រូបថតតំណាង។ កម្ពុជាគ្រោងដាក់ឱ្យអនុវត្តពន្ធចំណេញលើមូលធន ចាប់ពីខែមករា ឆ្នាំ ២០២៤។ រូបថត សហការី
ភ្នំពេញៈ អគ្គនាយកដ្ឋានពន្ធដារ (GDT) នឹងចាប់ផ្តើមដាក់ឱ្យអនុវត្តនូវពន្ធចំណេញលើមូលធន ចាប់ពីថ្ងៃទី ១ ខែមករា ឆ្នាំ ២០២៤ តទៅ ក្រោយពីត្រូវបានពន្យារពេលអនុវត្តចំនួន ៣ លើក ខណៈអ្នកនៅក្នុងវិស័យអចលនទ្រព្យលើកឡើងថា ការចាប់អនុវត្តនេះអាចនឹងជះផលអវិជ្ជមានខ្លះដល់ការរីកលូតលាស់របស់វិស័យដែលកំពុងតែធ្លាក់ចុះដោយសារការថមថយនៃសេដ្ឋកិច្ចសកល។
លោក គង់ វិបុល អគ្គនាយក GDT បានឱ្យដឹងនៅក្នុងកម្មវិធីផ្សាយផ្ទាល់ពិសេសមួយកាលពីថ្ងៃទី ១៥ ខែកញ្ញាថា ពន្ធចំណេញមូលធននេះមិនមែនជាពន្ធដែលបង្កើតថ្មីនោះឡើយ។ ពន្ធនេះត្រូវបានបង្កើតឡើងយូរហើយ ប៉ុន្តែរដ្ឋាភិបាលបានបន្តពន្យារពេលនៃការអនុវត្តជាហូរហែ ជាពិសេស GDT ក៏ត្រូវការសិក្សារៀនសូត្រអំពីពន្ធលើចំណូលមូលធននេះឱ្យបានគ្រប់ជ្រុងជ្រោយផងដែរ។
លោកបានប្រាប់ថា រយៈពេល ៤-៥ ឆ្នាំកន្លងទៅនេះ លោកបានដើរទៅប្រទេសមួយចំនួនដែលគេអនុវត្តពន្ធលើចំណេញមូលធននេះ បានសិក្សាពីគេយកមកបង្កើតជាបទប្បញ្ញត្តិមួយចំនួនទៀតអនុវត្តនូវច្បាប់ពន្ធនេះ។
លោកថ្លែងថា៖ «យើងខ្ញុំបានសិក្សារៀនសូត្រ និងត្រៀមខ្លួនរួចហើយពីការដាក់ឱ្យអនុវត្តពន្ធនេះ។ សំណួរសួរថា វិស័យអចលនទ្រព្យជាប់គាំង ខ្ញុំថាការជាប់គាំងនេះពុំមែនបណ្តាលមកពីពន្ធនេះទេ ខ្ញុំធ្លាប់ប្រាប់អំពីពន្ធលើប្រាក់ចំណេញ អ៊ីចឹងបើលោកអ្នកទាំងអស់គ្នាលក់អចលនទ្រព្យទៅខាត ឬក៏រួចខ្លួនអត់ត្រូវជាប់ពន្ធលើចំណេញមូលធននេះទេ។
ពន្ធនេះគេយកតែចំណេញទេ ហើយសម្រាប់ពន្ធនេះទៀតសោត គឺយើងខ្ញុំមិនមែនចាប់ផ្តើមដំបូងឡើងយកពន្ធប្រភេទនេះដូចបារាំង ឬអូស្ត្រាលី ប្រមាណ ៤០ ទៅ ៥០ ភាគរយនោះទេ។ យើងខ្ញុំយកតែ ២០ ភាគរយ បន្ទាប់ពីការកាត់កងដែលរដ្ឋអនុញ្ញាតឱ្យកាត់កង ៨០ ភាគរយរួចហើយ អ៊ីចឹងគិតទៅស្មើនឹង ៤ ភាគរយនៅពេលលក់អចលនទ្រព្យទៅបង់ ២០ ភាគរយចំណេញ»។
លោកបន្តថា៖ «ការអនុវត្តរបស់យើងនេះគឺសម្រួលមែនទែន វិស័យអចលនទ្រព្យក៏ដូចជាបងប្អូនប្រជាពលរដ្ឋយើង ប៉ុន្តែបើបងប្អូនមានបញ្ជីស្នាមកុងត្រាបញ្ជាក់ច្បាស់លាស់ថា កាលទិញអលនទ្រព្យខ្លួនកាលពី ២ ឆ្នាំមុន ១ លាន ២ សែន និងបង់ពន្ធប្រថាប់ត្រាតម្លៃប៉ុនហ្នឹង ប៉ុន្តែឥឡូវលក់បាន ១ លានដុល្លារខាត ២០ ម៉ឺនដូច្នេះក្នុងករណីនេះ គឺមិនត្រូវបង់ពន្ធចំណេញមូលធនឡើយ»។
លោកបន្តថា បើជាគ្មានការប្រែប្រួលពីពេលនេះរហូតដល់ឆ្នាំ ២០២៤ តាមគោលការណ៍កំណត់គឺថ្ងៃទី ១ ខែមករាឆ្នាំ ២០២៤ GDT នឹងចាប់អនុវត្តពន្ធលើចំណេញមូលធននេះ វាលើកលែងតែមានការសម្រេចពីរដ្ឋាភិបាល។
លោកបញ្ជាក់ថា៖ «ប៉ុន្តែឥឡូវនេះគឺអត់ទាន់មានគោលការណ៍អ្វីឡើយ ដូច្នេះយើងខ្ញុំនឹងអនុវត្ត»។
លោកបានថ្លែងថា៖ «អ្វីដែលអនុវត្តទូទៅសម្រាប់ប្រជាពលរដ្ឋដែលមានអចលនទ្រព្យរាប់សិបលានដុល្លារដែលបានលក់ទៅ និងចំណេញនេះបានផលមកច្រើនគឺត្រូវមានកាតព្វកិច្ចដល់ពេលត្រូវបង់ពន្ធហើយ ដូច្នេះវាអត់ប៉ះពាល់ដល់ក្រុមហ៊ុនដែលអភិវឌ្ឍអចលនទ្រព្យនោះទេ ហើយប្រជាជនទូទៅបើលក់អត់ចំណេញធ្វើបញ្ជីមកច្បាស់លាស់ថាអត់ចំណេញគេក៏អត់យកពន្ធនេះដែរ ដូច្នេះខ្ញុំជឿថាការដែលដាក់ឱ្យអនុវត្តនាពេលខាងមុខនេះគឺវានឹងមិនប៉ះពាល់អ្វីទេ បើចំណេញត្រូវបង់ពន្ធទៅ បើខាតអត់បង់ទេ»។
លោក គឹម ហ៊ាង ប្រធានក្រុមហ៊ុនអចលនទ្រព្យ KW Cambodia បានគាំទ្រចំពោះការដាក់ឱ្យដំណើរការអនុវត្តន៍ពន្ធប្រភេទនេះ ប៉ុន្តែលោកថាស្ថានភាពសេដ្ឋកិច្ចពេលនេះគឺហាក់មិនទាន់អំណោយផលក្នុងការយកពន្ធប្រភេទនេះនៅឡើយទេ គួរតែបន្តពន្យារពេលដល់ឆ្នាំ ២០២៦ បើទោះរដ្ឋាភិបាលធ្លាប់បានពន្យារពេល ៣ ដងរួចមកហើយក្ដី។
លោកលើកឡើងថា៖ «យើងឃើញថា វិស័យនេះហាក់មិនទាន់រីកចម្រើនទេ ដោយសារតែការធ្លាក់ចុះសេដ្ឋកិច្ចសកលដូចយើងឃើញនៅតាមប្រទេសនានាគេក៏បានបន្តបន្ធូរបន្ថយពន្ធនានាផងដែរដើម្បីជួយដល់ក្រុមហ៊ុនក្នុងការបន្តដំណើរការអាជីវកម្ម។ ដូច្នេះខ្ញុំយល់ឃើញថារដ្ឋាភិបាលយើងក៏គួរពិចារណាក្នុងការដាក់ឱ្យអនុវត្តពន្ធលើចំណេញមូលធននេះដល់ឆ្នាំ ២០២៦ ដើម្បីទុកឱកាសឱ្យសេដ្ឋកិច្ចដំណើរការបានល្អក៏ដូចជាវិស័យអចលនទ្រព្យងើបឡើងវិញផងដែរ»។
យោងតាមប្រកាសរបស់ក្រសួងសេដ្ឋកិច្ច និងហិរញ្ញវត្ថុ ចុះកាលពីថ្ងៃទី ១ ខែមេសា ឆ្នាំ ២០២០ ការបង់ពន្ធនេះគឺបានមកពីការលក់នៃអចលនទ្រព្យមួយចំនួនដូចជា ដី អគារ ភាគហ៊ុន អាជ្ញាប័ណ្ណ ប៉ាតង់ សញ្ញាបណ្ណបំណុល និងរូបិយប័ណ្ណក្នុងអត្រា ២០ ភាគរយ។
រាជរដ្ឋាភិបាលក៏សម្រេចលើកលែងពន្ធលើចំណេញមូលធនចំពោះការលក់ និងផ្ទេរដីកសិកម្មជាកម្មសិទ្ធិ ឬសិទ្ធិកាន់កាប់របស់ប្រជាពលរដ្ឋដែលជាកសិករកំពុងបង្កបង្កើនផលពិតប្រាកដ និងមានអាសយដ្ឋានរស់នៅស្ថិតនៅក្នុងឃុំសង្កាត់លើដីកំពុងធ្វើកសិកម្ម។
សេចក្តីប្រកាសព័ត៌មាននេះ បន្តថា ចំពោះការគណនាប្រាក់ពន្ធលើចំណេញមូលធន គឺយកប្រាក់ចំណេញពីការលក់ ឬផ្ទេរមូលធន គុណនឹងអត្រាពន្ធ ២០ ភាគរយ ហើយសម្រាប់មូលធនជាអចលនទ្រព្យ ម្ចាស់អចលនទ្រព្យអាចជ្រើសរើសវិធីសាស្ត្រកាត់កងចំណាយចំនួន ២ គឺតាមវិធីសាស្ត្រកាត់កងចំណាយតាមការកំណត់ និងវិធីសាស្ត្រកាត់កងតាមចំណាយជាក់ស្តែង៕
