លោក ណារិន្ទ ទាមទារឱ្យអ្នកសារព័ត៌មានអនឡាញនោះកែតម្រូវ និងសុំទោសចំពោះការផ្សព្វផ្សាយខុស ដែលប្រាសចាកពីកិច្ចខិតខំប្រឹងប្រែងរបស់អាជ្ញាធរ និងអង្គភាពការពារកុមារ (CPU) ដែលរកឃើញថា ករណីនេះពាក់ព័ន្ធជនល្មើស ៣នាក់។
ភ្នំពេញ៖ អ្នកនាំពាក្យក្រសួងព័ត៌មាន លោក ទេព អស្នារិទ្ធ បានលើកឡើងពីការផ្សព្វផ្សាយព័ត៌មានខុសពីការពិតអំពីហេតុការណ៍រំលោភ និងឃាតកម្មលើកុមារីវ័យ១៥ឆ្នាំថា អ្នកសារព័ត៌មាន ជាពិសេសការផ្សាយផ្ទាល់តាមអនឡាញ (ហ្វេសប៊ុក) ត្រូវត្រួតពិនិត្យ និងធ្វើឱ្យតុល្យភាពនៃព័ត៌មាន។
លោកបានថ្លែងថា ការផលិតព័ត៌មានមួយត្រូវឆ្លងកាត់ការសម្រិតសម្រាងតាំងពីការអង្គុយសរសេរ និងរត់រកប្រភពផ្សេងៗទៀតដើម្បីធានាថា ព័ត៌មាននេះផ្ដល់នូវយុត្ដិធម៌ បើសិនជារឿងនេះពាក់ព័ន្ធការស្វែងរកយុត្ដិធម៌។
លោក អស្នារិទ្ធ បានប្រាប់ភ្នំពេញប៉ុស្ដិ៍ពីអ្នកសារព័ត៌មានដកស្រង់ប្រភពដែលអះអាងថាជាសាច់ញាតិជនរងគ្រោះថា៖ «ការចូលរួមរបស់យើង វាមានកម្រិតទៅតាមហ្នឹង។ បើសិនយើងផ្ដល់ឱ្យព័ត៌មានស្ទើរ វានឹងផ្ដល់ផលស្ទើរ ឬបង្កបញ្ហាផ្សេង ដូចជា ករណីនេះ ដែលធ្វើឱ្យមានលទ្ធផលនៃការផ្សព្វផ្សាយខុសគ្នា»។
.jpg)
លោកបានបញ្ជាក់ថា៖ «យើងចាំបាច់ណាស់ ដែលត្រូវផ្ទៀងផ្ទាត់ជាមួយអាជ្ញាធរពាក់ព័ន្ធ ជាពិសេស សមត្ថកិច្ចអនុវត្ដការងារនេះ ដោយមិនអាចរំលងពួកគាត់បានទេ។ បើសិនជាគាត់ទាក់ទងទៅស្នងការតែបន្ដិច រឿងនេះត្រូវបានបញ្ជាក់ច្បាស់បាត់»។
លោក អស្នារិទ្ធ បានពន្យល់ថា សាច់ញាតិគ្រួសារត្រូវផ្ដល់ទឡ្ហីករណ៍ដែរ បើសិនជាអាជ្ញាធររកឃើញ គាត់មានរបាយការណ៍ដែលកើតចេញពីលទ្ធផលការស្រាវជ្រាវពាក់ព័ន្ធករណីមនុស្សឃាតនេះ ពីព្រោះអាជ្ញាធរបានធ្វើការពេញលេញជាងការទៅរកព័ត៌មាន ដែលមិនបានជួបភាគីផ្សេងៗទៀត។
កាលពីថ្ងៃទី២១ ខែឧសភា លោក ជួន ណារិន្ទ អគ្គស្នងការរង ស្នងការនគរបាលរាជធានីភ្នំពេញ បានសរសេរនៅលើបណ្ដាញសង្គមរបស់លោកថា ការផ្សព្វផ្សាយរបស់សារព័ត៌មានអនឡាញមួយដែលអំពើរំលោភផ្លូវភេទ និងសម្លាប់លើកុមារីអាយុ ១៥ឆ្នាំ បានកើតឡើងដោយអំពើរំលោភបូកដែលជនល្មើស ៨នាក់។
លោក ណារិន្ទ ទាមទារឱ្យអ្នកសារព័ត៌មានអនឡាញនោះកែតម្រូវ និងសុំទោសចំពោះការផ្សព្វផ្សាយខុស ដែលប្រាកច្រាកពីកិច្ចខិតខំប្រឹងប្រែងរបស់អាជ្ញាធរ និងអង្គភាពការពារកុមារ (CPU) ដែលរកឃើញថា ករណីនេះពាក់ព័ន្ធជនល្មើស ៣នាក់។
សារទាមទារកែតម្រូវ និងសុំទោសនេះ បាននាំឱ្យអ្នកសារព័ត៌មានចេញមុខមកសុំទោសជាសាធារណៈ ដោយមានការផ្សព្វផ្សាយលើបណ្ដាញសង្គមស្នងការដ្ឋាននគរបាលរាជធានីភ្នំពេញថែមទៀតផង។
