មជ្ឈមណ្ឌលអភិវឌ្ឍន៍ការវេចខ្ចប់កម្ពុជា (CPC) ទទួលបានឋានៈជាសមាជិកពេញសិទ្ធិ នៅក្នុងអង្គការ​វេចខ្ចប់ពិភពលោក (WPO) នាពេលថ្មីៗនេះ ដែល​ជាជំហានដ៏សំខាន់មួយទៀតរបស់កម្ពុជាក្នុងការបន្តកិច្ចខិតខំប្រឹងប្រែងពង្រឹងស្តង់ដារសុវត្ថិភាពម្ហូបអាហារ បង្កើនភាពប្រកួតប្រជែង និងនិរន្តរភាពនៃឧស្សាហកម្មម្ហូបអាហារក្នុងស្រុក។

មជ្ឈមណ្ឌល CPC ត្រូវបានដាក់ឱ្យដំណើរការនៅក្នុងឆ្នាំ២០២៤ ក្នុង​គោល​បំណង​រួមចំណែកលើកស្ទួយការស្រាវជ្រាវ និងអភិវឌ្ឍន៍ការវេចខ្ចប់នៅកម្ពុជា។ វា​ជា​ផ្នែកមួយនៃគំនិតផ្តួចផ្តើម​របស់​ថ្នាលស្រាវជ្រាវ នវានុវត្តន៍ និងបច្ចេកវិទ្យាអាហារ (FTRIP) ក្រោមក្របខណ្ឌគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ។

សេចក្ដី​ប្រកាស​ព័ត៌​មាន​រួម​របស់​រដ្ឋបាល​ជលផល និង UNIDO ដែល​ចេញ​ផ្សាយ​នៅ​ថ្ងៃទី៥ មិថុនា បាន​ឲ្យ​ដឹង​ថា ការ​ទទួល​បាន​សមាជិកភាព​របស់ CPC ក្នុងអង្គការ WPO នេះ​ផ្តល់លទ្ធភាពឱ្យមជ្ឈមណ្ឌល​ទទួលបានជំនាញបច្ចេកទេស  បច្ចេកវិទ្យាវេចខ្ចប់ថ្មីៗ និងដកស្រង់នូវមេរៀនបទពិសោធន៍ និងការអនុវត្តល្អៗពីជុំវិញពិភពលោក។

ធនធានទាំងនេះ នឹង​ជួយឱ្យកម្ពុជាបំពេញបានតាមលក្ខខណ្ឌតម្រូវផ្នែកសុវត្ថិភាពម្ហូបអាហារជាសាកល ពង្រឹងសមត្ថភាពសហគ្រាសធុនតូច និងមធ្យមក្នុងស្រុក និងលើកទឹកចិត្តឱ្យទទួលយកការអនុវត្តការវេចខ្ចប់ប្រកបដោយនិរន្តរភាព មេត្រីភាពបរិស្ថាន ដែលស្របតាមគោលដៅអភិវឌ្ឍន៍ប្រកបដោយបរិយាប័ន្ន។ នេះ​បើ​តាម​សេចក្ដី​ប្រកាស​ព័ត៌មាន​ដដែល។

សេចក្ដីប្រកាស​ព័តមាន​បញ្ជាក់​ថា៖ «ការកែលម្អការវេចខ្ចប់​ផលិតផលកម្ពុជាឱ្យស្របតាម​ស្តង់​ដារអន្តរជាតិ ជួយពង្រីកទីផ្សារថ្មី និងលើកកម្ពស់ភាពប្រកួតប្រជែងបានកាន់តែប្រសើរ។ ជាពិសេស ដំណោះស្រាយផ្នែកវេចខ្ចប់ក៏អាចជួយកាត់បន្ថយការខាតបង់ម្ហូបអាហារ និងកាកសំណល់បានកាន់តែប្រសើរនៅក្នុងខ្សែច្រវាក់ផ្គត់ផ្គង់ ជួយឱ្យសម្រេចបានសន្តិសុខស្បៀង និងនិរន្តរភាព»។

លោក ប៊ុនតុង បូរារិន អ្នកសម្របសម្រួលជាន់ខ្ពស់របស់ CPC ថ្លែង​ថា៖ «សមិទ្ធផលនេះគឺជាជំហានដ៏សំខាន់មួយសម្រាប់វិស័យវេចខ្ចប់នៅកម្ពុជា។ វាបើកឱកាសសម្រាប់កិច្ចសហការ ការចែករំលែកចំណេះដឹង និងទាញយកប្រយោជន៍ពីបច្ចេកវិទ្យាសម័យថ្មី ជួយកែលម្អស្តង់ដាឧស្សាហកម្មក្នុងស្រុកពង្រីកសក្តានុពលក្នុងការនាំចេញ ដែលផ្តល់អត្ថប្រយោជន៍ដល់អ្នកប្រើប្រាស់ និងអ្នកផលិតដូចគ្នា»។

លោក សេតធី ស៊ីថារ៉ាម៉ា ថមបាធូ ប្រធានទីប្រឹក្សាបច្ចេកទេស UNIDO សម្រាប់គម្រោង CAPFISH-Capture​ បាន​ថ្លែង​ថា ការ​ទទួល​សមាជិកភាពជាមួយអង្គការ WPO  នឹង​ធ្វើ​ឲ្យ​ មជ្ឈមណ្ឌល CPC ដើរតួនាទីស្នូលក្នុងការចែករំលែកជំនាញ ប្រើប្រាស់ការអនុវត្តល្អប្រសើរ ដើម្បីរួមចំណែកដល់ការអភិវឌ្ឍក្នុងតំបន់ និងពិភពលោក។

លោក​ថា៖ «កិច្ចខិតខំប្រឹងប្រែងនេះ ជួយកសាងភាពធន់បានយូរអង្វែង និងលើកកម្ពស់និរន្តរភាពនៅក្នុងវិស័យម្ហូបអាហារ និងការវេចខ្ចប់នៅកម្ពុជា»។

CPC ទទួល​បាន​ការ​គាំទ្រថវិកាដោយសហភាពអឺរ៉ុប (EU) និងអនុវត្តរួមគ្នាដោយអង្គការ UNIDO និងរដ្ឋបាលជលផល (FiA)។ មជ្ឈមណ្ឌលចូលរួម​ផ្ដល់​ដំណោះស្រាយ​សមស្របតាមតម្រូវការរបស់អាជីវករ និងសហគ្រាសក្នុងស្រុកបណ្តុះបណ្តាលអ្នកប្រកបវិជ្ជាជីវៈផ្នែកម្ហូបអាហារនូវជំនាញផ្នែកវេចខ្ចប់ប្រកបដោយប្រសិទ្ធភាព និងនិរន្តរភាព៕