ទិដ្ឋភាពសំណង់អគារនិងផ្ទះប្រជាពលរដ្ឋក្នុងរាជធានីភ្នំពេញ។ Post Staff
ភ្នំពេញៈ អ្នកជំនាញវិស័យអចលនទ្រព្យ និងអ្នកសេដ្ឋកិច្ច បានអះអាងថា ឆន្ទៈ និងចំណេះដឹងអំពីកាតព្វកិច្ចបង់ពន្ធអចលនទ្រព្យនៅប្រទេសកម្ពុជាបានបង្ហាញពីសញ្ញាវិជ្ជមានជាបន្តបន្ទាប់ ខណៈកាលបរិច្ឆេទនៃការបង់ពន្ធអចលនទ្រព្យប្រចាំឆ្នាំ ២០២៤ នឹងត្រូវបិទបញ្ចប់នៅចុងខែកញ្ញានេះ។
ជាទូទៅការប្រមូលពន្ធអចលនទ្រព្យនៅកម្ពុជា តែងធ្វើឡើងរៀងរាល់ឆ្នាំ ចន្លោះពីខែមិថុនា-កញ្ញា លើកលែងតែនៅក្នុងអំឡុងពេលដែលពិភពលោកជួបនឹងវិបត្តិនៃការរីករាលដាលជំងឺកូវីដ១៩ ដែលការប្រមូលពន្ធអចលនទ្រព្យ ត្រូវបានពន្យាដល់ដំណាច់ខែតុលា។
សេចក្តីជូនដំណឹងរបស់អគ្គនាយកដ្ឋានពន្ធដារ(GDT) ក្នុងថ្ងៃទី១៩ ខែកញ្ញា បានក្រើនរំលឹកដល់អ្នកជាប់កាតព្វកិច្ចបង់ពន្ធអចលនទ្រព្យទាំងអស់ឱ្យរួសរាល់ទៅបង់ពន្ធ ដោយនឹងត្រូវបិទបញ្ចប់ត្រឹមថ្ងៃទី៣០ ខែកញ្ញានេះ។
GDT បានបញ្ជាក់ថា៖«នៅសល់តែប្រមាណ ១១ ថ្ងៃទៀតប៉ុណ្ណោះ ពោលគឺថ្ងៃទី៣០ ខែកញ្ញា ខាងមុខនេះ ពន្ធលើអចលនទ្រព្យសម្រាប់ឆ្នាំ ២០២៤ នឹងត្រូវផុតកំណត់ ដូច្នេះម្ចាស់អចលនទ្រព្យដែលខកខានមិនបានបំពេញកាតព្វកិច្ចប្រកាស និងបង់ប្រាក់ពន្ធលើអចលនទ្រព្យបានទាន់ពេលវេលា នឹងត្រូវទទួលរងនូវទណ្ឌកម្មរដ្ឋបាលស្របតាមច្បាប់ និងលិខិតបទដ្ឋានគតិយុត្តជាធរមាន»។
GDT បានឱ្យដឹងទៀតថា ចំពោះអចលនទ្រព្យដែលបានចុះបញ្ជី និង/ឬ ធ្វើបច្ចុប្បន្នភាពព័ត៌មានអចលនទ្រព្យរបស់ខ្លួនរួចរាល់ គឺអាចប្រកាស និងបង់ប្រាក់ពន្ធបានទាំងដោយផ្ទាល់ និងអនឡាញ។ ដោយឡែកអចលនទ្រព្យដែលមិនទាន់បានចុះបញ្ជី និង/ឬធ្វើបច្ចុប្បន្នភាពព័ត៌មានអចលនទ្រព្យរបស់ខ្លួន ត្រូវរួសរាន់មកចុះបញ្ជី និង/ឬ ធ្វើបច្ចុប្បន្នភាពនៅអគ្គនាយកដ្ឋានពន្ធដារ ឬនៅសាខាពន្ធដារខេត្ត-ខណ្ឌ ដែលអចលនទ្រព្យនោះស្ថិតនៅ ដោយភ្ជាប់មកជាមួយនូវឯកសារមួយចំនួនតាមច្បាប់កំណត់។
ប្រធានសមាគមអចលនទ្រព្យសកល និងជាប្រធានសម្ព័ន្ធក្រុមហ៊ុន SAM SN Group លោក សំ សុខនឿន បានប្រាប់ភ្នំពេញប៉ុស្តិ៍នៅថ្ងៃទី១៩ ខែកញ្ញា ថា ចំណេះដឹងរបស់ប្រជាពលរដ្ឋម្ចាស់កម្មសិទ្ធិលើអចលនទ្រព្យនៅកម្ពុជាទាក់ទងនឹងការបង់ពន្ធអចលនទ្រព្យ នាពេលនេះ គឺមានភាពល្អប្រសើរច្រើនបើធៀបនឹងរយៈពេលជាង ១០ ឆ្នាំមុន។ ការយល់ដឹងពីកាតព្វកិច្ច និងសកម្មភាពបង់ពន្ធពីសំណាក់អ្នកជាប់កាតព្វកិច្ច គឺពិតជាមានសារៈសំខាន់ណាស់ក្នុងការជួយឱ្យរដ្ឋាភិបាលមានថវិកាយកទៅអភិវឌ្ឍន៍ប្រទេសជាតិ និងជំរុញកំណើនសេដ្ឋកិច្ច។
លោកបញ្ជាក់ថា៖«ចំណូលពន្ធ រួមទាំងពន្ធអចលនទ្រព្យ គឺជាប្រភពចំណូលសំខាន់មួយរបស់រដ្ឋាភិបាលសម្រាប់យកទៅអភិវឌ្ឍន៍ប្រទេស ក៏ដូចជាកសាងហេដ្ឋារចនាសម្ព័ន្ធផ្សេងៗ»។ លោកបន្តថា៖«ខ្ញុំសង្កេតឃើញថា ឆន្ទៈរបស់អ្នកជាប់កាតព្វកិច្ចពន្ធអចលនទ្រព្យពេលនេះ គឺមានភាពល្អប្រសើរច្រើនបើធៀបទៅឆ្នាំមុនៗ»។
ទោះយ៉ាងណា ជាមួយនឹងបទពិសោធជាអ្នកជំនាញក្នុងវិស័យអចលនទ្រព្យជាង ១ ទសវត្សរ៍ លោក សុខនឿន បានអះអាងថា នីតិវិធីក្នុងការប្រមូលពន្ធអចលនទ្រព្យនៅកម្ពុជា គឺមិនទាន់ល្អប្រសើរខ្លាំង ឬបង្កភាពងាយស្រួលដល់ម្ចាស់អចលនទ្រព្យឡើយ ទាំងនៅក្នុងរាជធានីភ្នំពេញ និងបណ្តាខេត្ត ដោយលោកតែងសង្កេតឃើញអំឡុងពេលបង់ពន្ធម្តងៗ គឺម្ចាស់អចលនទ្រព្យមួយចំនួនបានជួបនឹងបញ្ហាក្នុងការបំពេញឯកសារ ឬខ្វះឯកសារ ដែលបង្ខំចិត្តពួកគេឱ្យទៅស្វែងរកភ្នាក់ងារ ឬក្រុមហ៊ុនផ្តល់សេវាកម្មឱ្យជួយសម្រួល។
លោកលើកឡើងថា៖«ត្រង់ចំណុចនេះ ខ្ញុំសូមស្នើឱ្យអគ្គនាយកដ្ឋានពន្ធដារសូមព្យាយាមសម្រួលនីតិវិធីឱ្យកាន់តែងាយស្រួលបន្ថែមទៀត»។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ថា ការផ្សព្វផ្សាយរបស់អាជ្ញាធរអំពីកាតព្វកិច្ចបង់ពន្ធ និងការយល់ដឹងរបស់ប្រជាជន បានជួយឱ្យប្រាក់ចំណូលពន្ធអចលនទ្រព្យ កើនឡើងជាបន្តបន្ទាប់នៅកម្ពុជា។ ប្រាក់ពន្ធ គឺជាប្រភពចំណូលសំខាន់សម្រាប់សេដ្ឋកិច្ចប្រទេសនីមួយៗ។
លោកបន្តថា ក្រៅពីពន្ធលើអាជីវកម្ម និងវិស័យផ្សេងៗ វិស័យអចលនទ្រព្យ ក៏ជាផ្នែកសំខាន់មួយសម្រាប់ចំណូលពន្ធដារ។ លោកបន្តថា ការប្រមូលចំណូលពន្ធពីវិស័យអចលនទ្រព្យនៅកម្ពុជានាពេលបច្ចុប្បន្ន គឺនៅមិនទាន់មានភាពច្បាស់លាស់ និងតម្លាភាពនៅឡើយទេ ដែលទាមទារឱ្យអាជ្ញាធរ ត្រូវធ្វើបច្ចុប្បន្នភាពឱ្យបានច្បាស់លាស់ថែមទៀត ពិសេសស្ថានភាពនៃការប្រែប្រួលប្រភេទសំណង់ កម្ពស់ និងស្ថានភាពនៃប្រើប្រាស់ដីធ្លី ជាដើម។
លោកនិយាយថា៖«ពន្ធពីវិស័យអចលនទ្រព្យ នឹងមានកាន់តែច្រើននៅពេលរដ្ឋាភិបាលធ្វើការចុះបញ្ជីដី និងសំណង់អគារទូទាំងប្រទេសរួចរាល់ ខណៈបច្ចុប្បន្នយើងមានច្បាប់ និងនីតិវិធីរួចហើយ គ្រាន់តែការអនុវត្តច្បាប់ និងការចូលរួមអនុវត្តកាតព្វកិច្ចរបស់អ្នកជាប់កាតព្វកិច្ចនៅមិនទាន់មានភាពល្អប្រសើរ ១០០ភាគរយ»៕
