លោក ទៀ បាញ់ បានបង្ហាញទង់ស៊ីហ្គេមបន្ទាប់ពីលោកនិងប្រតិភូកីឡាកម្ពុជាបាននាំយកមកដល់ប្រទេសកម្ពុជា។ ហេង ជីវ័ន
ភ្នំពេញៈ ជាប្រទេសមួយដែលបានទទួលរងនូវការដាក់អាណានិគមពីបរទេសរួចកើតមានសង្រ្គាមរ៉ាំរ៉ៃក្នុងស្រុកជាបន្តបន្ទាប់គ្នាអស់ជាច្រើនសម័យកាលនោះ កម្ពុជាបានខំប្រឹងរើបម្រះពីរបបសម័យកាលដ៏ជូរចត់និងខ្មៅងងឹតទាំងនោះរហូតអាចវិវឌ្ឍខ្លួនក្លាយជារដ្ឋមួយដែលទទួលបានសេរីភាពពេញលេញ និងមានសុខសន្តិភាពដូចបច្ចុប្បន្ន។
ជាមួយគ្នានេះវិស័យកីឡាក៏ត្រូវបានយកចិត្តទុកដាក់ពីរាជរដ្ឋាភិបាលដើម្បីបង្កើតបានជាសហព័ន្ធកីឡាជាតិជាបន្តបន្ទាប់ដើម្បីធ្វើការបណ្តុះបណ្តាលនូវធនធានកីឡាទាំងក្រុមអត្តពលិកនិងមន្រ្តីបច្ចេកទេសហើយក្នុងរយៈពេលជិត៤០ឆ្នាំចុងក្រោយមកនេះកម្ពុជាបានបញ្ជូនប្រតិភូកីឡាចេញទៅប្រកួតប្រជែងនៅលើឆាកអន្តរជាតិជាបន្តបន្ទាប់និងដណ្តើមបានមេដាយជូនជាតិជាហូរហែជាពិសេសនៅក្នុងការប្រកួតស៊ីហ្គេមដែលជាព្រឹត្តិការណ៍ដ៏ធំប្រចាំនៅតំបន់អាស៊ាន។
យ៉ាងណាក៏ដោយចាប់តាំងពីការប្រកួតស៊ីហ្គេមត្រូវបានបង្កើតឱ្យមានការប្រកួតជាលើកដំបូងនៅទីក្រុងបាងកកប្រទេសថៃឆ្នាំ១៩៥៩ រហូតមកដល់ពេលនេះកម្ពុជាមិនធ្លាប់បានធ្វើជាម្ចាស់ផ្ទះស៊ីហ្គេមនៅឡើយទេខណៈថៃនិងម៉ាឡេស៊ីធ្លាប់ធ្វើម្ចាស់ផ្ទះ៦ដងដូចគ្នាហើយឥណ្ឌូនេស៊ីសិង្ហបុរីនិងហ្វីលីពីនបាន៤ដងដូចគ្នារីឯមីយ៉ាន់ម៉ាបាន៣ដងវៀតណាមបាន២ដងហើយប្រ៊ុយណេនិងឡាវបានធ្វើម្ចាស់ផ្ទះ១ដងដូចគ្នាតែទីម័រខាងកើតនៅមិនទាន់ធ្លាប់បានធ្វើដូចកម្ពុជាដែរ។
តែទោះបីជាយ៉ាងណាដោយមើលឃើញពីភាពរីកចម្រើននិងសក្តានុពលនៃវិស័យកីឡានៅកម្ពុជាដែលអាចដណ្តើមបានមេដាយគ្រប់កម្រិតទាំងការប្រកួតជើងឯកពិភពលោកអាស៊ី និងអាស៊ានជាពិសេសការបំបែកកំណត់ត្រានៃការឈ្នះមេដាយមាសកីឡាអាស៊ីជាបន្តបន្ទាប់គ្នារបស់អត្តពលិកកម្ពុជានិងការកើនឡើងនៃការប្រមាញ់បានមេដាយមាសក្នុងព្រឹត្តិការណ៍ស៊ីហ្គេមស្របពេលកម្ពុជាមានសុខសន្តិភាពផងនោះបានជំរុញឱ្យប្រមុខដឹកនាំប្រទេសលោកនាយករដ្ឋមន្ត្រី ហ៊ុន សែន សម្រេចនិងអនុញ្ញាតឱ្យកម្ពុជាទទួលសិទ្ធិធ្វើជាម្ចាស់ផ្ទះស៊ីហ្គេមជាប្រវត្តិសាស្រ្តលើកដំបូងនៅឆ្នាំ២០២៣។
យ៉ាងណាក៏ដោយចំពោះការទទួលធ្វើម្ចាស់ផ្ទះស៊ីហ្គេមនេះលោកនាយករដ្ឋមន្រ្តី ហ៊ុន សែន បានប្រាប់ទៅក្រុមមន្រ្តីជំនាញនិងអ្នកពាក់ព័ន្ធទាំងអស់កន្លងមកថា៖ «យើងត្រូវចងចាំឱ្យច្បាស់ថាយើងមានតួនាទីជាម្ចាស់ផ្ទះដូច្នេះយើងត្រូវធ្វើជាម្ចាស់ផ្ទះដែលមានការទទួលខុសត្រូវហើយការប្រកួតត្រូវប្រព្រឹត្តទៅឱ្យរលូនពីដើមដល់ចប់ មិនធ្វើឱ្យកីឡាករកីឡាការិនីនិងអ្នកដឹកនាំនៃប្រទេសនានាដែលចូលរួមប្រកួតបាក់ទឹកចិត្តហើយធ្វើឱ្យខូចនូវមុខមាត់ប្រទេសយើងនោះទេ»។
ប្រមុខដឹកនាំប្រទេសកម្ពុជារូបនេះបានបន្ថែមថា៖ «ការដណ្តើមមេដាយជារឿងទី២ទេប៉ុន្តែរឿងធានារ៉ាប់រងក្នុងឋានៈជាសមាជិកអាស៊ានដែលមានការទទួលខុសត្រូវគឺត្រូវធ្វើការងារនេះឱ្យច្បាស់ ដោយមិនត្រូវធ្វើឱ្យអត្តពលិកមកពីប្រទេសនានាបាក់ទឹកចិត្តហើយត្រឡប់ទៅវិញនិយាយដើមពីកម្ពុជាថាទទួលមិនបានល្អដេកមិនបានគ្រប់គ្រាន់ក្តៅនោះទេព្រោះពេលបើកយើងបើកចំពេលក្តៅទៅទៀត ដោយយើងកំណត់យកថ្ងៃសុក្រ ទី៥ ខែឧសភា ឆ្នាំ២០២៣»។
ជាមួយការសម្រេចឱ្យរៀបចំការប្រកួតស៊ីហ្គេមលើកទី៣២ ឆ្នាំ២០២៣ ជាលើកដំបូងនេះកម្ពុជាបានឈានដល់ការបង្កើតឱ្យមាននូវគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) កាលពីឆ្នាំ២០១៦ ដើម្បីទទួលខុសត្រូវរួម និងរៀបចំផែនការមេឆ្ពោះទៅស៊ីហ្គេមនេះ។
ជាមួយគ្នានោះកម្ពុជាបានបង្កើតឱ្យមាននូវហេដ្ឋារចនាសម្ព័ន្ធកីឡាទីលានព្រមទាំងជួសជុលទីលាននៅតាមបណ្តារាជធានីខេត្តដើម្បីបម្រើដល់ការរៀបចំស៊ីហ្គេមនេះហើយវិមានពហុកីឡដ្ឋានជាតិមរតកតេជោដែលត្រូវបានសាងសង់ឡើងអស់ប្រមាណ១៥០លានដុល្លារជាជំនួយឥតសំណងរបស់មិត្តចិននោះជាទីតាំងដ៏សំខាន់សម្រាប់ទ្រទ្រង់ដល់ការប្រកួតនេះព្រមទាំងសម្រាប់រៀបចំពិធីបើកបិទស៊ីហ្គេមឆ្នាំ២០២៣នេះតែម្តង។
ទន្ទឹមនឹងនេះធនធានអត្តពលិកនិងមន្រ្តីបច្ចេកទេសនៅលើប្រភេទកីឡានីមួយៗក៏ត្រូវបានបណ្តុះបណ្តាលឱ្យកាន់តែមានគុណភាពផងដែរដើម្បីសម្រេចទិសដៅឆ្ពោះទៅកាន់ការប្រកួតស៊ីហ្គេមឆ្នាំ២០២៣ដែលព្រឹត្តិការណ៍នេះកម្ពុជាបានរង់ចាំអស់រយៈពេល៦៤ឆ្នាំហើយ។
លោកឧបនាយករដ្ឋមន្រ្តីរដ្ឋមន្រ្តីក្រសួងការពារជាតិ ទៀ បាញ់ ជាប្រធាន CAMSOC បានថ្លែងនៅក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ក្នុងនាមជាម្ចាស់ផ្ទះនៅខេត្តសៀមរាប កាលពីថ្ងៃទី៩ ខែមេសា ឆ្នាំ២០២២ ថា៖ «ពេលនេះ ជាឱកាសដ៏វិសេសវិសាលមួយដែលខ្ញុំសូមរំឭកឡើងវិញថាកម្ពុជាបានរង់ចាំរយៈពេល៦៤ឆ្នាំទើបអាចមានលទ្ធភាពទទួលធ្វើជាម្ចាស់ផ្ទះស៊ីហ្គេមដ៏ធំនេះក្រោមគតិបណ្ឌិតដ៏ខ្ពង់ខ្ពស់និងប៉ិនប្រសប់របស់សម្តេចអគ្គមហាសេនាបតីតេជោ ហ៊ុន សែន ស្របពេលដែលកម្ពុជាកំពុងរស់នៅក្នុងដំបូលសន្តិភាពនិងកិច្ចប្រឹងប្រែងស្តារស្ថានភាពសង្គមសេដ្ឋកិច្ចនិងលើកស្ទួយនូវវិបុលភាពសម្រាប់ទាំងអស់គ្នាក្រោយពីវិបត្តិជំងឺកូវីដ១៩»។
លោកបានបន្ថែមថា៖ «បច្ចុប្បន្នរាជរដ្ឋាភិបាលបានយកចិត្តទុកដាក់ខ្ពស់ក្នុងការអភិវឌ្ឍវិស័យកីឡានិងចលនាអូឡាំពិកក្នុងដំណើរឆ្ពោះទៅរៀបចំធ្វើម្ចាស់ផ្ទះការប្រកួតស៊ីហ្គេមឆ្នាំ២០២៣ឱ្យទទួលបានកិត្តិយសសេចក្តីថ្លៃថ្នូរនិងជោគជ័យ។ រាជរដ្ឋាភិបាលបានវិនិយោគធនធានថវិកាកម្លាំងកាយចិត្តក្នុងការកសាងហេដ្ឋារចនាសម្ព័ន្ធកីឡាទីលានប្រកួតកីឡាពិសេសពហុកីឡដ្ឋានជាតិដើម្បីបម្រើឱ្យការប្រកួតជាអន្តរជាតិផងនិងសម្រាប់ការហ្វឹកហ្វឺនជំនាញកីឡាគ្រប់ប្រភេទផង»។
ប្រធាន CAMSOC រូបនេះបានឱ្យដឹងទៀតថាការអភិវឌ្ឍធនធានមនុស្សជំនាញកីឡាគឺកីឡាករកីឡាការិនីគ្រូបង្វឹកមន្រ្តីបច្ចេកទេសកីឡាក៏ត្រូវបានដាក់ចេញនូវការឧបត្ថម្ភគាំទ្រនិងផ្គត់ផ្គង់ដល់ក្រុមជម្រើសជាតិដើម្បីបំប៉នការហាត់ហ្វឹកហ្វឺនឈានទៅរកគុណផលកីឡាកម្រិតខ្ពស់និងស្វែងរកកម្រិតស្តង់ដាបច្ចេកទេសកីឡាក្នុងតំបន់និងលើឆាកអន្តរជាតិ។
ជាមួយគ្នានេះកម្ពុជាក៏បានទទួលជោគជ័យផងដែរក្នុងការដាក់ប្រភេទកីឡាប្រពៃណី «គុនល្បុក្កតោ» ទៅក្នុងការប្រកួតស៊ីហ្គេមឆ្នាំ២០២៣នេះនៅក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍កាលពីខែមេសាឆ្នាំ២០២២ហើយអង្គប្រជុំក៏បានឯកភាពដាក់ប្រភេទកីឡាចំនួន៣៩ទៀតផងដែរដែលធ្វើឱ្យការប្រកួតស៊ីហ្គេមឆ្នាំ២០២៣នៅកម្ពុជាមានចំនួនប្រភេទកីឡាច្រើនបំផុត។
លោក វ៉ាត់ ចំរើន អគ្គលេខាធិការ CAMSOC បានថ្លែងថា៖ «ការដាក់គុនល្បុក្កតោចូលទៅក្នុងការប្រកួតស៊ីហ្គេមឆ្នាំ២០២៣វាជាគោលបំណងរបស់យើងយូរមកហើយហើយវាជាកិត្តិយសរបស់យើងក្នុងនាមជាម្ចាស់ផ្ទះដែលបានដាក់ក្បាច់គុនជាប្រពៃណីវប្បធម៌របស់យើងចូលទៅក្នុងស៊ីហ្គេមអ៊ីចឹងផែនការរបស់យើងទទួលបានជោគជ័យដោយសារប្រទេសទាំងអស់បានគាំទ្រដាក់ឱ្យបញ្ចូលជាផ្លូវការកាលពីព្រឹកមិញនេះហេតុនេះវាជាមហាកិត្តិយសមួយហើយសម្រាប់យើង»។
ទន្ទឹមនឹងនេះថ្នាក់ដឹកនាំ CAMSOC ក៏បានប្រកាសប្រាប់ប្រជាជននៅទូទាំងប្រទេសកម្ពុជាពីការឈានមកដល់របស់ស៊ីហ្គេមនៅកម្ពុជាផងដែរនៅពេលប្រតិភូកីឡាកម្ពុជាដឹកនាំដោយលោក ទៀ បាញ់ ផ្ទាល់បានរៀបចំដង្ហែទង់ស៊ីហ្គេមនិងម្ចាស់ជយលាភីមេដាយមាសពីការប្រកួតស៊ីហ្គេមនៅប្រទេសវៀតណាមមកដល់មាតុប្រទេសកាលពីថ្ងៃទី២៤ ខែឧសភា កន្លងមកនេះ។
នៅក្នុងឱកាសនោះលោក ទៀ បាញ់ បានថ្លែងថា៖«ថ្ងៃនេះប្រជាពលរដ្ឋទូទាំងប្រទេសពិតជាមានសោមនស្សរីករាយនិងមោទនភាពដែលព្រះរាជាណាចក្រកម្ពុជាបានបើកទំព័រប្រវត្តិសាស្ត្រថ្មីមួយទៀតទស្សនទានការទូតកីឡានិងកិត្យានុភាពជាតិក្នុងការនាំមកនូវទង់សហព័ន្ធកីឡាស៊ីហ្គេមលើកទី៣២នៅកម្ពុជា។ ហេតុនេះសូមបងប្អូនជនរួមជាតិដែលរស់នៅក្នុងនិងក្រៅប្រទេសសូមត្រៀមរៀបចំគ្រប់លក្ខណសម្បត្តិក្នុងនាមម្ចាស់ផ្ទះដោយរង់ចាំទទួលស្វាគមន៍ប្រតិភូកីឡាអាស៊ីអាគ្នេយ៍និងភ្ញៀវអន្តរជាតិមកពីគ្រប់ទិសទីជុំវិញពិភពលោកដើម្បីទទួលយកនូវស្នាមញញឹមរួសរាយរាក់ទាក់ជាមួយនឹងឥរិយាបថស្លូតបូតសុភាពរាបសាថ្លៃថ្នូររបស់ប្រជាជនកម្ពុជាយើងដែលកំពុងរស់នៅក្នុងសន្តិភាពពេញលេញនិងការអភិវឌ្ឍលើគ្រប់វិស័យ»៕
