កីឡាករ សុះ ស៊ូហាណា របស់ក្រុមណាហ្គាវើលដ៍ បានព្យាយាមបិទ ខ្សែប្រយុទ្ធ Nieto របស់ក្រុមភ្នំពេញក្រោន នាជំនួប កាលពីឆ្នាំ២០២០ ដោយកាលនៅ ណាហ្គា បានស្មើ ១-១ ក្នុងជើងទី១ តែបានចាញ់ ភ្នំពេញក្រោន ១-០ នៅជើងទី២។ រូបថត CNCC
.jpg)
ភ្នំពេញ៖ គ្រូបង្វឹកក្រុមណាហ្គាវើលដ៍ លោក មាស ចាន់ណា មិនបានចាត់ទុកការធ្វើដំណើរទៅជួបក្រុមម្ចាស់ផ្ទះ ភ្នំពេញក្រោន នៅល្ងាចម៉ោង ៦ ថ្ងៃអាទិត្យនេះ ថាជាការប្រកួតដ៏ធំ ដែលក្រុមរបស់លោក គួរបង្ហាញការខ្វាយខ្វល់នោះទេ។ ផ្ទុយទៅវិញគ្រូបង្វឹករូបនេះ បានលើកឡើងថា ជំនួបដ៏ធំនេះ វាគ្រាន់តែជាការប្រកួតធម្មតាៗ គ្មានអ្វីប្លែក សម្រាប់កីឡាកររបស់លោកនោះទេ បើទោះបីជាក្រុមទាំង ២ នេះ សុទ្ធតែផ្តោតសំខាន់ ទៅលើការដណ្តើមឱ្យបាន ៣ ពិន្ទុក៏ដោយ។
តាមរយៈក្លិបណាហ្គាវើលដ៍ផ្ទាល់ លោក មាស ចាន់ណា បាននិយាយថា៖ «ទាំងក្រុមភ្នំពេញក្រោន និងណាហ្គាវើលដ៍ សុទ្ធតែផ្តោតសំខាន់ក្នុងការចង់បានពិន្ទុ ប៉ុន្តែសម្រាប់ខ្ញុំវិញ ខ្ញុំគិតថា វាជាការប្រកួតមួយធម្មតាទេ សម្រាប់ក្រុមខ្ញុំ ដែលតែងតែមកលេងនៅផ្ទះគេ ព្រោះ ៩ ប្រកួតមកនេះ យើងលេងនៅក្រៅដីរហូត អ៊ីចឹងហើយវាគ្មានអីប្លែកសម្រាប់កីឡាកររបស់ខ្ញុំទេ»។
លោក មាស ចាន់ណា ដែលកំពុងដឹងនាំក្រុមណាហ្គាវើលដ៍ ឱ្យឈរនៅលេខរៀងទី៤ ដោយមាន ១៨ ពិន្ទុ ជាមួយការឈ្នះ ៥ ស្មើ ៣ និងចាញ់ ១ នោះ បាននិយាយបន្ត ចំពោះការជួបក្រុមម្ចាស់ផ្ទះ ភ្នំពេញក្រោន លើកនេះថា៖ «វាជារឿងមួយធម្មតា សម្រាប់កីឡាករយើង ព្រោះការរៀបចំរបស់យើង និងការលេងរបស់យើង វាមានភាពសមរួចទៅហើយ ក្នុងការលេងនៅក្រៅទឹកដី ហេតុនេះវាគ្មានអ្វីចម្លែកនោះទេ»។
យ៉ាងណាក៏ដោយ លោក មាស ចាន់ណា បានទទួលស្គាល់ថា ភ្នំពេញក្រោន នៅឆ្នាំនេះ ជាក្រុមល្អ និងខ្លាំង ដែលមានភាពមុតស្រួច នៅតំបន់ប្រយុទ្ធ។ «ភ្នំពេញក្រោន នៅឆ្នាំនេះ គឺជាក្រុមល្អ និងខ្លាំង ជាពិសេសនៅតំបន់ប្រយុទ្ធ។ ថ្វីបើគាត់ស្មើមែន តែគាត់ទាត់ចូលទីគេច្រើន ដែលអាចនិយាយបានថា តំបន់ប្រយុទ្ធរបស់គាត់ មានភាពមុតស្រួច ពិសេសនៅពេលគាត់វាយបក អ៊ីចឹងខ្ញុំគិតថា ភ្នំពេញក្រោន ជាក្រុមល្អខ្លាំង សម្រាប់ឆ្នាំនេះ»។
លោក មាស ចាន់ណា បានប្រាប់ពីបច្ចេកទេសដល់កូនក្រុម ក្នុងពេលហ្វឹកហាត់ ត្រៀមជួបក្រុមភ្នំពេញក្រោន ល្ងាចថ្ងៃអាទិត្យនេះ។ រូបថត ណាហ្គាវ់ើដ៍
គ្រូបង្វឹកក្រុមណាហ្គាវើលដ៍រូបនេះ បានបន្ថែមថា៖ «សម្រាប់ការរៀបចំមួយសប្តាហ៍នេះ គឺអារម្មណ៍របស់កីឡាករយើង ធម្មតាទាំងអស់ សម្រាប់ការប្រកួតមួយនេះ។ មានន័យថា គាត់រៀបចំទាំងខួរក្បាល កាយសម្បទា និងកម្លាំង រួចរាល់អស់ហើយ ប៉ុន្តែសំខាន់យើងបានកែប្រែនៅតំបន់ការពារខ្លះ ដោយសារយើងមានបញ្ហារហូត នៅតំបន់ការពារ គឺសឹងតែគ្រាប់ការប្រកួត គេទាត់ចូលយើង តែនៅតំបន់ខាងលើយើងវិញ គឺគ្រប់ការប្រកួតទាំងអស់ យើងទាត់ចូលគេ»។
នៅពេលសួរពីក្តីសង្ឃឹមនៃការប្រកួតនេះ លោក មាស ចាន់ណា បានបញ្ជាក់ថា៖ «ខ្ញុំគិតថា ៥០-៥០ សម្រាប់លទ្ធផលការប្រកួតលើកនេះ ដោយសារយើងព្យាយាមកែប្រែនៅតំបន់ការពារឱ្យខ្លាំង គឺយ៉ាងហោចណាស់ ក៏យើងបាន ១ ពិន្ទុទៅវិញដែរ អ៊ីចឹងមួយសប្តាហ៍នេះ យើងរៀបចំតំបន់ការពារឱ្យមានការលេងដ៏ល្អមួយ សម្រាប់ត្រៀមលេងជាមួយក្រុមភ្នំពេញក្រោន លើកនេះ ព្រោះ តំបន់ប្រយុទ្ធរបស់ ភ្នំពេញក្រោន មានភាពមុតស្រួច»។
ចំណែកខ្សែបម្រើប្រយុទ្ធ Andres Nieto ដែលកំពុងបង្ហាញទម្រង់លេងកាន់តែល្អរបស់ក្រុមភ្នំពេញក្រោន បានចាត់ទុកការជួបក្រុមណាហ្គាវើលដ៍ នៅល្ងាចនេះ ថានឹងក្លាយជាការប្រកួតដ៏រំភើបមួយ។ Nieto បានបញ្ជាក់ថា៖ «វាអាចជាការប្រកួត ដែលរំភើបមួយ ព្រោះយើងជួបគូប្រកួតដែលល្អ ហើយសម្រាប់ខ្ញុំ គឺខ្ញុំបន្តការប្រឹងប្រែង ១០០ ភាគរយ ដដែលដូចការប្រកួតមុនៗដែរ»។
សកម្មភាពហ្វឹកហាត់របស់ក្រុមភ្នំពេញក្រោន សម្រាប់ត្រៀមជួបក្រុមណាហ្គាវើលដ៍ នៅលើទឹកដីខ្លួនឯង ថ្ងៃអាទិត្យនេះ។ រូបថត ភ្នំពេញក្រោន
គួរបញ្ជាក់ថា នៅពេលនេះ ក្រុមភ្នំពេញក្រោន កំពុងឈរនៅលេខ ៦ មាន ១៧ ពិន្ទុ ជាមួយការឈ្នះ ៥ និងស្មើ ២ គឺពួកគេ មិនទាន់ស្គាល់ការចាញ់ទេ ហើយក៏មានចំនួនប្រកួតតិចជាងគេផងដែរ ខណៈក្រុមវិសាខា ក្រុមព្រះខ័នរាជស្វាយរៀង ដែលមាន ១៩ ពិន្ទុស្មើគ្នា រួមទាំងក្រុមណាហ្គាវើលដ៍ និងបឹងកេត ដែលមាន ១៨ ពិន្ទុស្មើគ្នានោះ គឺបានបញ្ចប់ការប្រកួត ៩ លើកហើយ រីឯក្រុមកំពុងឈរនៅលេខ ១ មាន ២០ ពិន្ទុ អង្គរថាយហ្គឺរ ប្រកួតបាន ១០ ដងទៅហើយ។
ជាមួយគ្នានេះ ក្រុមស្វាយររៀង ត្រូវស្វាគមន៍ក្រុមបឹងកេត នៅល្ងាចម៉ោង ៦ ថ្ងៃអាទិត្យនេះដែរ គឺក្រោយពេលក្រុមវិសាខា ត្រូវជួបក្រុមខេត្តព្រៃវែង នៅលើទឹកដីខ្លួនឯង ដែលការប្រកួត នឹងចាប់ផ្តើមពីរសៀលម៉ោង ៣:៣០ តទៅ ហើយការប្រកួតរវាងក្រុមធំៗទាំងនេះ វាបានក្លាយជាការប្រកួតប្រជែងគ្នា ដោយប្រយោល និងដោយប្រឈម ដើម្បីដណ្តើមយកទីតាំងលេខ១ របស់ក្រុមអង្គរថាយហ្គឺរ នៅថ្ងៃនេះ៕
