រដ្ឋមន្ត្រីការពារជាតិកម្ពុជា ទៀ សីហា ជួបជាមួយសមភាគីថៃ Phumtham Wechayachai នៅថ្ងៃទី៥ ឧសភា។ ក្រសួងការពារជាតិ
កម្ពុជាបញ្ជាក់ជំហរម៉ឺងម៉ាត់ប្រាប់ទៅរដ្ឋមន្ត្រីការពារជាតិថៃថា កម្ពុជាមិនដកទ័ពចេញពីតំបន់មុំបី តាមការស្នើសុំរបស់ភាគីថៃនោះទេ ព្រោះជាអធិបតេយ្យភាពរបស់កម្ពុជា។
ការបញ្ជាក់ដូច្នេះធ្វើឡើងក្នុងជំនួបរវាងរដ្ឋមន្ត្រីការពារជាតិ ទៀ សីហា និង សមភាគីថៃ Phumtham Wechayachai កាលពីរសៀលថ្ងៃទី៥ ឧសភា ធ្វើឡើងនៅស្រុកអារញ្ញប្រថេត ខេត្តស្រះកែវ ព្រះរាជាណាចក្រថៃ។
សេចក្ដីប្រកាសព័ត៌មានរបស់ក្រសួងការពារជាតិបានថ្លែងថា៖ «ចំនុចភាគីថៃបានស្នើសុំឲ្យកម្ពុជាដកកងទ័ពចេញពីទីតាំងឈរជើងនៅតំបន់មុំបីដែលប្រយុទ្ធគ្នាកាលពីថ្ងៃទី ២៨ ឧសភាកន្លងទៅ ភាគីកម្ពុជាបដិសេធមិនទទួលយកការស្នើសុំនោះទេ ព្រោះទីតាំងខាងលើ ជាទីតាំងស្ថិតក្នុងដែនអធិបតេយ្យភាពរបស់កម្ពុជា ដែលបានឈរជើងជាអចិន្ត្រៃរយ៍តាំងពីដើមរៀងមក»។
ក្រសួងបន្តថា៖ «ភាគីកម្ពុជា មិនអាចថយពីទីតាំងដែលកងទ័ពកម្ពុជាបានឈរជើងជាយូរណាស់មកហើយ និងដែលស្ថិតក្នុងដែនអធិបតេយ្យភាពរបស់កម្ពុជាបានឡើយ»។
ភាគីទាំងពីរបានឯកភាពកាត់បន្ថយភាពតានតឹងនៅព្រំដែន ដោយរក្សាការប្រាស្រ័យទាក់ទងគ្នាទៅវិញទៅមក ការយោគយល់គ្នា និងរក្សាការសន្ទនាដោយសន្តិវិធីទៅថ្ងៃខាងមុខទៀត ក្នុងគោលបំណង ចៀសវាងការប៉ះទង្គិចយោធាគ្នាកម្ពុជា-ថៃ។
លោក ទៀ សីហា បានលើកឡើងពីការដែលភាគីទាំងពីរប្រើផែនទីខុសគ្នា មាត្រដ្ឋានខុសគ្នា ដែលនឹងមិនអាចរកចំនុចកណ្តាលក្នុងការថែរក្សាស្ថិរភាពព្រំដែន។ ភាគីកម្ពុជា នៅតែប្រកាន់ស្មារតី នៃការគោរពអនុស្សរណៈនៃការយោគយល់គ្នា ឆ្នាំ២០០០ (MOU 2000) ដូចដែលមានកន្លងមក។
បើតាមក្រសួងការពារជាតិ លោក ទៀ សីហា ប្រាប់ទៅលោក Phumtham Wechayachai ថា ភាគីកម្ពុជាសម្រេចចិត្តរៀបចំសំណុំរឿងបញ្ជូនវិវាទតំបន់ទាំង៤ រួមមានតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ទៅតុលាការយុត្តិធម៌អន្តរជាតិ (ICJ) នៅទីក្រុងឡាអេ ដើម្បីបញ្ចប់ជម្លោះនិងកំណត់ព្រំដែនជាក់លាក់។
ក្រសួងការពារជាតិថ្លែងថា៖ «កម្ពុជាមានបំណងទទួលយកតែសន្តិភាព ស្ថិរភាព និងតំកល់ប្រយោជន៍ប្រជាជនយើងទាំងសងខាងជាធំ។ ក្នុងនោះភាគីថៃក៏បានបង្ហាញពីការគោរពសិទ្ធិកម្ពុជា ក្នុងការដាក់ចំនុចទាំង៤ ទៅតុលាការយុត្តិធម៌អន្តរជាតិ(ICJ)។ យើងក៏បានឯកភាពគ្នាក្នុងការបន្តយន្តការចរចាក្នុងកិច្ចប្រជុំ GBC/JBC/RBC ទៅលើចំនុចដទៃៗទៀតនាថ្ងៃខាងមុខ»។
ខណៈដែលជម្លោះព្រំដែននៅតែតានឹង នាយករដ្ឋម្ត្រីថៃ Paetongtarn Shinawatra បានបដិសេធថា មិនមានជម្លោះរវាងយោធាថៃ និង រដ្ឋាភិបាលថៃទេ។
ថ្លែងនៅព្រឹកថ្ងៃទី៦ មិថុនា បន្ទាប់ពីកិច្ចប្រជុំក្រុមប្រឹក្សាសន្តិសុខជាតិស្តីពីស្ថានភាពព្រំដែនថៃ-កម្ពុជា លោកស្រីអះអាងពីភាពរឹងមាំនៃឯកភាពរវាងយោធា-រដ្ឋាភិបាល និងបានច្រានចោលពាក្យចចាមអារ៉ាមជុំវិញជម្លោះនេះ។
លោកស្រីបានសង្កត់ធ្ងន់លើការពិគ្រោះយោបល់ តួនាទីច្បាស់លាស់ និងវិធីសាស្ត្រដោយសន្តិវិធី រវាងរដ្ឋាភិបាលនិងយោធា៕
