មន្ដ្រីជំនាញពន្យល់ណែនាំដល់សិស្សានុសិស្សអំពីចំណីអាហារ។ រូបថត សហការី
ភ្នំពេញ៖ រាជរដ្ឋាភិបាលកម្ពុជាបានចេញសេចក្ដីសម្រេចបង្កើតគណៈកម្មាធិការ មន្ទីរពិសោធន៍វិភាគម្ហូបអាហារ ជាយន្តការជាតិដែលមានគោលបំណងពង្រឹងប្រព័ន្ធសុវត្ថិភាពចំណីអាហារ និងធានាការអនុវត្តមន្ទីរពិសោធន៍ស្របតាមស្តង់ដាអន្តរជាតិ។
គណៈកម្មាធិការនេះមានកាតព្វកិច្ចត្រួតពិនិត្យការកំណត់ ការវាយតម្លៃ និងការមន្ទីរពិសោធន៍វិភាគម្ហូបអាហារយោង និងមន្ទីរពិសោធន៍វិភាគអាហារផ្លូវការនៅកម្ពុជា។ នេះបើយោងតាមសេចក្តីសម្រេចចុះហត្ថលេខាដោយលោកនាយករដ្ឋមន្ត្រី ហ៊ុន ម៉ាណែត ចេញផ្សាយនៅថ្ងៃទី១២ ខែមិថុនា។
វាក៏មានគោលបំណងបង្កើនកិច្ចសហប្រតិបត្តិការ និងបណ្តាញរវាងមន្ទីរពិសោធន៍ជាតិ និងអន្តរជាតិ ដែលដឹកនាំដោយរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
គណៈកម្មាធិការនេះមានសមាសភាព រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាប្រធាន ហើយអនុប្រធានពីរនាក់ ជាតំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងតំណាងក្រសួងកសិកម្ម រុក្ខាប្រមាញ់ និងនេសាទ។
សមាសភាពសមាជិកគឺជាតំណាងមកក្រសួងពាណិជ្ជកម្ម ក្រសួងសុខាភិបាល ក្រសួងសេដ្ឋកិច្ចនិងហិរញ្ញវត្ថុ ក្រសួងទេសចរណ៍ និងអគ្គនាយកវាយតម្លៃទទួលស្គាល់នៃកម្ពុជា។
ការងាររបស់គណៈកម្មាធិការពិនិត្យ និងសម្រេចលើសំណើកំណត់មន្ទីរពិសោធន៍វិភាគម្ហូបអាហារយោង និង/ឬមន្ទីរពិសោធន៍ វិភាគម្ហូបអាហារផ្លូវការ យោងតាមរបាយការណ៍វាយតម្លៃ ដែលរៀបចំដោយលេខាធិការដ្ឋាន បន្ទាប់ពីទទួលបានអនុសាសន៍របស់ក្រុមអ្នកជំនាញមន្ទីរពិសោធន៍។
គណៈកម្មាធិការផ្តល់ការគាំទ្រដើម្បីលើកកម្ពស់មន្ទីរពិសោធន៍វិភាគម្ហូបអាហារយោង និង/ឬមន្ទីរពិសោធន៍វិភាគ ម្ហូបអាហារផ្លូវការ ឱ្យក្លាយជាមន្ទីរពិសោធន៍ដែលមានសមត្ថភាពអនុលោមស្តង់ដាអន្តរជាតិ ISO/IEC 17025 និងជាមន្ទីរពិសោធន៍ដែលបានចូលរួមកម្មវិធីតេស្តវាស់វែងសមត្ថភាពពីមន្ទីរពិសោធន៍ជំនាញខ្ពស់ Proficiency Testing Program (PTP) ISO/IEC 17043។
យោងតាមសេចក្ដីសម្រេច បានបន្ដថា៖ «គណៈកម្មាធិការជំរុញឱ្យមានបណ្តាញទំនាក់ទំនងមន្ទីរពិសោធន៍វិភាគម្ហូបអាហារជាតិនិងអន្តរជាតិ សម្របសម្រួលក្នុងការចែករំលែក ប្រមូលផ្តុំព័ត៌មាន និងជំរុញការអភិវឌ្ឍជំនាញដល់មន្ទីរពិសោធន៍ វិភាគម្ហូបអាហារទាំងអស់ ក៏ដូចជាជំរុញកិច្ចសហប្រតិបត្តិការក្នុងប្រទេស តំបន់ និងអន្តរជាតិពាក់ព័ន្ធនឹងមន្ទីរពិសោធន៍វិភាគម្ហូបអាហារ»។
គណៈកម្មាធិការនេះ អាចកោះហៅតំណាងក្រសួង ស្ថាប័ន ដៃគូពាក់ព័ន្ធនានា និងវិស័យឯកជន ចូលរួមពិគ្រោះយោបល់តាមការចាំបាច់៕
