ក្រសួងនឹងសាកល្បងអនុវត្តគន្លងអប់រំថ្មី រួមមាន គន្លងវិទ្យាសាស្ត្រពិត វិទ្យាសាស្ត្រសង្គម និងគន្លងវិជ្ជាជីវៈ ចាប់ពីថ្នាក់ទី១០ នៅតាមវិទ្យាល័យដែលស្ថិតនៅក្បែរតំបន់សេដ្ឋកិច្ចពិសេស និងតំបន់ដែលមានដំណើរការសេដ្ឋកិច្ច។ រូបថត ភ្នំពេញប៉ុស្ដិ៍
ភ្នំពេញ៖ ក្រសួងអប់រំ យុវជន និងកីឡា ត្រៀមដាក់ឱ្យអនុវត្ដសាកល្បងនូវគន្លងអប់រំថ្មី រួមមាន គន្លងវិទ្យាសាស្ត្រពិត វិទ្យាសាស្ត្រសង្គម និងគន្លងវិជ្ជាជីវៈ ចាប់ពីថ្នាក់ទី១០។
សេចក្ដីប្រកាសនេះ ធ្វើឡើងក្នុងកិច្ចប្រជុំកាលពីថ្ងៃទិ១០ ខែមិថុនា ពី «ការត្រៀមអនុវត្តគន្លងអប់រំថ្មីនៅមធ្យមសិក្សាទុតិយភូមិ» ក្រោមការដឹកនាំរបស់លោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា។
លោក ជួនណារ៉ុន បានឱ្យដឹងថា៖ «ក្រសួងនឹងសាកល្បងអនុវត្តគន្លងអប់រំថ្មី រួមមាន គន្លងវិទ្យាសាស្ត្រពិត វិទ្យាសាស្ត្រសង្គម និងគន្លងវិជ្ជាជីវៈ ចាប់ពីថ្នាក់ទី១០ នៅតាមវិទ្យាល័យដែលស្ថិតនៅក្បែរតំបន់សេដ្ឋកិច្ចពិសេស និងតំបន់ដែលមានដំណើរការសេដ្ឋកិច្ច»។
លោកបានបន្ដថា ក្រសួងអប់រំ យុវជន និងកីឡា នឹងអនុវត្តកម្មវិធីអប់រំតម្រង់ទិសការសិក្សា ដល់សិស្សានុសិស្សចាប់ពីថ្នាក់ទី៧ ដល់ថ្នាក់ទី៩ នៅអនុវិទ្យាល័យ និងវិទ្យាល័យនានា ស្របតាមគោលដៅរបស់លោកនាយករដ្ឋមន្ត្រី ហ៊ុន ម៉ាណែត ដែលបានថ្លែងពេលបិទសន្និបាតបូកសរុបការងារឆ្នាំសិក្សាចាស់ឆ្នាំ២០២៣-២០២៤ និងលើកទិសដៅការងារឆ្នាំសិក្សាថ្មីឆ្នាំ២០២៤-២០២៥ កាលពីខែកុម្ភៈ។
លោកនាយករដ្ឋមន្ដ្រីបានណែនាំក្រសួងអប់រំ ត្រូវពង្រឹងការអប់រំបច្ចេកទេស និងដាក់ឱ្យអនុវត្ត «គន្លងអប់រំ» តាមច្រកចំនួន៣ គឺគន្លងវិទ្យាសាស្ត្រពិត គន្លងវិទ្យាសាស្ត្រសង្គម និងគន្លងអប់រំវិជ្ជាជីវៈ នៅតាមសាលារៀន ដើម្បីផ្តល់ឱ្យសិស្សានុសិស្ស និងយុវជននូវមាគ៌ាផ្សេងៗគ្នា ទៅកាន់អាជីពជោគជ័យ។
យោងតាមសំណេររបស់លោករដ្ឋមន្ដ្រីក្រសួងអប់រំ បានបន្ដថា ការពិនិត្យឡើងវិញនូវគន្លងអប់រំ ត្រូវបានធ្វើឡើងក្នុងបរិការណ៍មួយចាំបាច់ ដែលប្រទេសកម្ពុជាត្រូវរៀបចំប្រព័ន្ធអប់រំរបស់ខ្លួនឱ្យឆ្លើយតបទាន់ពេលវេលាទៅនឹងដំណើរវិវត្តនៃការអប់រំ និងសេដ្ឋកិច្ចក្នុងតំបន់ និងក្នុងសកលលោក។
គន្លងអប់រំត្រូវបានរៀបចំឡើងមានភាពបត់បែន ផ្តោតលើសមត្ថភាព និងចំណង់ចំណូលចិត្តរបស់សិស្ស ដើម្បីដោះស្រាយបញ្ហាខ្វះមូលធនមនុស្សជំនាញ ឆ្លើយតបនឹងរចនាសម្ព័ន្ធសេដ្ឋកិច្ចកម្ពុជា កាត់បន្ថយអត្រាសិស្សបោះបង់នៅមធ្យមសិក្សា ជំរុញការចូលរៀននៅឧត្តមសិក្សា ជាពិសេសលើជំនាញស្ទែម និងការបង្កើនអត្រាសិស្សចាប់យកជំនាញបច្ចេកទេស និងវិជ្ជាជីវៈដែលចាំបាច់សម្រាប់ទីផ្សារការងារ។
លោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា ដឹកនាំកិច្ចប្រជុំកាលពីថ្ងៃទិ១០ ខែមិថុនា ពី «ការត្រៀមអនុវត្តគន្លងអប់រំថ្មីនៅមធ្យមសិក្សាទុតិយភូមិ»។ រូបថត សហការី
លោក ជួនណារ៉ុន បានថ្លែងថា៖ «ការរៀបចំគន្លងអប់រំមួយដែលពិចារណាលើទិដ្ឋភាពចម្រុះ នឹងជំរុញកិច្ចពិភាក្សាលើការធ្វើទំនើបកម្មប្រព័ន្ធអប់រំ និងកម្មវិធីសិក្សា ដើម្បីតម្រង់ទិសសិស្សក្នុងភូមិសិក្សានីមួយៗ កំណត់លទ្ធភាពវិនិយោគ និងគន្លងអប់រំតាមស្ថានភាពសាលារៀន និងកំណត់គុណវុឌ្ឍិគ្រូបង្រៀន ស្របតាមគន្លងអប់រំ និងស្ថានភាពសាលារៀនជាដើម»។
លោកបានបន្ដថា វាផ្តល់អត្ថប្រយោជន៍ ដូចជា ការបង្កើតថ្នាលអ្នកវិទ្យាសាស្ត្រ ថ្នាលសិស្សពូកែ និងការពង្រឹងទំនាក់ទំន ងនិងភាពបត់បែនរវាងគន្លងអប់រំទូទៅ និងគន្លងអប់រំបណ្តុះបណ្តាល បច្ចេកទេស និងវិជ្ជាជីវៈ។
បច្ចុប្បន្នក្រសួងបាននិងកំពុងរៀបចំសេចក្តីព្រាងស្តីពីសេចក្តីណែនាំការតម្រង់ទិស ការអនុវត្តការអប់រំបច្ចេកទេស និងការធ្វើមគ្គុទ្ទេសក៍អាជីព(Career guidance)។
ក្រសួងនឹងចេញសេចក្តីណែនាំឱ្យគ្រឹះស្ថានមធ្យមសិក្សាទាំងអស់អនុវត្តកម្មវិធីអប់រំតម្រង់ទិសការសិក្សា ដើម្បីឱ្យសិស្សសិក្សាឈ្វេងយល់ពីខ្លួនឯង រៀបចំផែនការសិក្សានិងផែនការអាជីព និងជួយសិស្សក្នុងការការសម្រេចចិត្តជ្រើសរើសគន្លងអប់រំចាប់ពីថ្នាក់ទី១០៕
