ថ្នាក់ដឹកនាំក្រសួងទេសចរណ៍ និងផ្នែកឯកជនក្នុងវិស័យទេសចរណ៍ថតរូបអនុស្សាវរីយ៍បន្ទាប់ពីកិច្ចប្រជុំ កាលពីថ្ងៃទី៧ ខែឧសភា។ ក្រសួងទេសចរណ៍
រដូវកាលបៃតង(Green Season) នៃវិស័យទេសចរណ៍កម្ពុជាបានចាប់ផ្ដើមពីខែមេសា និងបន្តរហូតដល់ខែតុលា ដែលជារដូវកាលមានភ្ញៀវទេសចរអន្តរជាតិតិច ដោយសារនៅតំបន់អឺរ៉ុបជាពេលមនុស្សភាគច្រើនត្រូវធ្វើការងារមមាញឹក និងការសិក្សាច្រើនដែលជាទូទៅគេហៅថា Low Season។
ដើម្បីជំរុញវិស័យទេសចរណ៍ក្នុងរដូវកាលបៃតងនេះ នាយករដ្ឋមន្ត្រីកម្ពុជា លោក ហ៊ុន ម៉ាណែត កាលពីខែកុម្ភៈ ឆ្នាំ២០២៥ បានប្រកាសគាំទ្រការដាក់ចេញនូវយុទ្ធនាការ«រដូវកាលបៃតង»ជំនួសឱ្យពាក្យរដូវកាលថយភ្ញៀវ(Low Season)នារដូវវស្សា។ គោលដៅនៃការកំណត់ឈ្មោះរដូវកាលបៃតង គឺតាមរយៈការផ្តល់ជូនអ្នកទេសចរនូវបទពិសោធទេសចរណ៍ដ៏សែនស្រស់ស្រាយ និងសម្រស់ដ៏ល្អឯករបស់ប្រទេសកម្ពុជានារដូវវស្សា ដែលជាទេសភាពពោរពេញដោយពណ៌បៃតង អាកាសធាតុត្រជាក់ និងមានបរិយាកាសស្រស់ស្រាយ។
រដ្ឋមន្ត្រីក្រសួងទេសចរណ៍ លោក ហួត ហាក់ កាលពីថ្ងៃទី៧ ខែឧសភា បានដឹកនាំកិច្ចប្រជុំក្រុមការងារជំរុញយុទ្ធនាការទេសចរណ៍ក្នុងរដូវកាលបៃតង ដោយលោកបានស្នើឱ្យវិស័យឯកជនត្រូវរួមគ្នាផ្សព្វផ្សាយ និងលើកកម្ពស់វិស័យទេសចរណ៍ តាមរយៈការបញ្ចុះតម្លៃស្នាក់នៅ ម្ហូបអាហារ ការពង្រឹងបដិសណ្ឋារកិច្ចឱ្យល្អ និងកក់ក្តៅ ជាពិសេសត្រូវរួមគ្នាបង្កើតព្រឹត្តិការណ៍ទេសចរណ៍នានានៅតាមបណ្តារាជធានីខេត្ត។
.jpg)
ក្នុងកិច្ចប្រជុំខាងលើលោករដ្ឋមន្ត្រីក៏បានស្នើឱ្យមានការចូលរួមពីសំណាក់ផ្នែកឯកជន និងបងប្អូនក្រុមអ្នកផលិតមាតិកាទេសចរណ៍កម្ពុជាផងដែរ។
លោកបានលើកឡើងទៀតថា ក្នុងរយៈពេល ៣ខែ ដើមឆ្នាំ២០២៥ នេះ ចំនួនភ្ញៀវទេសចរអន្តរជាតិដែលមកទស្សនាកម្ពុជា មានចំនួនជិត ២ លាននាក់ ពោលគឺកើនឡើងជាង ១៦ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៤។ ទាំងនេះបញ្ជាក់ឱ្យឃើញពីសក្តានុពលទេសចរណ៍ កត្តាសុខសន្តិភាព ស្ថិរភាពនយោបាយ និងសណ្តាប់ធ្នាប់សាធារណៈ ជាពិសេសបដិសណ្ឋារកិច្ចដ៏កក់ក្តៅ ជម្រើសការស្នាក់នៅ ម្ហូបអាហារដ៏មានឱជារស ការកម្សាន្តដ៏សម្បូរបែប ហេដ្ឋារចនាសម្ព័ន្ធមានការអភិវឌ្ឍ ដែលជំរុញឱ្យភ្ញៀវទេសចរជ្រើសរើសការមកទស្សនា និងកម្សាន្តនៅកម្ពុជាកាន់តែច្រើន។
លោកបានថ្លែងថា៖«ដើម្បីពង្រឹងគុណភាពការធ្វើបដិសណ្ឋារកិច្ចភ្ញៀវទេសចរជាតិ និងអន្តរជាតិក្នុងរដូវកាលបៃតង(Green Season)នេះ ខ្ញុំសូមស្នើផ្នែកឯកជនត្រូវរួមគ្នាបញ្ចុះតម្លៃស្នាក់នៅតាមសណ្ឋាគារ និងម្ហូបអាហារ ការពង្រឹងបដិសណ្ឋារកិច្ចឱ្យល្អ និងកក់ក្តៅ ជាពិសេសត្រូវរួមគ្នាបង្កើតព្រឹត្តិការណ៍ទេសចរណ៍នានានៅតាមបណ្តារាជធានីខេត្ត ដោយត្រូវរៀបចំជាលក្ខណៈយុទ្ធសាស្ត្រ និងប្រកបដោយភាពច្នៃប្រឌិត និងមានអត្តសញ្ញាណវប្បធម៌ខ្មែរ។ ការពង្រឹកកិច្ចសហការឱ្យកាន់តែសកម្ម និងផុសផុលពីបណ្តាភាគីពាក់ព័ន្ធទាំងអស់ គឺជាជវភាពនៃតួអង្គតែមួយដើម្បីរួមគ្នាសម្រេចឱ្យបាននូវកំណើនភ្ញៀវទេសចរបន្ថែមទៀតនាឆ្នាំ២០២៥ នេះ»។
ប្រធានសហព័ន្ធទេសចរណ៍កម្ពុជា លោក ឌិន សុមេធារិទ្ធ បានប្រាប់ភ្នំពេញប៉ុស្តិ៍ក្នុងថ្ងៃទី៨ ខែឧសភាថា រដូវកាលបៃតង គឺជាពេលដែលអាកាសធាតុនៅប្រទេសកម្ពុជាចាប់ផ្តើមល្អប្រសើរ ព្រោះសីតុណ្ហភាពមិនសូវក្តៅខ្លាំងដូចក្នុងអំឡុងខែមីនា-មេសា និងមានភ្លៀងធ្លាក់ផងដែរ។ សម្រាប់ភ្ញៀវបរទេស(តំបន់អឺរ៉ុប)គឺពួកគាត់មិនធ្វើដំណើរឆ្ងាយនោះទេនាអំឡុងពេលនេះ។ លោកបន្តថា ជាទូទៅរដូវកាលបៃតង គឺជាពេលដែលតម្លៃនៃការជួលស្នាក់នៅ និងជួលកន្លែងរៀបចំកម្មវិធីផ្សេងៗមានតម្លៃទាបជាងពេលធម្មតា ព្រោះមិនសូវមានភ្ញៀវមកពីក្រៅប្រទេស។
បើតាមលោក សុមេធារិទ្ធ ដោយសារ Green Season នៅកម្ពុជាចំពេលដែលភ្ញៀវអឺរ៉ុបមិនសូវធ្វើដំណើរឆ្ងាយ ដូច្នេះវិស័យទេសចរណ៍នៅកម្ពុជាអាចងាកទៅចាប់អារម្មណ៍ចំពោះភ្ញៀវនៅក្នុងតំបន់អាស៊ាន ក៏ដូចជា ប្រទេសចិន ជប៉ុន និងកូរ៉េ ជាដើម។ រដូវកាលបៃតងនៅកម្ពុជា ក៏អាចចាត់ទុកជារដូវកាលកសិ-ទេសចរណ៍ និងប្រមូលផលផ្លែឈើសម្រាប់បរិភោគផងដែរ ដូចជា ស្វាយ ក្រូច និងធុរ៉េន ជាដើម។
លោកបានថ្លែងថា៖«យើងសង្ឃឹមថាអ្វីៗនឹងកាន់តែប្រសើរ ប្រសិនបើយើងរៀបចំយុទ្ធសាស្រ្តបានត្រឹមត្រូវ ខណៈរដ្ឋមន្ត្រីក្រសួងទេសចរណ៍ក៏បានស្នើ និងលើកទឹកចិត្តឱ្យខិតខំផ្សព្វផ្សាយកាន់តែល្អ និងទូលំទូលាយ ដើម្បីឱ្យគេយល់ថាអ្វីទៅជា Green Season ហើយ Green Season នៅកម្ពុជាមានអ្វីពិសេសៗខ្លះសម្រាប់ទទួលភ្ញៀវ»។
ទោះយ៉ាងណាលោកក៏បានលើកឡើង ពីបញ្ហាហេដ្ឋារចនាសម្ព័ន្ធធ្វើដំណើរទៅតំបន់អេកូ-ទេសចរណ៍មួយចំនួននៅរដូវភ្លៀងធ្លាក់ផងដែរ៕
