លោក ហ៊ុន ម៉ាណែត ជួបពិភាក្សាជាមួយនាយករដ្ឋមន្ត្រីចិន លោក Li Qiang។ STPM
កម្ពុជា-ចិន បានសន្យានឹងជំរុញវិស័យទេសចរណ៍ជាមួយគ្នាតាមរយៈការផ្សព្វផ្សាយពីសក្តានុពលនៃវិស័យទេសចរណ៍ ព្រមទាំងការពង្រីកការតភ្ជាប់ជើងហោះហើរត្រង់រវាងកម្ពុជា-ចិនឱ្យកាន់តែច្រើនថែមទៀត ខណៈរយៈពេល ៤ខែ ដើមឆ្នាំ២០២៥ ភ្ញៀវជនជាតិចិនចូលមកកម្ពុជាមានចំនួនជាង ៣៨ម៉ឺននាក់។
ការប្តេជ្ញានេះត្រូវបានធ្វើឡើងក្នុងឱកាសនៃជំនួបពិភាក្សារវាងលោក ហ៊ុន ម៉ាណែត នាយករដ្ឋមន្ត្រីកម្ពុជា ជាមួយលោក Li Qiang នាយករដ្ឋមន្ត្រីនៃសាធារណរដ្ឋប្រជាមានិតចិន នាព្រឹកថ្ងៃទី២៧ ខែឧសភា ឆ្នាំ២០២៥ ក្នុងឱកាសចូលរួមកិច្ចប្រជុំកំពូលអាស៊ានលើកទី ៤៦ និងកិច្ចប្រជុំកំពូលពាក់ព័ន្ធនៅទីក្រុងគូឡាឡាំពួ ប្រទេសម៉ាឡេស៊ី។
ក្នុងជំនួបនេះលោកនាយករដ្ឋមន្ត្រីចិន លោក Li Qiang បានសម្តែងនូវក្តីសោមនស្សរីករាយដែលបានជួបពិភាក្សាការងារជាមួយលោក ហ៊ុន ម៉ាណែត សារថ្មីម្តងទៀតជាមួយនឹងទំនាក់ទំនងទ្វេភាគីបានបន្តរីកចម្រើនជាបន្តបន្ទាប់ ខណៈទំនាក់ទំនងប្រទេសទាំងពីរក៏ត្រូវបានដំឡើងកម្រិតដល់ «ការកសាងសហគមន៍វាសនារួមកម្ពុជា-ចិន គ្រប់រដូវកាលក្នុងយុគសម័យថ្មី»។
.jpg)
តាមរយៈជំនួបខាងលើ ភាគីទាំង ២ បានឯកភាពជំរុញកិច្ចសហប្រតិបត្តិការលើវិស័យសំខាន់ៗរួមមាន សេដ្ឋកិច្ច, ពាណិជ្ជកម្ម, ការវិនិយោគ, ការពារជាតិ និងសន្តិសុខ, អប់រំ, បច្ចេកវិទ្យា, ឧស្សាហកម្ម និងកសិកម្មតាមរយៈការជំរុញកិច្ចសហប្រតិបត្តិការ «ច្រករបៀងអភិវឌ្ឍន៍ឧស្សាហកម្ម» និង «ច្រករបៀងមច្ឆានិងអង្ករ»។
បន្ថែមលើនេះ ថ្នាក់ដឹកនាំទាំង ២ ក៏បានឯកភាពជំរុញបន្ថែមទៀតនូវការផ្លាស់ប្តូររវាងប្រជាជន និងប្រជាជន ការជំរុញវិស័យទេសចរណ៍ និងពង្រីកការតភ្ជាប់ជើងហោះហើរត្រង់រវាងកម្ពុជា-ចិនឱ្យកាន់តែច្រើនថែមទៀត។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ភ្នំពេញប៉ុស្តិ៍ក្នុងថ្ងៃទី២៧ ខែឧសភា ថា សម្រាប់ស្ថានភាពភ្ញៀវទេសចរចិនដែលចូលមកប្រទេសកម្ពុជា គឺបានកើនឡើងគួរឱ្យកត់សម្គាល់ចាប់តាំងពីឆ្នាំ២០២៤ ជាពិសេសបន្ទាប់ពីដំណើរទស្សនកិច្ចរបស់ប្រធានាធិបតីចិន លោក ស៊ី ជីនពីង ដែលមកកម្ពុជាកាលពីខែមេសាកន្លងមក។
លោកបានថ្លែងថា៖«តាមរយៈកំណើនភ្ញៀវទេសចរចិនមកកម្ពុជានារយៈពេលចុងក្រោយនេះ ខ្ញុំមានជំនឿថាថ្នាក់ដឹកនាំចិន គឺមានឆន្ទះពិតប្រាកដក្នុងការជួយជំរុញភ្ញៀវទេសចររបស់ខ្លួនឱ្យធ្វើដំណើរមកកម្សាន្តនៅកម្ពុជាកាន់តែច្រើនបន្ថែមទៀត»។
ស្ថិតិក្រសួងទេសចរណ៍ ឱ្យដឹងថា ក្នុងឆ្នាំ២០២៤ កម្ពុជាទទួលបានភ្ញៀវបរទេសសរុប ៦,៧លាននាក់ កើនឡើងប្រមាណ ២៣ ភាគរយបើធៀបនឹងឆ្នាំ២០២៣ ក្នុងនោះភ្ញៀវជនជាតិចិនមានប្រមាណ ៨៥ ម៉ឺននាក់ កើនឡើង ៥៥ភាគរយ។ សម្រាប់រយៈពេល ៤ខែ ដើមឆ្នាំ២០២៥ កម្ពុជាទទួលបានភ្ញៀវបរទេសប្រមាណ ២,៤ លាននាក់ កើនជិត ១៤ភាគរយ ក្នុងនោះភ្ញៀវជនជាតិចិនមានជាង ៣៨ម៉ឺននាក់ កើនឡើងជិត ៤៩ភាគរយ៕
