លោក សុខ ចិន្តាសោភា (ឆ្វេង) និង លោក ប្រាក់ សុខុន ដែលនឹងត្រូវរដ្ឋសភាបោះឆ្នោតកែសម្រួលមុខតំណែងនៅថ្ងៃទី២០ ខែវិច្ឆិកា ឆ្នាំ២០២៤។ ហ្វេសប៊ុក
ការវិលត្រឡប់មកកាន់តំណែងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិសាជាថ្មីរបស់លោក ប្រាក់ សុខុន ដែលមានបទពិសោធន៍ច្រើនឆ្នាំលើកិច្ចការនេះ គឺដើម្បីឆ្លើយតបនឹងការវិវត្តកាន់តែស្មុគស្មាញនៃការប្រកួតប្រជែងភូមិសាស្ត្រនយោបាយនៃមហាអំណាច។ នេះជាការលើកឡើងរបស់អ្នកវិភាគ។
រដ្ឋសភានឹងបោះឆ្នោតផ្ដល់សេចក្ដីទុកចិត្តលើការកែសម្រួលសមាសភាពរាជរដ្ឋាភិបាល នៅថ្ងៃទី២០ ខែវិច្ឆិកានេះ ដែលលោក ប្រាក់ សុខុន បច្ចុប្បន្នជាអនុប្រធានព្រឹទ្ធសភា នឹងត្រឡប់មកកាន់តំណែងចាស់របស់លោក ជារដ្ឋមន្ត្រីការបរទេស ជំនួយលោក សុខ ចិន្ដាសោភា ដែលបានកាន់តំណែងនេះអស់រយៈពេល ១៥ខែ គិតចាប់តាំងពីរដ្ឋាភិបាលថ្មីបានចូលកាន់តំណែង។ នេះបើតាមការជូនដំណឹងរបស់រដ្ឋលេខាធិការដ្ឋានរដ្ឋសភា។
លោក ប្រាក់ សុខុន មានប្រវត្តិជាអ្នកសារព័ត៌មាននៃកាសែតកងទ័ព ចាប់ពីឆ្នាំ១៩៧៩ ដល់ឆ្នាំ១៩៨៦ និងធ្លាប់ជាឯកអគ្គរាជទូតកម្ពុជាប្រចាំប្រទេសបារាំង ប៊ែលហ្ស៊ិក ហូឡង់ អូទ្រីស ដាណឺម៉ាក ស៊ុយអែត ហ្វាំងឡង់ សហភាពអឺរ៉ុប និងនៅការិយាល័យអង្គការសហប្រជាជាតិនៅទីក្រុងហ្សឺណែវ។ លោកក៏ធ្លាប់បានកាន់មុខតំណែងសំខាន់ៗនៅទីស្ដីការគណៈរដ្ឋមន្ត្រី។
ចាប់ពីឆ្នាំ ២០១៦ រហូតដល់ឆ្នាំ ២០២៣ លោកបានកាន់តំណែងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ នៅពេលកម្ពុជាគឺជាប្រធានអាស៊ានកាលពីប៉ុន្មានឆ្នាំកន្លងទៅ លោកត្រូវបានតែងតាំងជាបេសកជនពិសេសរបស់ប្រធានអាស៊ានទទួលបន្ទុកបញ្ហាមីយ៉ាន់ម៉ា ដោយក្នុងតំណែងនេះ លោកបានបំពេញទស្សនកិច្ចទៅប្រទេសមីយ៉ាន់ម៉ាជាច្រើនលើក។ លោកបានក្លាយជាអនុប្រធានព្រឹទ្ធសភា បន្ទាប់ពីការបោះឆ្នោតព្រឹទ្ធសភា កាលពីខែកុម្ភៈ។
ដោយឡែកលោក សុខ ចិន្ដាសោភា ធ្លាប់ជាប្រធានក្រុមប្រឹក្សាអភិវឌ្ឍន៍កម្ពុជា ដែលជាស្ថាប័នទាក់ទាញវិនិយោគិនពីក្នុងនៅក្រៅប្រទេសឲ្យវិនិយោគនៅកម្ពុជា។ លោកបានកាន់តំណែងនេះ នៅពេលរដ្ឋាភិបាលថ្មី ដឹកនាំដោយលោក ហ៊ុន ម៉ាណែត បានចូលកាន់អំណាចកាលពីខែសីហា ឆ្នាំ២០២៣។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា យល់ឃើញ ការកែសម្រួលសមាសភាពម៉ាស៊ីនដឹកនាំរដ្ឋាភិបាលឲ្យត្រូវតាមជំនាញ និងបទពិសោធន៍ គឺជារឿងធម្មតាដើម្បីធានាបាននូវប្រសិទ្ធភាពការងារ។
លោមថ្លែងដូច្នេះថា៖ «ខ្ញុំយល់ឃើញថា ទោះបីដាក់អ្នកណាក៏ដោយ នៅចំពោះមុខនៃការប្រកួតប្រជែងភូមិសាស្ត្រនយោបាយ និងដើម្បីពង្រឹងពង្រីកទំនាក់ទំនងការទូត នយោបាយ សេដ្ឋកិច្ច ពាណិជ្ជកម្មរបស់កម្ពុជាទៅក្នុងពិភពលោក កម្ពុជាត្រូវការរដ្ឋមន្ត្រីការបរទេសដែលមានបទពិសោធន៍ និងចំណេះជំនាញកិច្ចការបរទេសដែលមានបទពិសោធន៍ ដើម្បីធ្វើការងារការទូតឲ្យកាន់តែមានប្រសិទ្ធភាព»។
ស្រដៀងគ្នានេះ លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា យល់ថា ការកែសម្រួលនេះមិនមែនមានន័យថា លោក សុខ ចិន្តាសោភា គ្មានសមត្ថភាព ឬមិនសក្ដិសមសម្រាប់តំណែងនេះទេ ប៉ុន្តែ ដោយសារតែលោក ប្រាក់ សុខុន មានបទពិសោធន៍លើកិច្ចការនេះច្រើន ហើយលោកធ្លាប់សម្រេចបានសមិទ្ធផលលេចធ្លោមួយចំនួន។
យ៉ាងណាក៏ដោយ ស្ថានភាពនៃការប្រកួតប្រជែងរបស់ពិភពលោកនាពេលបច្ចុប្បន្នជាកត្តារួមចំណែកសម្រាប់ការវិលត្រឡប់របស់លោក ប្រាក់ សុខុន មកកាន់មុខតំណែងចាស់របស់លោក។
លោក គិន ភា៖ «ស្របពេលបរិបទនយោបាយពិភពលោកមានការផ្លាស់ប្ដូរដែរ ប្រហែលជាទាមទារឲ្យយើងត្រូវមានរដ្ឋមន្ត្រីការបរទេសមួយដែលមានបទពិសោធន៍ខ្ពស់ក្នុងការកាច់ចង្កូតនយោបាយការបរទេសនិងការទូតរបស់កម្ពុជា។ ឯកឧត្តម ប្រាក់ សុខុន មានបទពិសោធន៍ច្រើន ហើយធ្លាប់កាន់កិច្ចការបរទេសរបស់រដ្ឋាភិបាលដោយជោគជ័យ»។
លោកបន្តថា៖ «ម្យ៉ាងទៀត យើងដឹងហើយថា ពេលលោក ដូណាល់ ត្រាំ នឹងឡើងកាន់អំណាចជាប្រធានាធិបតីសហរដ្ឋអាមេរិកនាពេលខាងមុខនេះ យើងមិនដឹងថា នឹងមានរឿងអ្វីកើតឡើងនៅលើសណ្ដាប់ធ្នាប់ពិភពលោក។ អីចឹង រដ្ឋមន្ត្រីការបរទេសរបស់ប្រទេសនានាគួរតែជាបុគ្គលមានបទពិសោធន៍ខ្ពស់ក្នុងវិស័យការទូតនិងកិច្ចការបរទេសដើម្បីសម្របនយោបាយការបរទេសកម្ពុជាទៅនឹងស្ថានភាពថ្មី»៕
