ក្រសួងអប់រំបានកំណត់ទិសដៅគោលនយោបាយកែទម្រង់ការអប់រំគ្រូបង្រៀនជាលំដាប់។ រូបថត Supplied
ទីភ្នាក់ងារសហប្រតិបត្តិការអន្តរជាតិជប៉ុន (JICA) ជឿជាក់យ៉ាងមុតមាំថា គ្រូបង្រៀនមានឥទ្ធិពលយ៉ាងខ្លាំងទៅលើការសិក្សា និងការរស់នៅរបស់សិស្សពួកគេ គឺជាអ្នកបង្កើតការផ្លាស់ប្តូរដ៏សំខាន់ក្នុងការអភិវឌ្ឍសង្គមសេដ្ឋកិច្ចរបស់កម្ពុជា។
កន្លងមកថ្មីៗនេះ វិទ្យាស្ថានគរុកោសល្យចំនួន ២ ដែលផ្តល់កម្មវិធីអប់រំគ្រូបង្រៀនរយៈពេល ៤ ឆ្នាំ ត្រូវបានបង្កើតឡើង និងបានបណ្តុះបណ្តាលគ្រូបង្រៀនឆ្នើមនៅសាលាបឋមសិក្សា និងមធ្យមសិក្សាដែលជាការអភិវឌ្ឍដ៏សំខាន់មួយ។
ប្រព័ន្ធបណ្តុះបណ្តាលគ្រូបង្រៀនទំនើបនៅកម្ពុជាបានចាប់ផ្តើមជាមួយ នឹងកម្មវិធីបណ្តុះបណ្តាលរយៈពេលខ្លីមិនទៀងទាត់ ដើម្បីទប់ទល់នឹងកង្វះខាតគ្រូបង្រៀនដ៏ច្រើនលើសលប់ បន្ទាប់ពីទសវត្សរ៍ឆ្នាំ ១៩៨០ អំឡុងពេលកសាងឡើងវិញ។
ជាមួយនឹងប្រព័ន្ធបណ្តុះបណ្តាលកំពុងអភិវឌ្ឍបន្តិចម្តងៗ មជ្ឈមណ្ឌលគរុកោសល្យដែលផ្តល់ការបណ្តុះបណ្តាលគ្រូបង្រៀនរយៈពេល ២ ឆ្នាំសម្រាប់សាលាបឋមសិក្សា និងមធ្យមសិក្សាត្រូវបានបង្កើតឡើងក្នុងឆ្នាំ ១៩៩៧ ជាគ្រឹះស្ថានបណ្តុះបណ្តាល គ្រូបង្រៀនទៀងទាត់។
គុណភាពគ្រូបង្រៀនមានសារៈសំខាន់ក្នុងការលើកកម្ពស់លទ្ធផលសិក្សារបស់សិស្ស។ រូបថត Supplied
ដោយឆ្លងកាត់ឧបសគ្គយ៉ាងធំធេងនៅពេលនោះដូចជាហេដ្ឋារចនាសម្ព័ន្ធ និងធនធានមិនគ្រប់គ្រាន់ គ្រូបង្រៀនបានខិតខំប្រឹងប្រែងយ៉ាងខ្លាំង និងបាន ចូលរួមចំណែកគួរឱ្យកោតសរសើរ ក្នុងការបង្កើតប្រព័ន្ធអប់រំកម្ពុជាឡើងវិញ ដែលបម្រើជាមូលដ្ឋានគ្រឹះរបស់ប្រទេសជាតិ ជួយឱ្យមានកំណើនសេដ្ឋកិច្ចគួរឱ្យកត់សម្គាល់ក្នុងរយៈពេលជាច្រើនទសវត្សរ៍មកនេះ។
ខណៈប្រទេសកម្ពុជា មានការអភិវឌ្ឍ គុណភាពគ្រូបង្រៀនកាន់តែមានសារៈសំខាន់ក្នុងការលើកកម្ពស់លទ្ធផលសិក្សារបស់សិស្ស ហើយក្រសួងអប់រំយុវជន និងកីឡា បានលើកកម្ពស់នូវគុណវុឌ្ឍិនៃការបង្រៀនដោយបង្កើត វិទ្យាស្ថានគរុកោសល្យ (TEC) ដែលផ្តល់ការបណ្តុះបណ្តាលគ្រូបង្រៀនរយៈពេល ៤ ឆ្នាំ សម្រាប់គ្រូបឋមសិក្សា និងអនុវិទ្យាល័យ។
ឆ្លើយតបទៅនឹងសំណើរបស់ក្រសួងអប់រំ យុវជន និងកីឡា JICA បានសហការបង្កើតវិទ្យាស្ថានគរុកោសល្យដែលផ្តល់ការបណ្តុះបណ្តាលគ្រូបង្រៀន រយៈពេល ៤ ឆ្នាំដំបូង ចំនួន ២ កន្លែងក្នុងប្រទេសកម្ពុជា ដោយមួយកន្លែងនៅរាជធានីភ្នំពេញ និងមួយទៀតនៅខេត្តបាត់ដំបង។
JICA ចូលរួមយ៉ាងសកម្មនៅក្នុងសកម្មភាពបណ្តុះបណ្តាលគុណភាពគ្រូបង្រៀននៅកម្ពុជា។ រូបថត Supplied
ជាមួយនឹងហិរញ្ញប្បទានឥតសំណង និងកិច្ចសហប្រតិបត្តិការបច្ចេកទេសរបស់ជប៉ុន ចាប់តាំងពីឆ្នាំ ២០១៧ មក មានរួមបញ្ចូលទាំងការសាងសង់អគារ និងការបណ្តុះបណ្តាលគ្រូឧទ្ទេសព្រមទាំងការអភិវឌ្ឍកម្មវិធីសិក្សាគោលវគ្គសិក្សាលម្អិត និងសម្ភារបង្រៀនជាដើម។
កត្តាទាំងនេះបាននាំឱ្យមានការកែលម្អក្នុងការបណ្តុះបណ្តាលគ្រូ និងការលើកកម្ពស់គុណវុឌ្ឍិសម្រាប់គ្រូបង្រៀននៅកម្ពុជា។
គរុនិស្សិតចំនួនប្រហែល ១ ០០០ នាក់ បានបញ្ចប់ការសិក្សានៅវិទ្យាស្ថានគរុកោសល្យទាំង ២ ហើយពួកគេបានក្លាយជាគ្រូបង្រៀនបឋមសិក្សា និងមធ្យមសិក្សាថ្មីដែលមានកម្រិតស្មើបរិញ្ញាបត្របានចាប់ផ្តើមការងារនៅតាមសាលារៀនរៀងខ្លួនៗនៅទូទាំងប្រទេស។
សារៈសំខាន់នៃគ្រូបង្រៀនដែលបានបញ្ចប់ការបណ្តុះបណ្តាលរយៈពេល ៤ ឆ្នាំនៅ TECs ត្រូវបានទទួលស្គាល់យ៉ាងទូលំទូលាយនៅក្នុងប្រទេសកម្ពុជា ដោយសារពួកគេបានអនុវត្តយ៉ាងល្អក្នុងការយកចំណេះដឹង និងបទពិសោធន៍ដែលបានសិក្សានៅ TECs យកទៅអនុវត្តនៅសាលារៀនដែលពួកគេកំពុងបង្រៀន។
គរុនិស្សិតប្រមាណ ១ ០០០ នាក់ បានបញ្ចប់ការសិក្សានៅវិទ្យាស្ថានគរុកោសល្យទាំង ២។
ក្រសួងអប់រំបានកំណត់ទិសដៅគោលនយោបាយថា ការអប់រំគ្រូបង្រៀននឹងត្រូវបានកែទម្រង់ជាលំដាប់ ជាគោលការណ៍ពីការបណ្តុះបណ្តាលរយៈពេល ២ ឆ្នាំ ទៅការបណ្តុះបណ្តាលរយៈពេល ៤ ឆ្នាំ តាម រយៈការពង្រីក TECs។
«ការអភិវឌ្ឍមូលធនមនុស្ស» គឺជាអាទិភាពមួយក្នុងចំណោមអាទិភាពនានាដែលមានចែងក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដោយគ្រូមានតួនាទីសំខាន់ក្នុងការលើកកម្ពស់សមត្ថភាពសិស្សដែលជាឆ្អឹងខ្នងរបស់សង្គមជាតិ។
JICA ក្នុងនាមជាទីភ្នាក់ងារអនុវត្តន៍ជំនួយអភិវឌ្ឍន៍ផ្លូវការរបស់ជប៉ុន (ODA) នឹងបន្តធ្វើការជាមួយរដ្ឋាភិបាលកម្ពុជាប្រជាជនកម្ពុជា និងដៃគូអភិវឌ្ឍន៍ផ្សេងទៀត ដើម្បីរួមចំណែកដល់ការលើកកម្ពស់ការបណ្តុះបណ្តាលគ្រូបង្រៀនហើយយើងសង្ឃឹមយ៉ាងមុតមាំថា គ្រូបង្រៀនធានាដល់អនាគតរបស់ប្រទេសជាតិឱ្យកាន់តែភ្លឺស្វាង៕
