ភ្នំពេញ៖ ក្រុមបាល់ទាត់ហ្វុតសាល តារាមហាហង្ស (Mohahang All Star FC) របស់កម្ពុជា នឹងប្រើការហ្វឹកហាត់ជុំគ្នា ត្រឹមរយៈពេលជាង ៣ សប្តាហ៍ ដើម្បីបើកការប្រកួតប្រជែង ជាមួយក្រុមខ្លាំង ក្នុងព្រឹត្តិការណ៍ប្រកួតពានរង្វាន់ក្លិបបាល់ទាត់ក្នុងសាលក្របខណ្ឌអាស៊ាន (AFF Futsal Club Championship) នៅល្ងាចថ្ងៃអង្គារនេះ ដោយពួកគេ រំពឹងថា នឹងទទួលលទ្ធផលល្អ។
ក្រុមតារាមហាហង្ស ដែលបានធ្វើដំណើរទៅលើទីក្រុងបាងកក ប្រទេសថៃ កាលពីថ្ងៃសៅរ៍ ក្រោយការធ្វើដំណើរអស់រយៈពេលចូល ២០ ម៉ោងនោះ បានចាប់ផ្តើមហ្វឹកហាត់ នៅលើទីលាន ដែលពួកគេ ត្រូវប្រកួតប្រជែង បានត្រឹម ៣ ថ្ងៃទេ ហើយនៅថ្ងៃអង្គារនេះ តារាមហាហង្ស នឹងត្រូវប្រកួតផ្លូវការ ដោយត្រូវជួបក្រុមម្ចាស់ផ្ទះ Freefire Bluewave Chonburi នៅល្ងាចម៉ោង ៦។
ទាក់ទងទៅនឹងការត្រៀមខ្លួននេះ កីឡាករ អ៊ុង ច័ន្ទភក្តី ប្រធានក្រុមតារាមហាហង្ស បាននិយាយថា៖ «យើងគួរណាស់បានត្រៀមខ្លួនពី ២ ទៅ ៣ ខែ មុនការប្រកួតនេះ មកដល់ ប៉ុន្តែដោយសារបញ្ហាវិបត្តិជំងឺកូវីដ១៩ អ្វីៗត្រូវបានរំសាយ ដោយយើងបានហ្វឹកហាត់ជុំគ្នាបានចូល ៣ សប្តាហ៍ទេ។ តែទោះបីជាយ៉ាងណា យើងមានការយល់ចិត្តគ្នាច្រើន ហើយលំហាត់ ដែលលោកគ្រូបានដាក់ឱ្យ យើងមានការយល់បានច្រើន ទាំងទៅលើរបៀបការពារ និងប្រយុទ្ធ អ៊ីចឹងយើងគិតថា អ្វីដែលយើងទទួលបាន នៅពេលនេះ អាចនឹងប្រើប្រាស់ នៅក្នុងការប្រកួតនេះបាន»។
កីឡាករ អ៊ុង ច័ន្ទភក្តី បានបន្ថែមថា៖ «ពួកយើងសន្យាថា ការមកប្រកួតនេះ មិនមែនមក ដើម្បីចាញ់នោះទេ គឺយើងមកនេះ ដើម្បីផ្តល់ឱ្យបាន ១០០ ភាគរយ ទៅដល់ការប្រកួត ហើយយើងសង្ឃឹមថា នឹងទទួលបានលទ្ធផលល្អ ព្រោះយើងក៏បានសិក្សាពីរបៀបលេង ការប្រយុទ្ធ ការពារ និងការវាយបករបសើក្រុមគេ ផងដែរ គឺយើងត្រៀមបានច្រើន។ យើងមិនចាញ់គេពេកនោះទេ ដូច្នេះយើងសង្ឃឹមថា នឹងទទួលបានលទ្ធផលល្អ និងទទួលបានបទពិសោធថ្មីៗបន្ថែមទៀត ពីការប្រកួតនេះ»។
គួរបញ្ជាក់ថា ការប្រកួតពាន AFF Futsal Club Championship នេះ មានការផ្លាស់ប្តូររូបមន្ត និងលក្ខខណ្ឌនៃការប្រកួតមួយចំនួន ព្រោះក្រុម Sahako របស់វៀតណាម ក្រុម SKN Kabumen FC របស់ឥណ្ឌូនេស៊ី ក្រុម Selangor របស់ម៉ាឡេស៊ី និងក្រុម MIU របស់មីយ៉ាន់ម៉ា សុទ្ធតែបានសម្រេចដកខ្លួនចេញភ្លាមៗ ដោយសារបញ្ហាការរីករាលខ្លាំងនៃជំងឺកូវីដ ១៩។
ជាមួយគ្នានេះគណៈកម្មការប្រកួត បានសម្រេចដាក់បញ្ចូលក្រុម Freefire Bluewave Chonburi របស់ថៃ និងក្រុម Pahang Rangers FC របស់ម៉ាឡេស៊ី ដើម្បីឱ្យធ្វើការប្រកួត តាមរូបមន្តវិលជុំវិញ ជាមួយក្រុមតារាមហាហង្ស របស់កម្ពុជា ក្រុម Port FC របស់ថៃ និងក្រុម Selangor MAC FC របស់ម៉ាឡេស៊ី ដែលត្រូវធ្វើពីថ្ងៃទី ១៣ ដល់ថ្ងៃទី ១៧ ខែកញ្ញា។
ជុំវិញការទទួលបានឱកាស ចេញទៅប្រកួតតំណាងឱ្យកម្ពុជា នៅលើឆាកអន្តរជាតិ នេះ លោក អ៊ិន សុភិន ប្រធានក្លិបតារាមហាហង្ស ធ្លាប់បានប្រាប់ថា៖ «ការទទួលបានឱកាស ទៅប្រកួតតំណាងឱ្យកម្ពុជា លើកដំបូងនេះ ពិតជាមានសារៈសំខាន់ខ្លាំងណាស់ សម្រាប់ខ្ញុំ ក៏ដូចជាក្រុមខ្ញុំ និងប្រទេសជាតិ ព្រោះនេះជាសុបិន ដែលយើងបានប្រឹងប្រែងរហូតមកដល់ពេលនេះ»។
លោក អ៊ិន សុភិន បានបន្ថែមថា៖ «គោលដៅរបស់យើង ក្នុងការបង្កើតក្រុមនេះឡើង គឺទី១ ដើម្បីលើកពានថ្នាក់ជាតិ ដែលយើងធ្វើបានហើយ និងទី២ ចង់លើកពានថ្នាក់អន្តរជាតិ អ៊ីចឹងការប្រកួតនេះ សំខាន់បំផុត ហេតុនេះក្រុមការងារទាំងអស់ ត្រូវប្រឹងឱ្យអស់ពីសមត្ថភាព ព្រោះនេះជាអត្ថប្រយោជន៍មួយ និងជាកិត្តិយសដ៏សំខាន់របស់ក្រុម និងជាកិត្តិយសសម្រាប់ប្រទេសជាតិ នៅលើឆាកអន្តរជាតិ ដែលមិនអាចកាត់ថ្លៃ បាននោះឡើយ អ៊ីចឹងបើទោះបីជា ការងារនេះ មានការលំបាក តែយើងនឹងខំប្រឹងប្រែង ប្រជែងយកពាននេះ»៕