ខ្សែប្រយុទ្ធឆ្នើមរបស់កម្ពុជា សៀង ចន្ធា (ស) ត្រូវបានខ្សែការពារក្រុមម្ចាស់ផ្ទះជប៉ុន បិទ មិនឱ្យអូសបាល់ទៅមុខបាន។ រូប FFC
.jpg)
ភ្នំពេញ៖ ក្រុមជម្រើសជាតិជប៉ុនអាយុក្រោម ២៣ ឆ្នាំ បានបង្ហាញឱ្យឃើញយ៉ាងច្បាស់ថា ពួកគេ ជាក្រុមខ្លាំង ដែលមិនបណ្តោយឱ្យក្រុមមានបទពិសោធនៅក្មេងខ្ចី របស់កម្ពុជា អាចទម្លុះសំណាញ់ទីរបស់ពួកគេ បាននោះទេ តាមរយៈការយកឈ្នះ ៤-០ សម្រាប់ការប្រកួតជម្រុះប្រចាំពូល K នៃពានរង្វាន់ AFC U23 Asian Cup Uzbekistan 2022 នៅកីឡដ្ឋាន J-Village ប្រទេសជប៉ុន ដែលទើបបានបញ្ចប់មុននេះបន្តិច។
បើទោះបីជា ក្រុមជម្រើសជាតិកម្ពុជាអាយុក្រោម ២៣ ឆ្នាំ មានសមត្ថភាព អាចយកឈ្នះក្រុម U23 ហុងកុង ៤-២ សម្រាប់ការប្រកួតបើកឆាក ប៉ុន្តែ កម្ពុជា មិនអាចទប់ទល់ជាមួយ ទម្រង់លេងដ៏ល្អរបស់ក្រុមម្ចាស់ផ្ទះ ជប៉ុន បាននោះទេ គឺពួកគេ បានរបូត ២ គ្រាប់ នៅក្នុងតង់ទី១ និងបន្តរបូត ២ គ្រាប់ទៀត នៅក្នុងតង់ទី ២ ជាមួយការចាញ់ ៤-០។
យ៉ាងណាក៏ដោយ តាមរយៈការប្រកួតនេះ ក្រុមកម្ពុជា ពិតជាបានបង្ហាញការលេងដោយឆន្ទៈ និងគ្មានការភ័យខ្លាច គឺពួកគេ បានព្យាយាមបិទ និងគ្រប់គ្រងបាល់ ដើម្បីវាយបកទៅលើក្រុមជប៉ុន ផងដែរ គ្រាន់តែគ្មានឱកាសស៊ុតបាល់ បានពេញជើងល្អ ហើយសកម្មភាពនេះ បានបង្ហាញថា កម្ពុជា ពិតជាហ៊ានលេង ដែលស្របទៅតាមការចង់បានរបស់គ្រូបង្គោលលោក Ryu Hirose ដោយបានលើកឡើង មុនការប្រកួតថា កម្ពុជា នៅតែឈរលើគោលការណ៍លេងបាល់តាមរបៀបរបស់ខ្លួន ទោះក្រុមជប៉ុន មានកម្រិតលេងលើ កម្ពុជា។
ជាមួយគ្នានេះ ដើម្បីការអភិវឌ្ឍគុណផល នៃការលេងរបស់ក្រុម U23 កម្ពុជា លោក Ryu Hirose ក៏បានផ្លាស់ប្តូរឱ្យកីឡាករវ័យក្មេង មានបទពិសោធនៅក្មេងខ្ចី ដូចជា ឡេង ណូរ៉ា, ស រតនា និងកីឡាករមួយចំនួនទៀត បានចូលលេង នៅក្នុងជំនួបនេះផងដែរ ដើម្បីអភិវឌ្ឍសមត្ថភាពបន្ថែម ក្នុងទិសដៅពង្រឹងសមត្ថភាពរបស់ពួកគេ ត្រៀមឆ្ពោះទៅកាន់ការប្រកួតស៊ីហ្គេម ជាពិសេសស៊ីហ្គេម ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ។
តាមរយៈការចាញ់ក្រុមជប៉ុន ៤-០ សម្រាប់ការប្រកួតលើកទី ២ ចុងក្រោយរបស់ខ្លួននេះ ក្រុមកម្ពុជា បានធ្លាក់ពីលេខ ១ ទៅឈរនៅលេខ ២ ឯក្រុមជប៉ុន បានឡើងទៅឈរនៅលេខ ១ ហើយក៏ជាក្រុម ដែលអាចនឹងគ្រប់គ្រងទីតាំងនេះ ដើម្បីឡើងទៅលេងនៅវគ្គបន្ត ក្នុងនាមជាក្រុមលេខ ១ តំណែងពូល K នេះផងដែរ បើទោះបីជា ពួកគេ នៅសល់ការប្រកួតមួយទៀត ជាមួយក្រុមហុងកុង នៅថ្ងៃទី ២៨ ខែតុលា ក៏ដោយ។
ចំណែកក្រុម U23 កម្ពុជា ក៏នៅសល់ឱកាសតិចតួច ក្នុងការចាំអ៊ុតមើល ពីឱកាសរបស់ខ្លួនផងដែរ ព្រោះបើ ជប៉ុន បន្តយកឈ្នះក្រុមហុងកុង នោះកម្ពុជា នឹងឈរនៅលេខ២ ដែលនឹងត្រូវធ្វើការវាយតម្លៃ និងប្រៀបធៀបជាមួយក្រុមលេខ ២ របស់បណ្តាពូលចំនួន ៩ ទៀត ដើម្បីរកក្រុមលេខ ២ ល្អ ចំនួន ៤ ក្រុម សម្រាប់ឡើងទៅប្រកួតវគ្គបន្ត ជាមួយក្រុមលេខ ១ នៅតាមពូលទាំង ១០ នៅប្រទេស Uzbekistan៕
