ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto ថ្លែងនៅក្នុងសន្និសីទសារព័ត៌មានដែលធ្វើឡើងនៅស្ថានទូតឥណ្ឌូនេស៊ីនៅថ្ងៃនេះ។ រូបថត ហុង រស្មី
ភ្នំពេញ៖ ស្ថានទូតឥណ្ឌូនេស៊ីប្រចាំនៅទីក្រុងភ្នំពេញបានប្រកាសជាផ្លូវការនូវ សួស្ដីឥណ្ឌូនេស៊ី ២០២៥ ជាព្រឹត្តិការណ៍ប្រចាំឆ្នាំដ៏ធំដែលលើកកម្ពស់ពាណិជ្ជកម្ម វប្បធម៌ និងការអប់រំរបស់ប្រទេសឥណ្ឌូនេស៊ីនៅកម្ពុជា។
គ្រោងរៀបចំឡើងនៅថ្ងៃទី ១៤-១៥ ខែមិថុនា ឆ្នាំ ២០២៥ នៅមជ្ឈមណ្ឌលពិព័រណ៍ និងសន្និបាតកោះពេជ្រ ពិព័រណ៍សួស្ដីឥណ្ឌូនេស៊ី ២០២៥ នឹងម្ចាស់អាជីវកម្មចំនួន ៥៣ ដោយមានក្រុមហ៊ុនពីឥណ្ឌូនេស៊ីចំនួន ២៩ រួមជាមួយក្រុមហ៊ុនកម្ពុជាចំនួន ២៤ ដែលបង្ហាញពីវិសាលគមនៃផលិតផល និងសេវាកម្មជាច្រើន។
ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto ថ្លែងនៅក្នុងសន្និសីទសារព័ត៌មានដែលធ្វើឡើងនៅស្ថានទូតឥណ្ឌូនេស៊ីនៅថ្ងៃនេះ បានលើកឡើងពីតួនាទីសំខាន់របស់ព្រឹត្តិការណ៍នេះ ក្នុងការធ្វើឱ្យស៊ីជម្រៅនូវទំនាក់ទំនងសេដ្ឋកិច្ច និងវប្បធម៌ដ៏រឹងមាំរួចទៅហើយរវាងឥណ្ឌូនេស៊ី និងកម្ពុជា។
.jpg)
លោកបានថ្លែងថា៖ «កិច្ចសហប្រតិបត្តិការសេដ្ឋកិច្ច និងវប្បធម៌កាន់តែមានឥទ្ធិពលសម្រាប់ប្រទេសទាំងពីរ ដោយទំហំពាណិជ្ជកម្មកាលពីឆ្នាំមុនដែលបានកើនឡើងលើសពី ១ ពាន់លានដុល្លារសម្រាប់រយៈពេលពីរឆ្នាំជាប់ៗគ្នា»។
សួស្ដីឥណ្ឌូនេស៊ី ២០២៥ មានបំណងកសាងភាពជោគជ័យនៃព្រឹត្តិការណ៍កាលពីឆ្នាំមុន ដែលបានទាក់ទាញអ្នកទស្សនាជាង ៤ពាន់នាក់ និងបានកត់ត្រាប្រតិបត្តិការលក់រាយដែលមានតម្លៃជាង ៤២៧០០ ដុល្លារ ជាមួយនឹងកិច្ចព្រមព្រៀងអាជីវកម្មដែលមានសក្តានុពលលើសពី ២ លានដុល្លារ។
ពិព័រណ៍សួស្ដីឥណ្ឌូនេស៊ី ២០២៥ នឹងម្ចាស់អាជីវកម្មចំនួន ៥៣ ដោយមានក្រុមហ៊ុនពីឥណ្ឌូនេស៊ីចំនួន ២៩ រួមជាមួយក្រុមហ៊ុនកម្ពុជាចំនួន ២៤ ដែលបង្ហាញពីវិសាលគមនៃផលិតផល និងសេវាកម្មជាច្រើន។ រូបថត ហុង រស្មី
កម្មវិធីនៅឆ្នាំនេះសន្យាថានឹងទទួលបាននូវបទពិសោធន៍ដ៏សម្បូរបែប ដោយរួមបញ្ចូលការផ្សព្វផ្សាយពាណិជ្ជកម្មជាមួយវិស័យទេសចរណ៍ ការអប់រំ និងការប្រារព្ធពិធីវប្បធម៌។
អ្នកទស្សនានឹងរីករាយជាមួយការតាំងពិព័រណ៍ដ៏ដែលបង្ហាញពីផលិតផលពីវិស័យ ដូចជា ម៉ូដ និងសម្ភារៈប្រើប្រាស់ អាហារ និងភេសជ្ជៈ គ្រឿងសង្ហារឹម គ្រឿងប្រើប្រាស់ក្នុងផ្ទះ ឱសថ និងការថែទាំផ្ទាល់ខ្លួន។
លើសពីនេះ សាកលវិទ្យាល័យដ៏មានកិត្យានុភាពរបស់ឥណ្ឌូនេស៊ីចំនួនប្រាំមួយនឹងចូលរួមក្នុងពិព័រណ៍អប់រំដើម្បីផ្តល់ឱកាសដល់និស្សិតកម្ពុជាទៅសិក្សានៅប្រទេសឥណ្ឌូនេស៊ី។
លោក Santo បានបន្ដថា៖ «សម្រាប់អ្នកទស្សនា សួស្ដីឥណ្ឌូនេស៊ី ផ្តល់ជូននូវការតាំងពិពណ៌ ពិតណាស់ ផលិតផលអាចទិញដោយផ្ទាល់ ឬផលិតផលក៏អាចភ្លក់ដោយផ្ទាល់ផងដែរ»។
លោកបានបន្ដថា៖ «នៅមានការផ្សព្វផ្សាយទេសចរណ៍ នឹងមានពិព័រណ៍អប់រំ និងកម្មវិធីជជែកដេញដោល ហើយជាការពិតណាស់ ការសម្តែងបែបវប្បធម៌ រួមទាំងការបង្ហាញម៉ូដ អាហាររបស់ពួកគេដល់ប្រជាជន និងដើម្បីឱ្យមានការចូលរួមយ៉ាងខ្លាំងនៅក្នុងនោះ»។
ការសម្តែងវប្បធម៌ ការបង្ហាញម៉ូដ និងពិធីបុណ្យធ្វើម្ហូបនឹងធ្វើឱ្យព្រឹត្តិការណ៍នេះកាន់តែមានភាពរស់រវើក ដោយអបអរសាទរនូវបេតិកភណ្ឌ និងការច្នៃប្រឌិតដ៏សម្បូរបែបរបស់ប្រទេសឥណ្ឌូនេស៊ី។
លោកឯកអគ្គរដ្ឋទូត Santo ក៏បានសម្តែងការដឹងគុណចំពោះដៃគូសំខាន់ៗដែលបានធ្វើឱ្យព្រឹត្តិការណ៍នេះអាចធ្វើទៅបាន។ ការគាំទ្រពីក្រសួងពាណិជ្ជកម្មរបស់កម្ពុជា និងក្រសួងការបរទេស និងសហប្រតិបត្តិការអន្តរជាតិ ក៏ត្រូវបានទទួលស្គាល់ថាមានសារៈសំខាន់ចំពោះព្រឹត្តិការណ៍នេះផងដែរ។
លោកឯកអគ្គរដ្ឋទូតបានបន្ដថា៖ «សួស្ដីឥណ្ឌូនេស៊ី ២០២៥ ស្វាគមន៍មហាជនទាំងអស់ដោយមិនគិតថ្លៃ។ ខ្ញុំសូមអញ្ជើញប្រជាជនកម្ពុជាទាំងអស់មកទទួលយកបទពិសោធន៍នៃការផ្តល់ជូនដ៏គួរឱ្យរំភើបនៃព្រឹត្តិការណ៍នេះ»៕
