ដាយ អ៊ិឈិ ឡាយហ្វ៍ (ខេមបូឌា) ដែលជាក្រុមហ៊ុនធានារ៉ាប់រងអាយុជីវិតជប៉ុនឈានមុខគេមួយរបស់ប្រទេសជប៉ុន បានប្តេជ្ញាជួយជំរុញវិស័យធានារ៉ាប់រងអាយុជីវិតនៅកម្ពុជាឱ្យរីកចម្រើនកាន់តែខ្លាំងតាមរយៈភ្នាក់ងារធានារ៉ាប់រង។ ក្រុមហ៊ុនកំពុងតែជ្រើសរើសភ្នាក់ងារធានារ៉ាប់រងពេញម៉ោងបន្ថែមរហូតទៅដល់ ៣០០ នាក់នៅទូទាំងប្រទេសកម្ពុជា តាមរយៈ “កម្មវិធីអាជីពជាភ្នាក់ងារធានារ៉ាប់រងពេញម៉ោង ឬ Kiwami Dai-ichi Master Program”។
ភ្នាក់ងារធានារ៉ាប់រងដែលត្រូវបានជ្រើសរើសនឹងទទួលបានប្រាក់ខែគោលថេរមានឱកាសរកប្រាក់ចំណូលច្រើនជាង ៤០ លានរៀលក្នុងរយៈពេលត្រឹមតែ ៦ ខែដំបូង ហើយថែមទាំងទទួលបានការបណ្តុះបណ្តាលកម្រិតស្តង់ដាជប៉ុនថែមទៀតផង។ គិតចាប់ពីខែកញ្ញា ឆ្នាំ ២០២៣ ក្រុមហ៊ុនយើងបានជ្រើសរើសភ្នាក់ងារធានារ៉ាប់រងចំនួន ៥ ដងរួចទៅហើយនៅទូទាំងរាជធានីភ្នំពេញ ខេត្តសៀមរាប ខេត្តបាត់ដំបង និងខេត្តបន្ទាយមានជ័យ។
ដោយទទួលស្គាល់នូវតម្រូវការផ្នែកផ្សេងៗនៃការងារ យើងក៏បានដាក់ចេញនូវកម្មវិធីមួយបន្ថែមទៀត ដើម្បីជ្រើសរើសប្រធានផ្នែកលក់ពេញម៉ោងថ្មីដោយមានផ្តល់ជូននូវប្រាក់ខែគោលថេរប្រាក់ឧបត្ថម្ភផ្សេងៗ និងឱកាសទទួលបានប្រាក់ចំណូលខ្ពស់។ កម្មវិធីនេះស័ក្តិសមបំផុតសម្រាប់បេក្ខជនដែលជាម្ចាស់អាជីវកម្មខ្នាតតូច ឬអ្នកដែលមានបទពិសោធន៍ និងសក្តានុពលក្នុងការបង្កើតបណ្តាញទំនាក់ទំនងជាមួយអតិថិជន។
បេក្ខជនដែលត្រូវបានជ្រើសរើសសម្រាប់ កម្មវិធីភ្នាក់ងារធានារ៉ាប់រងក្រៅម៉ោង TAKUMI នឹងទទួលបានប្រាក់ខែគោលថេរ ហើយថែមទាំងទទួលបានការបណ្តុះបណ្តាលផ្នែកធានារ៉ាប់រងអាយុជីវិតស្របតាមស្តង់ដាជប៉ុនដោយឥតគិតថ្លៃ។ កម្មវិធីមួយនេះស័ក្តិសមសម្រាប់បេក្ខជនដែលមិនមានពេលវេលាគ្រប់គ្រាន់សម្រាប់ធ្វើការពេញម៉ោង ប៉ុន្តែមានបំណងចង់បង្កើនប្រភពចំណូលថ្មីតាមរយៈការផ្តល់ប្រឹក្សាធានារ៉ាប់រងអាយុជីវិតប្រកបដោយគុណភាពជូនដល់ប្រជាជនកម្ពុជា។
លោក Mah Kin Yoong អគ្គនាយកស្តីទីនៃក្រុមហ៊ុន ដាយ អ៊ិឈិ ឡាយហ្វ៍ ខេមបូឌា បានមានប្រសាសន៍ថា “ក្រុមហ៊ុនយើងខ្ញុំមានវត្តមាននៅលើទឹកដីកម្ពុជាជិត ៥ ឆ្នាំមកហើយ។ យើងប្តេជ្ញាគាំទ្រចក្ខុវិស័យរបស់រាជរដ្ឋាភិបាលកម្ពុជាក្នុងការលើកកម្ពស់ការយល់ដឹង និងបង្កើនអត្រាភាគទានធានារ៉ាប់រងអាយុជីវិតក្នុងសេដ្ឋកិច្ចកម្ពុជា។ យើងជឿជាក់ថា ការបន្តវិនិយោគទៅលើភ្នាក់ងារធានារ៉ាប់រងនឹងអាចឱ្យយើងបម្រើជូនអតិថិជនប្រកបដោយវិជ្ជាជីវៈ និងរួមចំណែកដល់និរន្តរភាពនៃវិស័យធានារ៉ាប់រងនៅកម្ពុជា”។
កម្មវិធីនេះត្រូវបានដឹកនាំដោយក្រុមការងារជំនាញរបស់ក្រុមហ៊ុន ដាយ អ៊ិឈិ ឡាយហ្វ៍ ដែលមានបទពិសោធន៍ជាច្រើនឆ្នាំ ហើយត្រូវបានជ្រើសរើស ដើម្បីបណ្តុះណ្តាល និងអភិវឌ្ឍសមត្ថភាពភ្នាក់ងារធានារ៉ាប់រងអាយុជីវិតរហូតទៅដល់ជាង ៥,០០០ នាក់កន្លងមក។
លោក Yoshiyuki Inanobe ដែលជានាយកនៃនាយកដ្ឋានប្រតិបត្តិការចែកចាយបានមានប្រសាសន៍ថា «ក្នុងនាមយើងជាក្រុមហ៊ុនធានារ៉ាប់រងអាយុជីវិតឈានមុខគេមួយរបស់ប្រទេសជប៉ុន អស់រយៈពេលជាង ១២១ ឆ្នាំមកនេះការមានភ្នាក់ងារធានារ៉ាប់រងអាយុជីវិតប្រកបដោយគុណភាព និងវិជ្ជាជីវៈខ្ពស់ គឺជាឌីអិនអេ (DNA) របស់ក្រុមហ៊ុនយើង។
បច្ចុប្បន្ននេះភ្នាក់ងារធានារ៉ាប់រងរបស់យើងកំពុងតែផ្ដល់សេវាកម្មជូនដល់អតិថិជនប្រមាណជាង ១៥ លាននាក់នៅក្នុងប្រទេសជប៉ុន។
យើងជឿជាក់ថា ក្រុមការងាររបស់យើងដែលមានជំនាញច្បាស់លាស់នឹងជួយបង្កើតបណ្តាញភ្នាក់ងារធានារ៉ាប់រងអាយុជីវិតមួយដែលមានសមត្ថភាពខ្ពស់ ដើម្បីអាចផ្តល់ការប្រឹក្សា និងរៀបចំផែនការហិរញ្ញវត្ថុប្រកបដោយគុណភាពជូនដល់ប្រជាជនកម្ពុជា»៕
