ភ្ញៀវទសចរអន្តរជាតិថតរូបនៅប្រាសាទតាព្រហ្ម នៅខែឧសភា ២០២៥។ អាជ្ញាធរអប្សរា
អាជ្ញាធរជាតិអប្សរាបានឱ្យដឹងថា ក្នុងរយៈពេល ៣០ឆ្នាំ អាជ្ញាធរជាតិអប្សរា សម្រេចបាននូវសមិទ្ធផលសំខាន់ៗជាច្រើនក្នុងកិច្ចអភិរក្សប្រាសាទអង្គរ និងប្រាសាទនានានៅតំបន់អង្គរ ហើយគ្មានពេលណាមួយដែលអង្គរត្រូវបានបោះបង់ចោលនោះឡើយ។
នៅក្នុងសន្និសីទសារព័ត៌មានស្តីពី «សមិទ្ធផល និងភារកិច្ចរយៈពេល៣០ឆ្នាំ របស់អាជ្ញាធរជាតិអប្សរា» នៅលើទឹកដីសៀមរាបអង្គរ នៅថ្ងៃទី២៧ ឧសភា លោក ឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរា បានឱ្យដឹងថា សមិទ្ធផលដ៏ធំធេងក្នុងរយៈពេល៣០ឆ្នាំ ដែលអាជ្ញាធរជាតិអប្សរាសម្រេចបាន គឺការកិច្ចអភិរក្ស និងអភិវឌ្ឍនដោយចីរភាពរមណីយដ្ឋានប្រវត្តិសាស្រ្តអង្គរ។
លោកថា សមិទ្ធផលសំខាន់ៗទាំងនោះមានដូចជា កិច្ចការអភិរក្សប្រាសាទបុរាណ ការងារស្រាវជ្រាវផ្នែកបុរាណវិទ្យា និងបណ្តុះបណ្តាលធនធានមនុស្ស កិច្ចសហប្រតិបត្តិការជាមួយដៃគូ អន្តរជាតិសម្រាប់តំបន់អង្គរ ការងារអភិវឌ្ឍវិស័យទេសចរណ៍អង្គរ និងវប្បធម៌ ការងារគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ ការងារគ្រប់គ្រងដីធ្លីក្នុងឧទ្យាន និងបេតិកភណ្ឌក្រុង ការងារអភិវឌ្ឍភូមិធម្មជាតិរុនតាឯក និងកិច្ចគាំពារនិងអភិរក្សបុរាណដ្ឋានផ្សេងទៀតក្នុងខេត្តសៀមរាបជាដើម។
.jpg)
អគ្គនាយករងរូបនេះបានឱ្យដឹងបន្ថែមថា អង្គរមិនដែលត្រូវបានទុកចោលមួយពេលណានោះទេ ដោយប្រជាពលរដ្ឋក្នុងតំបន់ ក៏ដូចជាអាជ្ញាធរជាតិអប្សរា បានខំប្រឹងប្រែងថែរក្សាប្រាសាទមរតកដូនតាដ៏អស្ចារ្យមួយនេះ។
លោកឡុង កុសល៖ «គ្មានពេលណាមួយ ដែលអង្គរត្រូវបានបោះបង់ចោលក្នុងបេះដូងខ្មែរទេ អង្គរត្រូវបានទទួលការថែរក្សាគ្រប់ៗជំនាន់»។
បង្កើតឡើងជាផ្លូវការក្នុងឆ្នាំ១៩៩៥ អាជ្ញាធរជាតិអប្សរា បានដើរតួនាទីយ៉ាងសំខាន់ក្នុងការគ្រប់គ្រង ការពារ និងអភិរក្សរមណីយដ្ឋានអង្គរ អស់រយៈពេលជាច្រើនឆ្នាំមកនេះ។ ភាពល្បីល្បាញនៃរមណីយដ្ឋានអង្គរបានទាក់ទាញភ្ញៀវទេសចរជាតិ និងអន្តរជាតិរាប់លាននាក់មកទស្សនារមណីយដ្ឋានបេតិកភណ្ឌពិភពលោកដ៏ល្បីល្បាញនេះជារៀងរាល់ឆ្នាំ៕
