កំពង់ធំៈ ជំនន់ទឹកភ្លៀងបាននឹងកំពុងតែបង្កផលប៉ះពាល់ដល់ដំណាំស្រូវជាង១ ៤០០ហិកតា នៅក្នុង១៨ឃុំ នៃស្រុកចំនួន៤ក្នុងខេត្តកំពង់ធំ ក្រោយពីមានភ្លៀងធ្លាក់ខ្លាំងនៅដើមរដូវវស្សានេះ។

ស្រុកទាំង៤ទាំងនោះ រួមមានស្រុកកំពង់ស្វាយ សណ្តាន់ ប្រាសាទសំបូរ និងស្រុកស្ទោង ដែលមានផ្ទៃដីដំណាំស្រូវប៉ះពាល់សរុបចំនួន១ ៤៧១ហិកតា របស់ប្រជាពលរដ្ឋ ១ ៣០៧គ្រួសារ គិតត្រឹមថ្ងៃទី១៥ ខែមិថុនានេះ។ នេះបើយោងតាម អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោកសុទ្ធ គឹមកុលមន្នី នៅថ្ងៃចន្ទ ទី១៦ មិថុនា។

លោកមានប្រសាសន៍ថា៖«ដោយសារមានភ្លៀងធ្លាក់ប៉ុន្មានថ្ងៃនេះ ធ្វើឱ្យទឹកស្ទឹងសែនមានការកើនឡើងខ្លាំង ហើយបង្កជាជំនន់ទឹកភ្លៀង ប៉ះពាល់ដល់ស្រុកចំនួន៤ ស្មើនឹង១៨ឃុំ ហើយបណ្តាលឱ្យខូចខាតស្រូវមួយចំនួនផងដែរ»។

កាលពីថ្ងៃទី១៥ ខែមិថុនា រដ្ឋមន្ត្រីក្រសួងធនធានទឹក និងឧតុនិយម លោកថោ ជេដ្ឋា ក៏បានចុះពិនិត្យស្ថានភាព​ជំនន់ទឹកភ្លៀង ក្នុងភូមិសាស្ត្រស្រុកកំពង់ស្វាយផងដែរ។  នៅក្នុង ឃុំកំពង់ស្វាយ ស្រុកកំពងស្វាយនេះ មានផ្ទៃដីដំណាំស្រូវ ដែលប៉ះពាល់ចំនួន ២៤៧ហិកតា។

អភិបាលខេត្តកំពង់ធំ លោកនួន ផារ័ត្នបានចុះទៅពិនិត្យស្ថានភាពទឹកជំនន់ទាំងនេះ កាលពីថ្ងៃទី១៣ ខែមិថុនា។

លោកបានលើកឡើងថា ឆ្នាំនេះ ទឹកជំនន់ស្ទឹងសែន និងស្ទឹងស្ទោង បានកើនឡើងលឿនមុនកាលកំណត់ ខុសពីសព្វមួយដង ដែលបានបណ្តាលឱ្យប៉ះពាល់ដល់ការធ្វើដំណើរ និងដំណាំស្រូវរបស់ប្រជាពលរដ្ឋ នៅតាមបណ្តាទីតាំងមួយចំនួន។

លោកបានអំពាវនាវឱ្យប្រជាពលរដ្ឋ មេត្តាបង្កើនការប្រុងប្រយ័ត្នឱ្យបានខ្ពស់ ជាពិសេសសុវត្ថិភាពរបស់កុមារតូចៗ។

ការព្យាករកម្ពស់ទឹកជំនន់ទន្លេមេគង្គ លើកទី១ ប្រចាំឆ្នាំ២០២៥របស់ក្រសួងធនធានទឹកកាលពីថ្ងៃទី៥ខែមិថុនាបានឱ្យដឹងថា នៅក្នុងខែឧសភា ប្រទេសកម្ពុជាទទួលរងនូវឥទ្ធិពលពីបាតុភូតអែនសូ (ENSO Neutral) ១០០ភាគរយ។ ចាប់ពីខែមិថុនា ដល់ខែកញ្ញា បាតុភូតអែលនីណូ (El Niño) ១០ភាគរយ ហើយបាតុភូតអែនសូ (ENSO Neutral) បានថយចុះជាបន្តបន្ទាប់ពី ១០០ភាគរយ មកនៅ ៦០ភាគរយ ដែលជាបាតុភូតចន្លោះរវាងបាតុភូតអែលនីណូ និងឡានីញ៉ា (La Niña) ហើយបាតុភូតឡានីញ៉ា អាចនឹងកើនឡើងពី១០ភាគរយ ទៅ៣០ភាគរយ។

ក្រសួងបញ្ជាក់ថា៖«លក្ខណៈបែបនេះនឹងធ្វើឱ្យ ទឹកនៅក្នុងអាងទន្លេមេគង្គ រួមទាំងក្នុងប្រទេសកម្ពុជាផងមានបរិមាណទឹកភ្លៀងពីមធ្យមទៅបង្គួរ និងផ្នែកខ្លះមានភ្លៀង ធ្លាក់ច្រើនដែលអាចបណ្តាលឱ្យកើតមានជំនន់ទឹកភ្លៀងនៅតាមស្ទឹង និងដៃទន្លេ»៕

អភិបាលខេត្តកំពង់ធំ លោកនួន ផារ័ត្ន (ស្តាំ)ដឹកនាំក្រុមការងារចុះទៅពិនិត្យស្ថានភាពទឹកជំនន់ កាលពីថ្ងៃទី១៣ ខែមិថុនា។ រូបថត NUON Pharat