ថ្នាក់ដឹកនាំនៃរដ្ឋលេខាធិការដ្ឋានអាកាសចរណ៍ស៊ីវិល និងអ្នកពាក់ព័ន្ធ ពិនិត្យមើលក្រុមការងារបច្ចេកទេសក្នុងគម្រោងអាកាសយានដ្ឋានអន្តរជាតិតេជោ។ SSCA
ដំណើរការសាងសង់អាកាសយានដ្ឋានអន្តរជាតិតេជោ(TIA) ដំណាក់កាលទី១ កំពុងស្ថិតក្នុងដំណាក់កាលត្រួតពិនិត្យ និងវាយតម្លៃលើផ្នែកបច្ចេកទេសលើកចុងក្រោយ ដោយគ្រោងបើកដំណើរការ(មិនទាន់បើកសម្ពោធជាផ្លូវការ)នៅក្នុងសប្តាហ៍ទី២ នៃខែកក្កដា ខាងមុខជាមួយនឹងសមត្ថភាពអាចទទួលបានភ្ញៀវទេសចរបានប្រមាណ ១៥ លាននាក់ក្នុង ១ឆ្នាំ។
គម្រោងវិនិយោគលើអាកាសយានដ្ឋានអន្តរជាតិតេជោ បានបើកការដ្ឋានសាងសង់កាលពីថ្ងៃទី៧ ខែមករា ឆ្នាំ២០២០ ដោយមានទុនវិនិយោគប្រមាណ ១,៥ពាន់លានដុល្លារ(មិនគិតបញ្ចូលតម្លៃដី) ដែលជាការវិនិយោគរវាងរដ្ឋ និងឯកជន ដោយក្រុមហ៊ុនឯកជន OCIC មានភាគហ៊ុន ៩០ ភាគរយ និងរដ្ឋលេខាធិការដ្ឋានអាកាសចរណ៍ស៊ីវិល(SSCA) ១០ ភាគរយ។ អាកាសយានដ្ឋានអន្តរជាតិតេជោ គឺជាអាកាសយានដ្ឋាន Greenfield ដែលមានផ្ទៃដីសរុប ២ ៦០០ហិកតា ស្ថិតនៅចម្ងាយ ១៩គីឡូម៉ែត្រភាគខាងត្បូងរាជធានីភ្នំពេញ។
អាកាសយានដ្ឋានអន្តរជាតិខ្នាតធំលំដាប់ 4F នេះអាចអនុញ្ញាតឱ្យយន្តហោះប្រភេទធុនធំៗដូចជា Airbus A380-800 និង យន្តហោះ Boeing 747-800 ចុះចតបាន។ អាកាសយានដ្ឋាននេះរចនាឡើងជា ៣ ដំណាក់កាល ដោយដំណាក់កាល១ ពីឆ្នាំ២០២០ ដល់២០៣០ អាចទទួលភ្ញៀវបានចំនួន ១៥ លាននាក់, ដំណាក់កាលទី ២ ឆ្នាំ២០៣០ ដល់ឆ្នាំ២០៥០ ទទួលភ្ញៀវបាន ៣០ លាននាក់ និងដំណាក់កាលពី ៣ ចាប់ពីឆ្នាំ២០៥០ អាចទទួលភ្ញៀវបាន ៤៥ លាននាក់។
.jpg)
រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានប្រាប់ភ្នំពេញប៉ុស្តិ៍នាព្រឹកថ្ងៃទី៥ ខែឧសភាថា ដំណាក់កាលទី១ នៃដំណើរការសាងសង់ និងការត្រួតពិនិត្យផ្នែកបច្ចេកទេសផ្សេងៗក្នុងគម្រោងសាងសង់អាកាសយានដ្ឋានអន្តរជាតិតេជោ បានឈានដល់ដំណាក់កាលចុងក្រោយដែលអាចនឹងត្រូវបញ្ចប់រួចរាល់ក្នុងពេលឆាប់ៗ។ ជារួមគិតត្រឹមថ្ងៃទី២៨ ខែមេសា ឆ្នាំ២០២៥ គឺអ្វីៗសម្រេចបានប្រមាណ ៩៦ភាគរយ។ បើគ្មានអ្វីប្រែប្រួលទេ អាកាសយានដ្ឋានអន្តរជាតិតេជោនឹងបើកដាក់ឱ្យដំណើរការអាជីវកម្ម(មិនទាន់បើកសម្ពោធជាផ្លូវការ) នៅក្នុងសប្តាហ៍ទី២ នៃខែកក្កដា ខាងមុខ ដើម្បីទទួលស្វាគមន៍ភ្ញៀវទេសចរជាតិ និងអន្តរជាតិ។
លោកបានបន្ថែមថា កាលពីថ្ងៃទី២ ខែឧសភា រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល លោក ម៉ៅ ហាវណ្ណាល់ ក៏បានដឹកនាំកិច្ចប្រជុំគណៈកម្មការដឹកនាំ គ្រប់គ្រង និងសម្របសម្រួលដោះស្រាយការងាររៀបចំប្រតិបត្តិការអាកាសយានដ្ឋានអន្តរជាតិតេជោផងដែរ ដោយមានការចូលរួមពីថ្នាក់ដឹកនាំ និងក្រុមការងារបច្ចេកទេសនៃរដ្ឋលេខាធិការដ្ឋានអាកាសចរណ៍ស៊ីវិល ក៏ដូចជាថ្នាក់ដឹកនាំ និងសមាជិកគណៈកម្មការដឹកនាំ គ្រប់គ្រង និងសម្របសម្រួលដោះស្រាយការងាររៀបចំប្រតិបត្តិការ អាកាសយានដ្ឋានអន្តរជាតិតេជោ និងមន្ត្រីបច្ចេកទេសបុគ្គលិកពាក់ព័ន្ធជាច្រើនរូប។ កិច្ចប្រជុំនេះ គឺដើម្បីពិនិត្យលើវឌ្ឍនភាពនៃការសាងសង់អាកាសយានដ្ឋានអន្តរជាតិតេជោ និងការពិនិត្យបញ្ហាបច្ចេកទេសសំខាន់ៗមួយចំនួន ដើម្បីឈានទៅការបើកដំណើរការប្រតិបត្តិការអាកាសយានដ្ឋានអន្តរជាតិតេជោ។
លោកបានថ្លែងថា៖«បើគ្មានអ្វីប្រែប្រួល អាកាសយានដ្ឋានអន្តរជាតិតេជោនេះ នឹងដាក់ឱ្យដំណើរការនៅថ្ងៃទី១០ ខែកក្កដា ឆ្នាំ ២០២៥។ ដំណើរការសាងសង់បានឈានដល់ដំណាក់ការត្រួតពិនិត្យចុងក្រោយ ពោលគឺគណៈកម្មការត្រូវដឹកនាំ ពិនិត្យ វាយតម្លៃទៅលើភាពរួចរាល់នៃលក្ខខណ្ឌផ្ដល់វិញ្ញាបនបត្រ និងលក្ខខណ្ឌបើកប្រតិបត្តិការ ថាតើជាគោលការណ៍កំណត់យកថ្ងៃទី ១០ ខែកក្កដា អាចសម្រេចបានទៅរលូន ឬយ៉ាងណា?»។
លោកបានបន្ថែមថា៖«វឌ្ឍនភាពនៃការសាងសង់ស្ទើតែរួចរាល់ទាំងស្រុងទៅហើយ ប៉ុន្តែអ្វីដែលយើងនៅបន្តពិនិត្យតាមដាន គឺបញ្ហាពាក់ព័ន្ធទៅនឹងកិច្ចដំណើរការស្របទៅតាមភាពអនុលោមនៃលក្ខខណ្ឌបច្ចេកទេសក្នុងការផ្ដល់វិញ្ញាបនបត្រ និងលក្ខខណ្ឌបច្ចេកទេសនៃការដាក់ឱ្យប្រតិបត្តិការ»។
លោក ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC) ធ្លាប់បាននិយាយថា នៅពេលអាកាសយានដ្ឋានអន្តរជាតិតេជោចាប់ផ្ដើមដំណើរការ គឺរាល់ប្រតិបត្តិការនៅអាកាសយានដ្ឋានអន្តរជាតិភ្នំពេញនឹងត្រូវប្តូរទៅកាន់អាកាសយានដ្ឋានថ្មីទាំងអស់ ហើយទីតាំងអាកាសយានដ្ឋានអន្តរជាតិភ្នំពេញ នឹងត្រូវបិទដំណើរការ។
ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បានប្រាប់ភ្នំពេញប៉ុស្តិ៍ថា អាកាសយានដ្ឋានអន្តរជាតិតេជោ នឹងចូលរួមចំណែកជួយបង្កើនបរិយាកាសងាយស្រួល និងទាក់ទាញភ្ញៀវទេសចរ ព្រមទាំងអ្នកវិនិយោគបរទេសឱ្យចូលមកកម្ពុជាកាន់តែច្រើន។ អាកាសយានដ្ឋានថ្មី ប្រាកដជាអាចទាក់ទាញចរន្តនៃការធ្វើដំណើរតាមផ្លូវអាកាសកើនឡើង ហើយចំនួនយន្តហោះធំៗនឹងចុះចតកាន់តែច្រើនជាងមុន។ នៅពេលការដឹកជញ្ជូនមានកាន់តែច្រើន តម្លៃដឹកជញ្ជូនក៏នឹងចុះទាបជាមុនដែរ។
លោកលើកឡើងថា៖«ការហោះហើរត្រង់ពីគោលដៅប្រទេសឆា្ងយៗដែលប្រើប្រាស់យន្តហោះធំៗមកកម្ពុជានឹងមានចំនួនកាន់តែច្រើន ហើយវិស័យដឹកជញ្ជូនទំនិញ និងមនុស្សនឹងមានកាន់តែច្រើន»។
របាយការណ៍របស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ឱ្យដឹងថា វិស័យដឹកជញ្ជូនតាមផ្លូវអាកាសរបស់អាកាសយានដ្ឋានអន្តរជាតិទាំង ៣ នៅកម្ពុជា(អាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ) កាលពីឆ្នាំ ២០២៤ បានកើនឡើងគួរឱ្យកត់សម្គាល់ ដោយទទួលបានជើងហោះហើរចេញ-ចូល(ទ្វេទិស) សរុប ៥៨ ៣៥៤ កើនឡើង ១៤ ភាគរយបើធៀបនឹងឆ្នាំ ២០២៣ និងអ្នកដំណើរឆ្លងកាត់ចេញ-ចូល(ទ្វេទិស) មានចំនួន ៦ ២៤១ ៨៤២ នាក់ កើនឡើង ២២ ភាគរយ។ ចំណែកទំនិញដឹកជញ្ជូនតាមផ្លូវអាកាសចេញ-ចូល(ទ្វេទិស) មានចំនួន ៧៧ ៧៥២តោន កើនឡើង ៤០ ភាគរយ៕
