លោក ទូច សុខៈ ចាត់ទុករបាយការណ៍នេះជាឧបករណ៍នយោបាយដើម្បីទម្លាក់កំហុសលើកម្ពុជា និងបិទបាំងទង្វើរបស់ខ្លួន។ រូបថត សហការី
ភ្នំពេញ៖ រាជរដ្ឋាភិបាលកម្ពុជាបានច្រានចោលរបាយការណ៍អន្តរជាតិមួយនាពេលថ្មីៗនេះដែលចោទប្រកាន់ថា កម្ពុជាគឺជាប្រភពឧក្រិដ្ឋកម្មតាមអ៊ីនធឺណិតឆ្លងដែន ដោយហៅវាជាសេនារីយូនយោបាយ និងខ្វះភាពជឿជាក់ខាងវិទ្យាសាស្ត្រ។
របាយការណ៍ដែលមានចំណងជើងថា «គោលនយោបាយ និងលំនាំ៖ ឧក្រិដ្ឋកម្មឆ្លងដែនដែលប្រព្រឹត្តដោយរដ្ឋនៅកម្ពុជា ជាការគំរាមកំហែងសន្តិសុខសកល» និពន្ធដោយលោក Jacob Sims និងបោះពុម្ពកាលពីដើមខែនេះ បានឱ្យដឹងថា គណបក្សកាន់អំណាចរបស់កម្ពុជា គឺគណបក្សប្រជាជនកម្ពុជា (CPP) ទទួលប្រយោជន៍ពីប្រតិបត្តិការបោកប្រាស់យ៉ាងធំសម្បើមនេះ។
របាយការណ៍នេះបានបង្ហាញថា៖ «ការបោកប្រាស់បានក្លាយជាឧស្សាហកម្មក្នុងស្រុកដែលរកប្រាក់ចំណេញយ៉ាងសម្បើម។ ការប៉ាន់ប្រមាណជាផ្លូវការមានចាប់ពី ១២,៥ ដល់ ១៩ ពាន់លានដុល្លារក្នុងមួយឆ្នាំ ស្មើនឹង ៦០% នៃផលិតផលក្នុងស្រុកសរុប ហើយកំពុងធ្លាក់ចុះយ៉ាងខ្លាំងនូវវិស័យផ្លូវការដ៏ធំបំផុតរបស់ប្រទេស គឺឧស្សាហកម្មកាត់ដេរ និងវាយនភណ្ឌ»។
.jpg)
របាយការណ៍បានបន្ដថា ទោះបីជាមានការតវ៉ាពីអន្តរជាតិក៏ដោយ កំណែទម្រង់នៅតែមិនទំនងកើតមានដោយសារការសហការគ្នារវាងការគាបសង្កត់ជាប្រព័ន្ធ និងភូមិសាស្ត្រនយោបាយ ជាពិសេសពាក់ព័ន្ធនឹងប្រទេសចិន។
ជាការឆ្លើយតប អ្នកនាំពាក្យក្រសួងមហាផ្ទៃ លោក ទូច សុខៈ បានច្រានចោលការរកឃើញនេះ ដោយហៅចំណងជើងនៃរបាយការណ៍នេះថា «គួរឱ្យអស់សំណើច» ហើយអះអាងថា វាជា «សេណារីយ៉ូសម្រាប់ប្រើជាឧបករណ៍ដើម្បីបន្ទោសប្រទេសតូចតាច ដែលខ្សោយខាងបច្ចេកវិទ្យា»។
លោក សុខៈ បានថ្លែងនៅថ្ងៃទី ២០ ខែឧសភាថា៖ «សំណួរសួរថា តើប្រទេសកម្ពុជាជាប្រទេសមហាអំណាច ឬជាប្រទេសជឿនលឿនផ្នែកបច្ចេកវិទ្យា? ចម្លើយគឺ មិនមែន! ជារួម កម្ពុជា ក៏ដូចជាប្រទេសមួយចំនួន រងគ្រោះដោយសារបណ្ដាប្រទេសមហាអំណាច បណ្ដាប្រទេសជឿនលឿនបច្ចេកវិទ្យា ដែលមានបទល្មើសបច្ចេកវិទ្យាកើតឡើងនៅទីនោះ ហើយបទល្មើសរាលដាលដល់ប្រទេសតូចតាច»។
លោកបន្ដថា៖ «ប៉ុន្ដែគេបានប្រើឧបករណ៍ក្រុមណាមួយ ឬអង្គការអន្ដរជាតិណាមួយធ្វើរបាយការណ៍បំភាន់ដើម្បីទម្លាក់កំហុសលើប្រទេសតូចតាច បិទបាំងកំហុសឆ្គងរបស់ពួកគេ ឬបទល្មើសកើតឡើងពោលពាសនៅប្រទេសពួកគេទៅវិញ»។
លោក សុខៈ បានលើកយកឧទាហរណ៍ជាក់ស្ដែងនៅសហរដ្ឋអាមេរិកអំពីអំពើឆបោកពីបណ្ដាញអនឡាញចំពោះជនចូលនិវត្ដន៍លើប្រាក់សោធននិវត្ដន៍ដែលកើតមានឡើងរៀងរាល់ថ្ងៃ។
លោកចាត់ទុករបាយការណ៍នេះជាឧបករណ៍នយោបាយដើម្បីទម្លាក់កំហុសលើកម្ពុជា និងបិទបាំងទង្វើរបស់ខ្លួន។
លោក សុខៈ បានបញ្ជាក់ថា៖ «វាជាចេតនាទុច្ចរឹតដែលចង់ធ្វើឱ្យប្រទេសតូចតាច គឺរងគ្រោះ ក្រោមក្របខណ្ឌភូមិសាស្ដ្រនយោបាយ ឬក៏ជាប្រធានបទឆ្ពោះទៅរកការបោះឆ្នោត ពីព្រោះការបោះឆ្នោតនៅប្រទេសកម្ពុជាក៏កាន់តែកៀកខិតជិតដែរ។ ដូច្នេះ ប្រធានបទនយោបាយនឹងមានជាបន្ដបន្ទាប់»។
លោកបានអះអាងថា របាយការណ៍នេះមិនមែនជាការស្រាវជ្រាវបែបវិទ្យាសាស្ដ្រ ដោយដកស្រង់ពីប្រភពពាសវាលពាសកាលដោយក្រុមណាមួយ តែដាក់ទង់ជាតិសហរដ្ឋអាមេរិក លើក្របរបាយការណ៍ ដែលធ្វើឱ្យប៉ះពាល់ដល់ប្រទេសមហាអំណាច ជារដ្ឋគំរូ។
យោងតាមរបាយការណ៍ ចំណុចកណ្តាលនៃឧស្សាហកម្មឆបោកតាមបច្ចេកវិទ្យាអ៊ីនធឺណិតនេះគឺអាស៊ីអាគ្នេយ៍ ជាពិសេសប្រទេសកម្ពុជា មីយ៉ាន់ម៉ា និងឡាវ។
គ្រាន់តែ ៣ប្រទេសនេះ កម្លាំងពលកម្មឧក្រិដ្ឋកម្មតាមអ៊ីនធឺណិតមានលើសពី ៣៥ម៉ឺននាក់យ៉ាងងាយស្រួល។ ការប៉ាន់ប្រមាណប្រាក់ចំណូលប្រចាំឆ្នាំ បង្កើតដោយក្រុមបោកប្រាស់ មាននៅចន្លោះពី ៥០ ទៅ ៧៥ ពាន់លានដុល្លារ៕
