លោក ទៀ សីហា(ស្ដាំ) រដ្ឋមន្ត្រីក្រសួងការពារជាតិ ចុះទៅប្រាសាទតាមាន់ កាលពីខែមីនា។ ទៀ សីហា
ក្រសួងការពារជាតិបញ្ជាក់ថា មិនមានការដកទ័ពពីប្រាសាទតាមាន់ ដែលប្រទេសថៃនិងកម្ពុជាចាត់ទុកជាបេតិកភណ្ឌរបស់ខ្លួនរៀងៗខ្លួននោះទេ គឺបន្តដាក់កម្លាំងពីភាគីម្ខាងៗចំនួន៥នាក់ដដែល។
សេចក្ដីប្រកាសព័ត៌មានរបស់ក្រសួងការពារជាតិនៅថ្ងៃទី៩ ខែឧសភា នេះបញ្ជាក់ថា រដ្ឋមន្ត្រីការពារជាតិកម្ពុជា និងរដ្ឋមន្ត្រីការពារជាតិថៃ បានឯកភាពគ្នាឈរលើស្មារតីមិត្តភាព ក្នុងការ រក្សាស្ថានភាពដើម ដោយរក្សាទីតាំងឈរជើងរបស់កងកម្លាំងរៀងខ្លួននៅទីតាំងដដែលតាមបណ្តោយព្រំដែន។
ក្រសួងអះអាងថា៖ «ក្នុងន័យនេះ ភាគីទាំងពីរនៅតែរក្សាការឈរជើងជាសហភាគីនៅប្រាសាទតាមាន់ ដោយភាគីម្ខាងៗរក្សាកង កម្លាំងចំនួនប្រាំនាក់»។
.jpg)
ក្រសួងការពារជាតិ លើកឡើងថា ការសម្រេចនេះធ្វើឡើង តាំងពីថ្ងៃទី១ ខែឧសភា នៅក្នុងកិច្ចប្រជុំ គណៈកម្មាធិការព្រំដែនទូទៅកម្ពុជា-ថៃ (GBC) លើកទី១៧ នៅរាជធានីបាងកក ព្រះរាជាណាចក្រថៃ។
ក្រសួងការពារជាតិ៖ «ភាគីទាំងពីរ ពុំបានលើកឡើងពីការដកកម្លាំងទ័ពចេញពីប្រាសាទតាមាន់ទេ ប៉ុន្តែបានប្តេជ្ញាបន្តការប្រាស្រ័យទាក់ទងគ្នាជាធម្មតា និងជូនដំណឹងគ្នាទៅវិញទៅមកឱ្យបានជាប់លាប់ជាប្រចាំ សំដៅបង្ការរាល់ការប៉ះទង្គិច ឬការយល់ច្រលំណាមួយ ដែលអាចកើតឡើងជាយថាហេតុ»។
ក្រសួងការពារជាតិ «ច្រានចោល និងថ្កោលទោស ការចោទប្រកាន់ដោយគ្មានមូលដ្ឋាន ដែលថា កម្ពុជាបានដកទ័ពចេញពីតំបន់ដែលខ្លួនកំពុងគ្រប់គ្រងក្នុងដែនអធិបតេយ្យរបស់កម្ពុជា»។
ក្រសួងការពារជាតិ៖ «នេះគឺជាចេតនាដ៏អាក្រក់ មានគោលបំណងញុះញង់ បំបែកបំបាក់ផ្ទៃក្នុងជាតិ និងទំនាក់ទំនងល្អ ជាមួយប្រទេសជិតខាង»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថា រឿងព្រំដែនកម្ពុជាថៃ ប្រៀបដូចដំបៅមិនទាន់សះ ដែលងាយនឹងរើឡើងវិញ។ លោកកត់សម្គាល់ថា នៅពេលគណបក្សពីខាងត្រកូលថាក់ស៊ីន ដឹកនាំប្រទេសថៃ ក្រុមប្រឆាំងនៅថៃតែងយកសន្លឹកបៀរឿងព្រំដែន ប្រវត្តិសាស្ត្រ វប្បធម៌ ទំនៀមទំម្លាប់ប្រពៃណី ដែនកោះ ដែនទឹក មកលេង និងដុតកំហឹងសាធារណជនថៃ ដើម្បីទម្លាក់កំហុសលើគណបក្សកាន់អំណាចថៃ គឺគណបក្សភឿថៃ។
លោកថា គោលបំណងគឺដើម្បីធ្វើឲ្យរង្គោះរង្គើផ្នែកនយោបាយនិងធ្វើឲ្យបក្សភឿថៃ ចុះខ្សោយ ដែលឧទាហរណ៍បែបនេះធ្លាប់កើតឡើងកាលពីឆ្នាំ២០០៨ បន្ទាប់ពីលោក លោក ថាក់ស៊ីន ស៊ីណាវ៉ាត្រា ត្រូវបានទម្លាក់ពីតំណែងដោយរដ្ឋប្រហារឆ្នាំ២០០៦។
លោកថា៖ ចរន្តនៃអ្នកជាតិនិយមថៃ ឬ គណបក្សប្រឆាំងថៃ ចូលចិត្តប្រើសន្លឹកបៀនេះ។ ទិដ្ឋភាពទី២ គឺដោយសារតែព្រំដែនកម្ពុជានិងថៃ ថ្វីបើយើងមានសន្ធិសញ្ញាបារាំងសៀម ១៩០២ និង ១៩០៧ ក៏ដោយ ចំណុចដែលមិនទាន់ដាច់ស្រេចនៅតែមាន ដែលដូចជាស្នាមរបួស ឬ ដូចភ្លើងដែលងំ ទោះបីជាអត់ផ្សែងក៏នៅងំ រកតែកល់ឆេះ»។
លោកជំរុញឲ្យភាគីទាំងពីរធ្វើយ៉ាងណាពន្លឿនការដោះស្រាយ និងបោះបង្គោលព្រំដែននៅចំណុចដែលមិនទាន់ឯកភាពគ្នាឲ្យបានលឿន ដោយផ្អែកលើសន្ធិសញ្ញាបារាំងសៀម និង សន្ធិសញ្ញារៀបចំដោយគណៈកម្មការកិច្ចការព្រំដែនបារាំងសៀម។
លោកថ្លែងថា៖ «ធ្វើយ៉ាងណាឲ្យខ្សែបន្ទាត់ព្រំដែនរវាងប្រទេសទាំងពីរជាខ្សែបន្ទាត់ព្រំដែនសន្តិភាព កិច្ចសហប្រតិបត្តិការ និងការអភិវឌ្ឍ ជាជាងការចិញ្ចឹមបញ្ហា ហើយរក្សាទុកបញ្ហាព្រំដែនជាដុំភ្លើងមួយដែលនៅកប់រង់ចាំតែពេលឆេះដែលពិបាកពន្លត់»៕
