤៩ឆ្នាំ ដែលសកម្មជនបរិស្ថានផងនោះ ត្រូវបានចាប់ខ្លួន ដោយជនមិនស្គាល់អត្តសញ្ញាណច្បាស់លាស់៣នាក់ នៅផ្ទះរបស់លោក ស្ថិតក្នុងភូមិអន្លង់ភេ ឃុំអន្លង់ភេ ស្រុកថាឡាបរីវ់ាត់ កាលពីថ្ងៃទី១៦ ខែឧសភា ឆ្នាំ២០២៥។ នេះបើយោងតាមអង្គការអាដហុកនៅថ្ងៃទី១៩ ខែឧសភា។
.jpg)
ជនមិនស្គាល់អត្តសញ្ញាណ៣នាក់ ដែលម្នាក់ស្លៀកពាក់ឯកសណ្ឋានជាកងរាជអាវុធហត្ថបានចាប់ដាក់ខ្នោះដៃលោក ដឹកតាមរថយន្តម៉ាក្សលុចស៊ីស (Lexus)មួយគ្រឿង ដោយមិនបានប្រាប់ពីមូលហេតុ ឬបង្ហាញដីការអ្វីឡើយ។
អង្គការបានបញ្ជាក់ថា៖«៧ម៉ោងក្រោយមក នៅវេលាម៉ោង៧យប់ថ្ងៃដដែល លោកអ៊ុក ម៉ៅ ត្រូវបានបញ្ចូនទៅឃុំខ្លួនបណ្តោះអាសន្ននៅពន្ឋនាគារខេត្តស្ទឹងត្រែង ដោយចោទប្រកាន់សំណុំរឿងព្រហ្មទណ្ឌលេខ០៨៣ ចុះថ្ងៃទី២៥ខែកុម្ភៈឆ្នាំ២០២៥ ពីបទ ញុះញង់ឲ្យប្រព្រឹត្តបទល្មើសជាអាទិ៍ និងបទបរិហារកេរ្តិ៍ជាសាធារណៈ»។
បទល្មើសនេះប្រព្រឹត្តនៅអំឡុងខែឧសភា ឆ្នាំ២០២៤ និង អំឡុងខែកុម្ភៈ ឆ្នាំ ២០២៥តាមរយៈដីកាបញ្ជាឲ្យចូលខ្លួន ចុះថ្ងៃទី ១១ ខែ ឧសភា ឆ្នាំ ២០២៥ របស់អយ្យការអមសាលាដំបូងខេត្តស្ទឹងត្រែង។ករណីនេះមេធាវីរបស់អាដហុកយល់ព្រមទទួលយករឿងក្តីនេះមកការពារតាមសំណើររបស់ប្រពន្ធលោក អ៊ុក ម៉ៅ។
លោកអ៊ុក ម៉ៅ ដែលត្រូវបានឃុំខ្លួននៅពន្ធនាគារខេត្តស្ទឹងត្រែង ពីបទ ញុះញង់ឲ្យប្រព្រឹត្តបទល្មើសជាអាទិ៍ និងបទបរិហារកេរ្តិ៍ជាសាធារណៈ។ ក្រៅពីនោះ លោកមានបណ្តឹងជាង១០ទៀតនៅតុលាការផងដែរ។
អាដហុកបានលើកឡើងថា ការចាប់ខ្លួននេះទំនងសង្ស័យថា មកពីលោកបានធ្វើការផ្ដល់បទសម្ភាសន៍ជាមួយវិទ្យុក្រៅស្រុកបកប្រែជាភាសាខ្មែរល្បីមួយ កាលថ្ងៃទី១៣ ខែឧសភា ឆ្នាំ២០២៥។ នៅក្នុងបទសម្ភាសន៍នោះ លោក អ៊ុក ម៉ៅ បានលើកឡើងពីអំពីពុករលួយ ដែលគ្មានយុត្តិធម៍ គ្មានតម្លាភាព ចំពោះរូបលោក។ បន្ថែមពីនោះលោកបាននិយាយពីមន្រ្តីបរិស្ថានបានឲ្យរូបលោកធ្វើការសូមទោសជាសាធារណ: តែត្រូវបានរូបលោកបដិសេធ។
លោកអ៊ុក ម៉ៅ មានស្រុកកំណើតនៅភូមិស្វាយទាប ឃុំស្វាយទាប ស្រុកចំការលើ ខេត្តកំពង់ចាម។ ក្រៅពីការងារជាកសិករ លោក អ៊ុក ម៉ៅ ក៏ជាប្រធានគណ:កម្មាធិការសាខាគណបក្ស”ដើម្បីកម្ពុជា” ប្រចាំខេត្តស្ទឹងត្រែងផងដអាដហុកបានអះអាងថា លោកអ៊ុក ម៉ៅ តែងតែចំណាយពេលវេលា និងថវិកាផ្ទាល់ខ្លួន ដើម្បីចុះល្បាតតាមតំបន់ព្រៃសហគមន៍ ដើម្បីថតសកម្មភាពរបស់ឈ្មួញកាប់បំផ្លាញព្រៃឈើ និង ដឹកជញ្ជូនឈើធំៗចេញពីឃ្លាំងរបស់ក្រុមហ៊ុន ដែលលោកអះអាងថា មានអ្នកមានអំណាចនៅពីក្រោយ។
បន្ទាប់មក លោកតែងតែចែកចាយព័ត៍មាន រូបភាពបទល្មើសព្រៃឈើ និងសកម្មភាពកាប់បំផ្លិចបំផ្លាញព្រៃឈើ ការជួញដូរព្រៃឈើដោយខុសច្បាប់ និងផ្ដល់បទសម្ភាសន៍ ទៅកាន់ស្ថាប័នសារព័ត៌ក្នុងស្រុក ក្រៅស្រុកល្បីៗ ជាច្រើន រហូតរូបលោកត្រូវបានប្រជាសហគមន៍ផ្សេងៗដាក់ងារឲ្យថា ជាសកម្មជនការពារព្រៃឈើ និងបរិស្ថានដ៍ឆ្លើម ថែមទៀតផង ។
ស្របពេលជាមួយគ្នានឹងភាពសកម្មទាំងនេះ លោក អ៊ុក ម៉ៅ ក៍បានទទួលរងនូវបណ្តឹងចោទប្រកាន់ពីមន្ត្រីមួយចំនួននៅក្នុងខេត្តស្ទឹងត្រែងជាង១០ករណី។ ក្នុងនោះភាគច្រើន លោកត្រូវបានចោទពីបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទកាប់គាស់ រុករានដីព្រៃ ឆ្ការដុត និងឈូសឆាយដីព្រៃ ដើម្បីយកជាកម្មសិទ្ឋិ។ នេះបើយោងតាមប្រភពដដែលនេះ។
មិនត្រឹមតែការទទួលរងនូវពាក្យបណ្តឹងប៉ុណ្ណេះទេ ជារឿយៗលោកក៍តែងតែទទួលរងនូវការសំឡុត គំរាមកំហែងពីសំណាក់អ្នកមានអំណាច និងក្រុមឈ្មួយមួយចំនួនទៀតផងដែរ ។ រហូតដល់ផ្ទះរបស់លោកត្រូវបានជនមិនស្គាល់មុខចូលមកលួចដុត បណ្ដាលឲ្យផ្ទះ ម៉ូតូម៉ាកហុងដាឌ្រីម និងរបស់របរក្នុងផ្ទះត្រូវបានភ្លើងឆាបឆេះគ្មានសល់ នៅយប់រំលងអធ្រាតថ្ងៃទី ២៤ ខែមិនា ឆ្នាំ ២០២៣ថែមទៀតផង។
គណបក្សដើម្បីកម្ពុជា ក៏បានចេញសេចក្តីថ្លែងការណ៍មួយពាក់ព័ន្ធទៅនឹងការចាប់ខ្លួនលោក អ៊ុក ម៉ៅផងដែរ កាលពីថ្ងៃទី១៧ ខែឧសភា៕
