គណៈប្រតិភូឥណ្ឌូណេស៊ី ដែលមានសមាជិកចំនួន ៤០ នាក់ ចូលរួមកម្មវិធីបណ្តុះបណ្តាលជាន់ខ្ពស់នៅកម្ពុជា។ រូបថត សហការី
ភ្នំពេញ៖ កម្ពុជា និងឥណ្ឌូណេស៊ីបានអះអាងជាថ្មីនូវការប្តេជ្ញាចិត្តរួមគ្នាក្នុងការពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន បន្ទាប់ពីកិច្ចប្រជុំកម្រិតខ្ពស់ជាបន្តបន្ទាប់រវាងគណៈប្រតិភូអនុវត្តច្បាប់ឥណ្ឌូនេស៊ី និងស្ថាប័នសំខាន់ៗរបស់កម្ពុជាកាលពីថ្ងៃទី២០ ឧសភា។
ស្ថានទូតឥណ្ឌូណេស៊ីប្រចាំកម្ពុជា បានឲ្យដឹងថា៖ «គណៈប្រតិភូឥណ្ឌូណេស៊ី ដែលមានសមាជិកចំនួន ៤០ នាក់ ដែលបច្ចុប្បន្ននៅកម្ពុជា ជាផ្នែកនៃកម្មវិធីបណ្តុះបណ្តាលជាន់ខ្ពស់ ស្វែងយល់ជាអន្តរជាតិលើការការពារឧក្រិដ្ឋកម្ម ធ្វើទំនើបកម្មដល់កងកម្លាំងប៉ូលិស និងការការពារជនជាតិឥណ្ឌូនេស៊ីនៅក្រៅប្រទេស»។
កម្មវិធីនេះគឺជាផ្នែកមួយនៃគំនិតផ្តួចផ្តើមដ៏ទូលំទូលាយដើម្បីផ្ដល់នូវភាពជាអ្នកដឹកនាំនាពេលអនាគតរបស់ភ្នាក់ងារអនុវត្តច្បាប់ឥណ្ឌូនេស៊ីជាមួយនឹងទស្សនវិស័យសកល។
.jpg)
ស្ថានទូតបានបន្ដថា៖ «ក្នុងអំឡុងពេលទស្សនកិច្ចសិក្សារបស់ពួកគេ គណៈប្រតិភូបានពិភាក្សាដាច់ដោយឡែកជាមួយនគរបាលជាតិកម្ពុជា (CNP) គណៈកម្មាធិការជាតិប្រឆាំងការជួញដូរ (NCCT) និងអាជ្ញាធរជាតិប្រយុទ្ធប្រឆាំងគ្រឿងញៀន (NACD)»។
កិច្ចសន្ទនាទាំងនេះផ្តោតលើការពង្រឹងកិច្ចសហប្រតិបត្តិការទ្វេភាគី ដើម្បីដោះស្រាយឧក្រិដ្ឋកម្មឆ្លងដែនជាច្រើន រួមទាំងការបោកប្រាស់តាមអ៊ីនធឺណិត បទល្មើសទាក់ទងនឹងបច្ចេកវិទ្យា ការជួញដូរមនុស្ស ការជួញដូរគ្រឿងញៀន និងការលាងលុយកខ្វក់។
ការជួញដូរមនុស្សជាចំណុចស្នូលនៃកិច្ចប្រជុំជាមួយ NCCT។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃ NCCT បានផ្តល់នូវទិដ្ឋភាពជាក់ស្តែងអំពីបញ្ហាប្រឈមរបស់ប្រទេសកម្ពុជានាពេលបច្ចុប្បន្ន ជាពិសេសការកេងប្រវ័ញ្ចលើប្លេតហ្វមឌីជីថលសម្រាប់គោលបំណងជួញដូរ។
ក្រសួងមហាផ្ទៃកម្ពុជាបានដកស្រង់សម្ដីលោកស្រី ប៊ុនអេង ថា៖ «កម្ពុជា គឺទទួលស្គាល់ថា ចំពោះបទល្មើសអំពើជួញដូរមនុស្ស គឺធ្លាប់កើតមាននៅក្នុងប្រទេសកម្ពុជា ប៉ុន្តែក៏កម្ពុជាមិនដែលព្រងើយកន្ដើយនោះឡើយ គឺតែងតែចង់បង្ក្រាប និងជួយសង្គ្រោះជនរងគ្រោះជានិច្ច ឱ្យតែទទួលបាននូវព័ត៌មាន ជាមួយនឹងវិធានការអនុវត្តយ៉ាងតឹងរឹងនូវច្បាប់ដែលមាន»។
លោកស្រីស្វាគមន៍ចំពោះសំណើរបស់ភាគីឥណ្ឌូនេស៊ី ដែលចង់ដឹងពីបទពិសោធន៍ នៃការងារប្រយុទ្ធប្រឆាំងអំពើជួញដូរមនុស្សនេះ រួមជាមួយនឹងការបន្តពង្រឹងកិច្ចសហប្រតិបត្តិការជាមួយអាជ្ញាធរឥណ្ឌូនេស៊ី លើការងារទប់ស្កាត់អំពើឆ្លងដែនខុសច្បាប់ ឧក្រិដ្ឋកម្មឆ្លងដែន និងបទល្មើសជាច្រើនទៀត។
ភាគីទាំងពីរបានទទួលស្គាល់ពីការកើនឡើងនៃភាពស្មុគស្មាញនៃឧក្រិដ្ឋកម្មឆ្លងដែន ហើយបានសង្កត់ធ្ងន់លើតម្រូវការសម្រាប់កិច្ចសហប្រតិបត្តិការអន្តរជាតិដ៏រឹងមាំ ការផ្លាស់ប្តូរចំណេះដឹង និងគំនិតផ្តួចផ្តើមកសាងសមត្ថភាព ដើម្បីប្រយុទ្ធប្រឆាំងនឹងការគំរាមកំហែងទាំងនេះប្រកបដោយប្រសិទ្ធភាព។
គណៈប្រតិភូបានពិភាក្សាអំពីយុទ្ធសាស្ត្ររួមបញ្ចូលគ្នា ដូចជាប្រតិបត្តិការអនុវត្តច្បាប់ដែលបានសម្របសម្រួល យុទ្ធនាការអប់រំសាធារណៈ កម្មវិធីស្តារនីតិសម្បទាអ្នកញៀន និងកិច្ចសហប្រតិបត្តិការឆ្លងដែនលើការលុបបំបាត់គ្រឿងញៀន។
ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto តំណាងគណៈប្រតិភូឥណ្ឌូណេស៊ី បានលើកឡើងពីភាពបន្ទាន់នៃការអនុវត្តអនុស្សរណៈនៃការយោគយល់គ្នាស្តីពីការប្រយុទ្ធប្រឆាំងនឹងឧក្រិដ្ឋកម្មឆ្លងដែន ដែលបានចុះហត្ថលេខាដោយប្រទេសទាំងពីរក្នុងឆ្នាំ ២០២៣។
លោកបានក្រើនរំឭកថា៖ «ជាមួយនឹងជនជាតិឥណ្ឌូនេស៊ីដែលកំពុងរស់នៅ និងធ្វើការក្នុងប្រទេសកម្ពុជាកាន់តែច្រើន ហានិភ័យនៃពួកគេចូលរួមក្នុងឧក្រិដ្ឋកម្ម ឬក្លាយជាជនរងគ្រោះនៃការជួញដូរមនុស្ស និងការប្រើប្រាស់គ្រឿងញៀនបានកើនឡើងយ៉ាងខ្លាំង»។
យោងតាមក្រសួងការងាររបស់កម្ពុជា ជនជាតិឥណ្ឌូនេស៊ីជាង ១៣១០០០នាក់ត្រូវបានផ្តល់ការងារនៅក្នុងប្រទេសគិតត្រឹមឆ្នាំ ២០២៤ ដោយមានប្រហែលមួយភាគបីរស់នៅក្នុងខេត្តព្រះសីហនុ ជាសហគមន៍ឥណ្ឌូនេស៊ីដ៏ធំបំផុតរបស់កម្ពុជា។
គណៈប្រតិភូឥណ្ឌូណេស៊ី គ្រោងបន្តដំណើរបំពេញទស្សនកិច្ចនៅខេត្តព្រះសីហនុ ដែលពួកគេជួបជាមួយមន្ត្រីអនុវត្តច្បាប់ក្នុងស្រុក និងមន្ត្រីរដ្ឋាភិបាល ដើម្បីស្វែងយល់បន្ថែមអំពីកិច្ចសហប្រតិបត្តិការលើវិស័យសន្តិសុខ និងការការពារប្រជាពលរដ្ឋ៕
