ភ្នំពេញៈ ក្រសួងបរិស្ថានបានប្រកាសដាក់ឱ្យប្រើប្រាស់ជាផ្លូវការ នូវកម្មវិធីរដ្ឋបាលឌីជីថល (E-Admin) ជំហានទី២ និងកម្មវិធី CHAKRA STEM APP នាព្រឹកថ្ងៃព្រហស្បតិ៍ ទី២២ ខែឧសភានេះ ដើម្បីពន្លឿនការចរាចរណ៍ ឯក​សារ​រដ្ឋបាល ឱ្យកាន់តែលឿនរហ័ស​ក្នុងការចូលរួមដោះស្រាយបញ្ហាបរិស្ថាននៅកម្ពុជា។

ពិធីនេះធ្វើឡើងក្រោមអធិបតីភាព រដ្ឋមន្រ្តីក្រសួងបរិស្ថាន លោកអ៊ាង សុផល្លែត និងមានការចូលរួមពីថ្នាក់ដឹកនាំ មន្រ្តី​រាជការក្រសួងបរិស្ថាន តំណាងក្រសួង ស្ថាប័នពាក់ព័ន្ធ អង្គការដៃគូអភិវឌ្ឍន៍ជាច្រើននាក់។

ក្នុងឱកាសនោះ លោករដ្ឋមន្រ្តីបានចាត់ទុក កម្មវិធីនេះថា ជាព្រឹត្តិការណ៍ប្រវត្តិសាស្រ្តមួយ នៃការរៀបចំរដ្ឋបាល​ឌី​ជី​ថល​​​របស់ក្រសួង​បរិស្ថាន ដើម្បីពន្លឿន ការចរាចរណ៍ ឯក​សារ​រដ្ឋបាល ឱ្យកាន់តែលឿនរហ័ស និងមាន​ប្រសិទ្ធ​ភាពការ​ងារខ្ពស់ សម​ស្របតាមគោលនយោ​បាយ​យុទ្ធសា​ស្រ្ត​អា​ទិភាព​គន្លឹះទាំង៥ គឺមនុស្ស ផ្លូវ ទឹក ភ្លើង និងបច្ចេកវិទ្យា របស់រាជរដ្ឋា​ភិបាលកម្ពុជា អាណត្តិទី៧ នៃរដ្ឋសភា។

លោករដ្ឋមន្រ្តីបានលើកឡើងថា ការដាក់ចេញរដ្ឋបាលឌីជីថល បាននិងកំពុងរួមចំណែក ដល់ការអភិវឌ្ឍសេដ្ឋកិច្ច ការ​កែ​លម្អសេវាសាធារណៈ និងការដោះស្រាយបញ្ហាបរិស្ថាន អនុលោមតាមយុទ្ធសាស្រ្តចក្រវិស័យបរិស្ថាន មាន​មុំ​យុទ្ធ​សាស្រ្តស្នូល៣ គឺ រដ្ឋបាល បច្ចេកវិទ្យា និងផ្សព្វផ្សាយ ដែលជំរុញឱ្យកម្ពុជាមានភាពស្អាត បៃតង និងចីរភាព និង​ឆ្លើយ​តបនឹងគោលដៅយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាលកម្ពុជា។

លោកបញ្ជាក់ថា៖«ការជំរុញការធ្វើបរិវត្តកម្មឌីជីថល នៅគ្រប់វិស័យរបស់ក្រសួងបរិស្ថាននេះ គឺផ្តើម​ចេញ​ពីម​នុស្ស​ទៅឌីជីថល ហើយឌីជីថលនឹងបង្កើនប្រសិទ្ធភាពការងាររបស់ក្រសួង ដោយសម្រួលការគ្រប់គ្រងឯកសារ និង​លំហូរ​ការងារ, ធានាបានតម្លាភាព និងគណនេយ្យភាព ដោយកាត់បន្ថយនីតិវិធីស្មុគស្មាញ និង​កត់​ត្រា​រាល់សកម្មភាព, ជួយ​បង្កើនប្រសិទ្ធភាពក្នុងការគ្រប់គ្រងទិន្នន័យ និងជាមជ្ឈមណ្ឌលកណ្តាល រួមទាំងការបង្កើត​បរិយាកា​សកា​រងារ​បែប​ឌី​ជី​ថល ឆ្ពោះទៅរកស្ថាប័នទំនើប»។

ពិធីប្រកាសដាក់ឱ្យប្រើប្រាស់កម្មវិធីរដ្ឋបាលឌីជីថលនេះ បានប្រព្រឹត្តទៅជាមួយនឹងពិធី​ចុះ​អនុស្សរណៈ​យោគយល់​គ្នា​រវាងក្រសួងបរិស្ថាន និងអង្គការពិព័រណ៍វិទ្យាសាស្រ្តកម្ពុជា STEM Cambodia លើការរៀបចំ និងដាក់ឱ្យប្រើកម្មវិធី CHAKRA STEM APP។ ក្នុងនោះក្រសួងបរិស្ថានតំណាងដោយលោកម៉ៅ សុវេង អនុរដ្ឋលេខាធិការក្រសួងបរិស្ថាន និងលោកស្រីអ៊ាង និធិជ្ជនី ដឺណេ (Nithijounie Dene Eang )នាយិកាប្រតិបត្តិនៃអង្គការ STEM Cambodia។

លោកស្រីអ៊ាង និធិជ្ជនី ដឺណេ បានឱ្យដឹងថា អង្គការSTEM បានបង្កើតឡើងអស់រយៈពេល១៨ឆ្នាំកន្លងមកហើយ ដែល​ផ្តោតលើសសរស្តម្ភសំខាន់៤។ ក្នុងនោះរួមមាន៖ បច្ចេកវិទ្យា, វិស្វកម្ម, វិទ្យាសាស្ត្រ និង គណិតវិទ្យា។

យ៉ាងណាមិញ ការអភិវឌ្ឍផ្នែកបច្ចេកវិទ្យា ជួយដល់វិស័យបរិស្ថាន គឺជាសកម្មភាពអាទិភាពរបស់STEM តាមរយៈ​ការ​បង្កើតកម្មវិធី CHAKRA STEM APP ។

លោកស្រីបញ្ជាក់ថា៖«កិច្ចសហប្រតិបត្តិការនាពេលនេះ ពិតជាមានអត្ថន័យយ៉ាងធំធេងក្នុងការជំរុញការអនុវត្ត «ភាព​ស្អាត» «ភាពបៃតង» និង «ចីរភាព» ស្របតាមយុទ្ធសាស្រ្តចក្រាវិស័យបរិស្ថាន ជាពិសេសក្នុងការបង្កើន ភាព​បៃតង​របស់ភពផែនដី និងជាការប្តេជ្ញាចិត្តរួមគ្នា ក្នុងដំណើរផ្លូវឆ្ពោះ ទៅអនាគតរបស់អ្នកជំនាន់ក្រោយ។ កម្មវិធី CHAKRA STEM APP នឹងជួយសម្រួលនិងផ្តល់ភាពងាយស្រួល ដល់ការតាមដាននិងជំរុញការគ្រប់គ្រងធនធានធម្មជាតិ និង​បរិ​ស្ថាន​ប្រកបដោយប្រសិទ្ធភាព»។

លោករដ្ឋមន្ត្រី ក៏បានថ្លែងអំណរគុណអង្គការ STEM Cambodia ដែលបានសហការនិងរួមចំណែកធ្វើឱ្យកម្ពុជាស្អាត មាន​ភាពបៃតង ដោយចីរភាព តាមរយៈបេសកកម្ម ៣ចម្បង។ ក្នុងនោះរួមមាន​ បណ្តុះ​គំនិត​សាធារ​ណៈនិ​ង​យុវ​ជ​នជំ​នាន់​ក្រោយ​ឱ្យ​ស្រឡាញ់បរិស្ថាន។​ ក្រៅពីនោះ កម្មវិធី Chakra STEM App ដែលបង្កើតឡើងដោយកូនខ្មែរ គឺសម្រាប់​កំ​ណត់​​ចំណាំទីតាំងដាំកូនឈើ និងតាមដានការលូតលាស់របស់ដើមឈើ ដែលជាការរួមចំណែកកាត់ បន្ថយឧស្ម័ន កា​បូនិកឈានឆ្ពោះទៅប្រទេស អាព្យាក្រឹតកាបូន។

បេសកកម្មចុងក្រោយ គឺការជំរុញដល់ការងារគ្រប់គ្រង និងទុកដាក់សំរាមឱ្យបានត្រឹមត្រូវប្រកបដោយប្រសិទ្ធភាព និង​ការច្នៃប្រឌិតខ្ពស់៕