លោកនាយករដ្ឋមន្រ្តី ហ៊ុន ម៉ាណែត ថ្លែងក្នុងពិធី «បិទសន្និបាតបូកសរុបលទ្ធផលការងារឆ្នាំ២០២៤ និង ទិសដៅការងារឆ្នាំបន្ត របស់ក្រសួងដែនដី នគរូបនីយកម្ម និងសំណង់» នាថ្ងៃទី២៦ ខែវិច្ឆិកានេះ។ រូបថត STPM
ភ្នំពេញៈ ប្រមុខរដ្ឋាភិបាលបានណែនាំឱ្យភាគីពាក់ព័ន្ធបន្តដោះស្រាយវិវាទគម្រោងអភិវឌ្ឍន៍អចលនវត្ថុ ដែលនៅសេសសល់ចំនួន ៤៦គម្រោង ប្រកបដោយភាពបត់បែនទន់ភ្លន់ និង យោគយល់គ្នា ដើម្បីបញ្ចប់បញ្ហាដែលជៀសវាងការអនុវត្តច្បាប់។
ក្នុងពិធី «បិទសន្និបាតបូកសរុបលទ្ធផលការងារឆ្នាំ២០២៤ និង ទិសដៅការងារឆ្នាំបន្ត របស់ក្រសួងដែនដី នគរូបនីយកម្ម និងសំណង់» នាថ្ងៃទី២៦ ខែវិច្ឆិកានេះ លោកនាយករដ្ឋមន្រ្តី ហ៊ុន ម៉ាណែតអំពាវនាវឱ្យអតិថជន ម្ចាស់គម្រោងបុរី ក្រសួងដែនដី ឬម្ចាស់បំណុលជាដើម បន្តដោះស្រាយវិវាទនៅសល់ចំនួន ៤៦ ក្នុងចំណោមគម្រោង៩៩។
លោកនាយករដ្ឋមន្រ្តីមានប្រសាសន៍ថា៖ «ខាងបុរីមួយចំនួនសំណូមពរថាឱ្យអនុវត្តច្បាប់ទៅលើអ្នកនេះ រឹង។ អតិថិជនទាមទារឱ្យអនុវត្តច្បាប់ចាប់ម្ចាស់បុរី។ ខាងធនាគារថាត្រូវតែអនុវត្តលើអ្នកដែលអត់បង់ ត្រូវចាប់។ ខ្ញុំថាបើរវល់ តែចាប់គ្រប់គ្នា រលាយហើយ។ វាបង្កើតនូវភាពកាន់តែរំជើបរំជួល។ ៩៩ គម្រោងនេះ ប្រសិនបើមានបញ្ហា ចាប់ម្ចាស់៩៩នាក់ បានអ្នកណាដោះស្រាយ។ ហ្នឹងហើយដែលយើងត្រូវគិតគូរ»។
ខណៈពេលបុរីខ្លះបានក្ស័យធន់ ហើយបុរីខ្លះក៏មានលទ្ធភាពដោះស្រាយបញ្ហា ក្រោយពេលស្ថានភាពបានប្រសើរឡើងវិញខ្លះៗនោះ ប្រមុខរដ្ឋាភិបាលបានណែនាំថា បញ្ហាវិវាទនៅបុរីត្រូវដោះស្រាយដោយភាពបត់បែនទន់ភ្លន់ យោគយល់គ្នា ដើម្បីឈានទៅបញ្ចប់បញ្ហា។
លោកថ្លែងដូច្នេះថា៖ «ម្ចាស់បុរី អតិថិជន ក្រសួង និងម្ចាស់បំណុល ត្រូវរួមគ្នាដោះស្រាយ។ ៩៩គម្រោងដោះបាន ៥៣នេះ ទោះគ្មានការស្រែកអីផ្សេងៗតែយើងទប់សភាពការណ៍ណាស់។ បើដោះមិនចេញខាតទាំងអស់គ្នា។ បើឱ្យទៅចាប់អ្នកណាទៅដោះស្រាយ។...យើងជាជនរងគ្រោះទាំងអស់គ្នា ត្រូវដោះស្រាយ ផ្អែកលើមូលដ្ឋាននេះ ដើម្បីយើងរកដំណោះស្រាយទាំងអស់គ្នា។ ជួយគ្នាដោះ»។
ទាក់ទងនឹងបញ្ហាវិវាទរវាងបុរី និងអតិថិជននេះ លោកឧបនាយករដ្ឋមន្ដ្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានថ្លែងក្នុងឱកាសនោះថា ក្រសួងកំពុងសម្របសម្រួលដោះស្រាយបន្តវិវាទដែលនៅសល់នោះ ដោយឈរលើស្មារតីយោគយល់គ្នា ក្នុងគ្រាលំបាក និងបានធ្វើឱ្យសភាពការណ៍តានតឹងទាំងនេះ បានប្រសើរឡើងវិញជាលំដាប់។
ក្នុងចំណោមគម្រោងទាំង៩៩នៅទូទាំងប្រទេសនោះរួមមាន បុរីចំនួន២៧ ស្មើនឹង ៧៧គម្រោង, ផ្សារ និងខុនដូ ចំនួន៤គម្រោង និងដីឡូតិ៍ ចំនួន១៨ គម្រោងជាដើម។
លោករដ្ឋមន្រ្តីក៏បានថ្លែងផងដែរថា ក្រសួងទទួលបាន ១៥ ៩៦០ករណី នៃវិវាទ ដែលមាន ៤ប្រភេទ។ ក្នុងនោះរួមមាន វិវាទលើដីឯកជន, វិវាទលើទីតាំងដីរដ្ឋ និងដីសហគមន៍, បណ្ដឹងជំទាស់លើសេចក្តីសម្រេចរបស់ស្ថាប័នតុលាការ និងសេចក្តី សម្រេចរាជរដ្ឋាភិបាលរួចហើយ និង បណ្ដឹង ឬសំណើ ដែលមានចរិតនយោបាយ។ ក្រសួងបានសម្របសម្រួល ដោះស្រាយបញ្ចប់ចំនួន ១៤ ៩១៩ ករណី ដែលនៅសេសសល់ចំនួន ១ ០៤១ករណី។
លោកបានបញ្ជាក់ថា៖«តាមរយៈលទ្ធផល នៃការដោះស្រាយវិវាទដីធ្លីនេះ យើងអាចសន្និដ្ឋានបានថា ភាពរសើបខាង នយោបាយត្រូវបានកាត់បន្ថយជាអតិបរមា ហើយវិវាទដែលនៅសេសសល់ទាំងនេះ មិនមានលក្ខណៈ បែបញ្ចុះញង់ដែលជាឈ្លាន់យោបាយទៀតនោះឡើយ»។
លោកឧបនាយករដ្ឋមន្ដ្រីក៏បានឱ្យដឹងផងដែរថា ដើម្បីលើកស្ទួយជីវភាពប្រជាជនឱ្យកាន់តែប្រសើរឡើង បង្កើតបន្ថែមនូវខឿនសេដ្ឋកិច្ចនៅមូលដ្ឋាន និងខឿនសេដ្ឋកិច្ចគ្រួសារ រាជរដ្ឋាភិបាល បានផ្តល់ដីសម្បទានសង្គមកិច្ចជូនអតីតកងកម្លាំងប្រដាប់អាវុធ និងគ្រួសារ, គ្រួសារកងទ័ព និងនគរបាលជាតិតាមព្រំដែន ព្រមទាំងប្រជាពលរដ្ឋក្រីក្រទូទៅ ក្នុង ខេត្តគោលដៅចំនួន ១៨ នៅទូទាំងប្រទេស សរុបចំនួន ៤៨៧ ៤៥៧គ្រួសារ។ បន្ថែមពីនោះបានសាងសង់ផ្ទះ ចំនួន ៨ ១៤១ ខ្នង និងបានចេញបណ្ណកម្មសិទ្ធិដីធ្លីជូនសម្បទានិកចំនួន ៦៥៤ ១៩៩ បណ្ណ។
ទន្ទឹមនេះផងដែរ ក្រសួងបាននិងកំពុងអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាល ទី៣ (LASED III) ដែលត្រូវបានបង្កើតឡើងដើម្បីគាំទ្រដល់កម្មវិធីសម្បទានដីសង្គមកិច្ចរបស់រាជរដ្ឋា ភិបាល ក្នុងការបែងចែកដីលំនៅឋាន និងដីធ្វើកសិកម្មជាលក្ខណៈគ្រួសារដល់អ្នកក្រីក្រ អ្នកគ្មានដី និងអ្នកមានដីតិចតួច ដើម្បីធ្វើឱ្យប្រសើរឡើងនូវជីវភាពរបស់ពួកគាត់។
គម្រោងនេះ បាននិងកំពុង ចូលរួមចំណែកក្នុងការកាត់បន្ថយភាពក្រីក្រ បង្កើតឱកាសសហគ្រិនភាពដល់ប្រជាជន និងកសាង ជីវភាពថ្មី តាមរយៈការផ្តល់លទ្ធភាពទទួលបានសុវត្ថិភាពដីធ្លី លំនៅឋាន សេវាសង្គម ហេដ្ឋារចនាសម្ព័ន្ធ ការផ្តល់ពូជសត្វ និងពូជដំណាំចម្រុះ៕
