សំណង់អគារលំនៅឋានជាច្រើននៅក្នុងរាជធានីភ្នំពេញ។ ភ្នំពេញប៉ុស្តិ៍
ដើម្បីចូលរួមចំណែកជំរុញវិស័យអចលទ្រព្យឱ្យឆាប់មានសម្ទុះឡើងវិញ រាជរដ្ឋាភិបាលកម្ពុជាបានសម្រេចបន្តអនុគ្រោះឱ្យរួចពន្ធប្រថាប់ត្រាសម្រាប់អ្នកទិញលំនៅឋានដែលមានតម្លៃក្រោម ៧ ម៉ឺនដុល្លាររហូតដល់ដំណាច់ឆ្នាំ ២០២៥ បើទោះបីលំនៅឋាននោះមានកិច្ចសន្យាទិញ-លក់ ជាយូរមកហើយក៏ដោយ។
នេះជាការលើកឡើងរបស់លោកនាយករដ្ឋមន្ត្រី ហ៊ុន ម៉ាណែត ក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៣ និងឆ្នាំ ២០២៤ និងទិសដៅការងារឆ្នាំ ២០២៥ របស់ក្រសួងរៀបចំដែនដី នគរូបនីយកម្ម និងសំណង់ កាលពីរសៀលថ្ងៃទី ២៦ ខែវិច្ឆិកា ឆ្នាំ ២០២៤។
លោក ហ៊ុន ម៉ាណែត បានប្រកាសថា រាជរដ្ឋាភិបាលកម្ពុជាបានសម្រេចផ្តល់គោលការណ៍ចំនួន ២ ក្នុងការសង្គ្រោះ និងលើកកម្ពស់វិស័យលំនៅឋានគ្រប់ប្រភេទដែលមានលក្ខណៈជាបុរី ក៏ដូចជាជួយដល់ប្រជាជនដែលជាម្ចាស់អចលនទ្រព្យក្នុងបុរី និងត្រៀមខ្លួនធ្វើជាម្ចាស់អចលនទ្រព្យថ្មីក្នុងបុរី គឺទី១-ផ្តល់ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់លំនៅឋានគ្រប់ប្រភេទ ដែលមានលក្ខណៈជាបុរី និងមានតម្លៃក្រោម ៧ ម៉ឺនដុល្លារ និង២- ផ្តល់ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់លំនៅឋានគ្រប់ប្រភេទ ដែលមានលក្ខណៈជាបុរី សម្រាប់ម្ចាស់អចលនទ្រព្យក្នុងបុរីដែលជាអ្នកទិញលើកដំបូង និងមានតម្លៃក្រោម ២១ ម៉ឺនដុល្លារ។
លោកបានថ្លែងថា៖ «អ្នកទិញមុនថ្ងៃទី២៥ ខែកុម្ភៈ ឆ្នាំ ២០២០ (គោលការណ៍ដាក់ចេញដោយអតីតនាយករដ្ឋមន្ត្រី លោក ហ៊ុន សែន) អត់បានការអនុគ្រោះពន្ធប្រថាប់ត្រាទេ។ ឥឡូវខ្ញុំថា កុំពិបាក អ្នកទិញមុនក៏ទិញចុះឱ្យតែក្រោម ៧ ម៉ឺនដុល្លារ ហើយអនុគ្រោះពន្ធប្រថាប់ត្រាឱ្យគាត់រហូតដល់ចុងឆ្នាំ ២០២៥ អ្នកដែលមិនទាន់ទៅកាត់ឈ្មោះ សូមទៅកាត់ចុះ អនុគ្រោះពន្ធប្រថាប់ត្រាឱ្យគាត់»។
លោកបន្ថែមថា៖«ឥឡូវខ្ញុំកំពុងឱ្យរៀបចំគោលការណ៍មួយទៀត គឺសម្រាប់អ្នកទិញផ្ទះលើកទី១ ក្នុងបុរី ឬខុនដូ ដើម្បីជួយឱ្យអ្នកទិញដែលមានតម្លៃលើសពី ៧ ម៉ឺនដុល្លារ តែក្រោម ២១ ម៉ឺនដុល្លារ គឺឱ្យរួចពន្ធប្រថាប់ត្រាដែរអនុវត្តរហូតដល់ឆ្នាំ ២០២៥»។
លោកអះអាងថា វិស័យអចលនទ្រព្យ គឺត្រូវតែថែរក្សាកុំឱ្យដួលរលំ ព្រោះបើដួលរលំវានឹងបង្កផលប៉ះពាល់ច្រើនទៅដល់សេដ្ឋកិច្ច និងសង្គមទាំងមូល។
លោកថ្លែងថា៖«បើវិស័យអចលនទ្រព្យមានបញ្ហា វានឹងជះឥទ្ធិពលដល់វិស័យធនាគារ និងអ្វីៗផ្សេងទៀតទាំងអស់ អ៊ីចឹងនេះហើយជាគោលដៅធំបំផុតរបស់យើង ២ មុខព្រួញដែលត្រូវធ្វើ គឺទី១ ដោះស្រាយបញ្ហាចំពោះមុខវិវាទ ទី២ ត្រូវធ្វើម៉េចធានាការរស់រានមានជីវិតមិនឱ្យស្លាប់នៃវិស័យអចលនទ្រព្យ។ នេះគឺជាគោលដៅធំដែលត្រូវធ្វើ»។
ប្រធានសមាគមអចលនទ្រព្យសកល និងជាប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP លោក សំ សុខនឿន បានប្រាប់ភ្នំពេញប៉ុស្តិ៍ក្នុងថ្ងៃទី២៧ ខែវិច្ឆិកាថា គោលនយោបាយបន្តផ្តល់ភាពអនុគ្រោះឱ្យរួចពន្ធប្រថាប់ត្រាសម្រាប់អ្នកទិញផ្ទះដែលមានតម្លៃក្រោម ៧ ម៉ឺនដុល្លាររហូតដល់ឆ្នាំ ២០២៥ គឺជាមធ្យោបាយដ៏ល្អក្នុងការជួយគាំទ្រ និងជាកម្លាំងចលករដើម្បីធ្វើឱ្យវិស័យអចលនទ្រព្យនៅកម្ពុជាងើបឡើងវិញជាជំហានៗ បន្ទាប់ពីធ្លាក់ចុះយ៉ាងគំហុកចាប់តាំងពីការផ្ទុះឡើងនៃជំងឺកូវីដ១៩។
លោកបន្តថា ការបន្តអនុវត្តគោលនយោបាយអនុគ្រោះពន្ធប្រថាប់ត្រា គឺមិនត្រឹមតែជួយសម្រាលបន្ទុកប្រជាពលរដ្ឋដែលមានតម្រូវការទិញ-លក់លំនៅឋានប៉ុណ្ណោះទេ ប៉ុន្តែក៏នឹងជួយទៅដល់ម្ចាស់គម្រោងសាងសង់លំនៅឋាន និងបុរីនានាឱ្យពង្រឹង និងពង្រីកគម្រោងសាងសង់របស់ខ្លួនផងដែរ ពិសេសលំនៅឋានដែលមានតម្លៃសមរម្យ។
លោកនិយាយថា៖«គោលនយោបាយអនុគ្រោះពន្ធសម្រាប់លំនៅឋានតម្លៃក្រោម ៧ ម៉ឺនដុល្លារ គឺជាការចូលរួមចំណែករបស់រាជរដ្ឋាភិបាលក្នុងការផ្តល់លទ្ធភាពឱ្យប្រជាពលរដ្ឋមានប្រាក់ចំណូលមធ្យម អាចមានលទ្ធភាពទិញលំនៅឋានផ្ទាល់ខ្លួនបាន»។
ទាក់ទងនឹងអ្នកទិញផ្ទះលើកដំបូងមានតម្លៃក្រោម ២១ ម៉ឺនដុល្លារ នឹងទទួលបានការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់លំនៅឋាននោះ លោក សុខនឿន បានអះអាងថា គោលការណ៍នេះគឺសម្រាប់អ្នកដែលទិញផ្ទះលើកដំបូងប៉ុណ្ណោះ គឺការទិញសម្រាប់ស្នាក់នៅ ដោយមិនមែនជាការទិញទុកសម្រាប់វិនិយោគបន្តឡើយ។
នៅក្នុងពិធីខាងលើផងដែរ លោកនាយករដ្ឋមន្ត្រីក៏បានធ្វើការណែនាំឱ្យអាជ្ញាធរជំនាញត្រូវមានផែនការរៀបចំផែនការអភិវឌ្ឍទីក្រុងថ្មីៗមានភាពច្បាស់លាស់ ដោធ្វើការកំណត់ទីតាំងឱ្យបានច្បាស់លាស់ (Zooning) ដូចជា ទីតាំងសម្រាប់សាងសង់លំនៅឋាន កន្លែងកម្សាន្ត-អាហារដ្ឋាន កន្លែងលក់ទំនិញ។
លោកបានថ្លែងថា៖«អ៊ីចឹងគិតឱ្យហើយ(អាជ្ញាធរ)ប្លង់សំណាង់ គឺមានផ្លូវសម្រាប់មធ្យោបាយអស់ហ្នឹងឱ្យហើយ ជាពិសេសនៅតំបន់ថ្មី នៅតំបន់ចាស់យើងពិបាកពង្រីកណាស់ព្រោះផ្លូវពង្រីកអស់ហើយ កន្លែងខ្លះខ្ញុំមើលពីក្មេងនៅចិញ្ចើមធំ ឥឡូវអស់ចិញ្ចើមបាត់ហើយ នៅតែអត់គ្រាន់។ ខាងក្រោមដីយើងអាចសិក្សាយូរ ពិបាក ចឹងដោះស្រាយលើដីដែលមានស្រាប់»។
របាយការណ៍បានឱ្យដឹងថា ចាប់ផ្តើមអនុវត្តក្នុងឆ្នាំ ២០០០ ដល់ខែកក្កដា ឆ្នាំ ២០២៤ រដ្ឋាភិបាលកម្ពុជាបានចេញលិខិតអនុញ្ញាតសាងសង់នៅទូទាំងប្រទេសចំនួន ៦៦ ៩៧៨ គម្រោង ដែលស្មើនឹងផ្ទៃក្រឡាកម្រាលសំណង់សរុប ១៩៤ ៣១០ ១៩៦ ម៉ែត្រការ៉េ និងមានតម្លៃប៉ាន់ស្មានទុនវិនិយោគសរុបប្រមាណ ៧៧ ៧១៩ ៧៧៩ ៨៩៩ ដុល្លារ៕
