ភ្នំពេញ៖ កីឡាការិនីជម្រើសជាតិប្រដាល់សកល វី ស្រីស្រស់ ហាក់មិនចង់បញ្ចប់ក្នុងលទ្ធផលស្មើជាមួយស្រីស្អាត ទូច ចាន់វត្តី តាមច្បាប់ប្រកួតរបស់ Mas Fight នោះទេ គឺសិស្សគណមកពីក្លិបនាគមានជ័យរូបនេះ ចង់យកឈ្នះដោយការផ្តួលកីឡាការិនីជម្រើសជាតិឃីកបុកស៊ីង ចាន់វត្តី ឱ្យសន្លប់នៅក្នុងនាទីណាមួយ ក្នុងការប្រកួតឥតឈប់រយៈពេល ៩ នាទីពេញ។
ជាមួយគ្នានេះ អ្នកផ្គូផ្គងប្រចាំនៅសង្វៀនថោនបានអះអាងដែរថា ការប្រកួតគូស្រ្តីនាថ្ងៃអាទិត្យនេះ នឹងទទួលបានការគាំទ្រខ្លាំង បើទោះបីជា វី ស្រីស្រស់ និង ទូច ចាន់វត្តី មិនធ្លាប់ប្រកួតលក្ខណៈម៉ាសហ្វៃ ហើយមានបទពិសោធប្រកួតនៅលើសង្វៀនតិចតូចដូចគ្នាក៏ដោយ។
លោក ជួប វុត្ថា អ្នកផ្គូផ្គងការប្រកួតប្រចាំសង្វៀនថោនបានប្រាប់ថា៖ «គូប្រដាល់ជាស្ត្រី ទោះបីសមត្ថភាពនៅមិនទាន់ល្អដូចបុរស ប៉ុន្តែការប្រកួតមានភាពទាក់ទាញខ្លាំងណាស់។ ម៉្យាងទៀត ការផ្តល់ឱកាសឱ្យមានកីឡាការិនីប្រកួតនេះ គឺដើម្បីឱ្យការប្រកួតផ្នែកនារីមានទីផ្សារផង ព្រោះមួយរយៈមកនេះ សង្វៀនប្រដាល់មួយចំនួនមិនសូវផ្តល់ឱកាសឱ្យស្ត្រីបានប្រកួតទេ»។
លោកបន្ថែមថា៖ «កាលពីសប្តាហ៍កន្លងមក សង្វៀនយើង រៀបចំកីឡាការិនី នូវ ស្រីពៅ ជម្រើសជាតិឃីកបុកស៊ីង ប្រកួតជាមួយកីឡាការិនីមកពីចិន គឺទទួលបានការគាំទ្រខ្លាំងណាស់ ក្នុងនោះ អ្នកចូលទស្សនាតាមផេចហ្វេសប៊ុក ពេលប្រកួតបញ្ចប់ឡើងជាង ២០០K ដែលជាចំណុចកំពូលខ្ពស់ ក្នុងចំណោមការរៀបចំប្រកួតផ្សាយផ្ទាល់ឱ្យមហាជនទស្សនាតាមប្រព័ន្ធអនឡាញ នាពេលបច្ចុប្បន្ន»។
តាមគណៈកម្មការរៀបចំបានឱ្យដឹងថា កីឡាការិនី វី ស្រីស្រស់ និង ទូច ចាន់វត្តី មានអាយុ ១៨ ឆ្នាំ មានកម្ពស់ ១,៦០ ម៉ែត្រ និងទម្ងន់ ៥៤ គីឡូក្រាមដូចគ្នា ហើយអ្នកទាំង ២ នេះ មានបទពិសោធប្រកួតប្រហែលគ្នា គឺ ស្រីស្រស់ ធ្លាប់ប្រកួត ៦ ដង ឈ្នះ ៥ និងចាញ់ ១ ដង រីឯ ចាន់វត្តី ប្រកួត ៥ ដង ឈ្នះ ៤ និងចាញ់ ១ ដង។ បន្ថែមលើនេះ ពួកគេមានជំនាញប្រកួតទាំងប្រដាល់សកល និងគុនខ្មែរដូចគ្នា ប៉ុន្តែមិនធ្លាប់ឡើងប្រកួត Mas Fight នេះទេ។
កីឡាការិនី វី ស្រីស្រស់ បានប្រាប់ថា៖ «ខ្ញុំកំពុងហ្វឹកហាត់ជាមួយក្រុមជម្រើសជាតិនៅស្តាតថ្មីមរតកតេជោ តែខ្ញុំខកខានឡើងសង្វៀនប្រកួតយូរដែរហើយ ប៉ុន្តែការប៉ះ ទូច ចាន់វត្តី នេះ ខ្ញុំធ្លាប់ស្គាល់ និងមិនញញើតទេ»។
ស្រីស្រស់បានបន្ថែមថា៖ «ទូច ចាន់វត្តី ក៏ធ្លាប់ប្រដាល់សកលដែរ ប៉ុន្តែនៅក្នុងចំណោមកីឡាការិនីជម្រើសជាតិប្រដាល់សកល ខ្ញុំប្រកួតចាញ់តែ នូវ ស្រីពៅ ម្នាក់ប៉ុណ្ណោះ ក្រៅពីនេះគ្មានបញ្ហាទេ។ ចំណែកការប្រកួតក្នុងម៉ាសហ្វៃនេះ ខ្ញុំសង្ឃឹមស្មើច្រើនជាង ព្រោះលក្ខខណ្ឌប្រកួត គេឱ្យស្មើ បើវ៉ៃគ្នាមិនសន្លប់នោះ។ តែទោះយ៉ាងណា ខ្ញុំសង្ឃឹមផ្តួលយកឈ្នះ ហើយនិយាយដោយស្មោះត្រង់ រឿងខ្ញុំចាញ់ គ្មានទេ»។
ចំណែកលោក ជ័យ តារា ជាគ្រូបង្វឹកបាននិយាយថា៖ «ភាគរយ វី ស្រីស្រស់ ល្អជាង និងធានាបានឈ្នះ ឬស្មើ ព្រោះវ៉ៃតាមម៉ាសហ្វៃ តែបើវាយដាក់ពិន្ទុវិញ ធានា ១០០ ភាគរយ ព្រោះ វី ស្រីស្រស់ ហាត់ល្អ ទឹកចិត្តប្រកួតល្អ គឺមិនងាយចុះចាញ់នោះទេ»។
ដោយឡែក ទូច ចាន់វត្តី មិនអាចទាក់ទងបានទេ ប៉ុន្តែលោកគ្រូ អាត់ សំរិទ្ធ ជាអ្នកគ្រប់គ្រងបានប្រាប់ថា៖ «ទូច ចាន់វត្តី ជាប្អូនស្រីរបស់ ទូច ដេវីត ហើយឥឡូវបានជាប់ជម្រើសជាតិឃីកបុកស៊ីងហើយ។ ចាន់វត្តី ល្អកណ្តាប់ដៃ ប៉ុន្តែបទពិសោធនៅខ្ចីជាង វី ស្រីស្រស់ ប៉ុន្តែវាមានទឹកចិត្តប្រកួត គឺមិនអាចចាញ់ដោយសន្លប់ឡើយ ដោយសារហាត់បានល្អ។ ម្យ៉ាងទៀត ការប្រកួតម៉ាសហ្វៃ ៩ នាទី គ្មានឈប់ ខ្ញុំសង្ឃឹមថា ៩០ ភាគរយ នឹងបានលទ្ធផលស្មើមិនខាន»៕