ទាហានខ្មែរត្រូវបានគេឃើញ ចាកចេញពីបន្ទាយដើម្បីធ្វើដំណើរទៅកាន់តំបន់ព្រំដែននៅខេត្តព្រះវិហារ ក្រោយពេលទាហានការពារព្រំដែនកម្ពុជា និងថៃ បានប៉ះទង្គិចគ្នាមួយប្រាវ នៅចំណុចភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ដែលបណ្ដាលឲ្យទាហានខ្មែរម្នាក់បានបាត់បង់ជីវិត។
ការចាកចេញទៅព្រំដែននេះមានរួមទាំងលោក ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរៈភូមិន្ទ និងជាមេបញ្ជាការដ្ឋានកងអង្គរក្ស និងទាហាននៅខេត្តសៀមរាបមួយចំនួន។
ការប៉ះទង្គិចនាព្រឹកមិញនេះ ធ្វើឲ្យពលរដ្ឋខ្មែររង់ចាំការបំភ្លឺពីក្រសួងការពារជាតិ អំពីការចោទប្រកាន់នានាពីភាគីថៃ ដូចជាថា ការប៉ះទង្គិចនេះបង្កឡើងដោយភាគីកម្ពុជាជាដើម។
.jpg)
ទើបតែនៅរសៀលថ្ងៃនេះ ក្រសួងការពារជាតិ បានចេញសេចក្ដីប្រកាសព័ត៌មានដែលបញ្ជាក់ថា ការប៉ះទង្គិចរវាងកងទ័ពកម្ពុជា និងកងទ័ពថៃ ដែលបានកើតឡើងនៅព្រឹកថ្ងៃទី២៨ ខែឧសភា នេះ កើតឡើង«ដោយកងទ័ពថៃបានធ្វើការបាញ់ប្រហារមុនមកលើលេណដ្ឋាន ដែលជាទីតាំងឈរជើងរបស់កងទ័ពកម្ពុជា ជាយូរលង់ណាស់មកហើយ បណ្តាលឱ្យបាត់បង់ជីវិតកងទ័ពយើងម្នាក់»។
ក្រសួងការពារជាតិបញ្ជាក់ថា៖ «ការប៉ះទង្គិចគ្នានេះមិនមែនជាជម្រើសដែលកម្ពុជាចង់បាននោះទេ ហើយយើងនឹងបន្តពិភាក្សាជាមួយក្រសួងការពារជាតិថៃ ដើម្បីស្វែងរកដំណោះស្រាយរួមមួយ ក្នុងការធ្វើឱ្យស្ថានភាពវិលត្រឡប់ទៅដូចដើមវិញឱ្យបានឆាប់រហ័ស និងបង្ការកុំឱ្យស្ថានភាពនេះកើតឡើងសាជាថ្មីម្តងទៀត»។
ក្រសួងការពារជាតិបញ្ជាក់ថា កម្ពុជាប្រកាន់ខ្ជាប់នូវមធ្យោបាយការទូត និងការដោះស្រាយបញ្ហាដោយសន្តិវិធី ព្រមទាំងការរក្សាព្រំដែនរបស់ខ្លួនជាមួយប្រទេសជិតខាងជាព្រំដែនសន្តិភាព ស្ថេរភាព ការអភិវឌ្ឍន៍ និងកិច្ចសហប្រតិបត្តិការដែលផ្តល់ប្រយោជន៍ឱ្យ គ្នាទៅវិញទៅមក។ កម្ពុជាប្តេជ្ញាចិត្តក្នុងការការពារបូរណភាពទឹកដីទោះក្នុងតម្លៃណាក៏ដោយ»។
យោងតាមការចុះផ្សាយរបស់សារព័ត៌មាន ទាហានខ្មែរដែលបាត់បង់ជីវិត មានឈ្មោះថា សួន រោន អាយុ ៤៨ឆ្នាំ មានទីលំនៅនៅភូមិកំពេញ ឃុំយាង ស្រុកជាំក្សាន្ត ខេត្តព្រះវិហារ៕
