ភ្នំពេញ៖ ប្រដាល់គុនខ្មែរអលស្តារ វគ្គ ២ ដែលមានការប្រកួតច្រើនទម្រង់ មានប្រដាល់គុនខ្មែរ ប្រដាល់សកល ប្រដាល់ឃីកបុកស៊ី ប្រដាល់គុនខ្មែររុំអំបោះឆៅ និងការប្រកួតផ្តាច់ព្រ័ត្រ ដណ្តើមខ្សែក្រវាត់ ពន្លកគុនខ្មែរ សរុបចំនួន ១០ គូ ហើយបានធ្វើឡើង កាលពីយប់ថ្ងៃពុធនោះ បានទទួលការគាំទ្រទ្វេដង។
ទោះព្រឹត្តិការណ៍នេះ ជាលក្ខណៈឯកជន ប៉ុន្តែការប្រកួត ត្រូវបានបានធ្វើឡើង ក្រោមអធិបតីភាព លោក ខៀវ កាញារិទ្ធិ រដ្ឋមន្ត្រីក្រសួងព័ត៌មាន និងប្រធានសហព័ន្ធកីឡាផ្នែកប្រដាល់ទាំង ៣ ព្រមទាំងមន្ត្រីពាក់ព័ន្ធកីឡាជាច្រើនទៀត។ ជាមួយគ្នានេះ ស្ថានីយទូរទស្សន៍ជាតិកម្ពុជា បានទទួលផ្សាយផ្ទាល់ ខណៈដែលសមាភាពអ្នកប្រដាល់ទាំង ១០ គូ សុទ្ធតែជ្រើសរើសចេញមកប្រកួតជាកីឡាករលំដាប់ជួរមុខ ធ្វើឱ្យកម្មវិធីប្រកួត មានអ្នកចូលមើលតាមអនឡាញសរុបពេលចប់ការប្រកួត មានចំនួនដល់ទៅ 462 K។
លោក ស៊ន អេលីត ស្ថាបនិក និងជាអ្នកគ្រប់គ្រងការប្រកួតនេះ បានប្រាប់ថា៖«ដោយមានការគាំទ្រខ្លាំង ពីមហាជន វិស័យឯកជន និងទូរទស្សន៍ជាតិកម្ពុជា បានធ្វើឱ្យកម្មវិធីគុនខ្មែរអលស្តារ វគ្គ ២ កាន់តែល្អជាងមុនទ្វេដង និងមានថ្នាក់ដឹងនាំ ចូលរួមគាំទ្រច្រើនគួរឱ្យមោទនៈ។ តែទោះជាយ៉ាងណា កម្មវិធីគុនខ្មែរអលស្តារ នៅមិនទាន់កំណត់ពេលវេលា ការរៀបចំជាលើកទី ៣ ឬវគ្គ ៣ នៅឡើយទេ ព្រោះការចំណាយពេលប្រកួត លើកទី២ នេះ សរុបជិត ២០ ០០០ ម៉ឺនដុល្លារទៅហើយ»។
ចំណែក លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានថ្លែងថា៖ «កម្មវិធីប្រដាល់គុនខ្មែរអលស្តារ លើកទី២ នេះ ល្អណាស់ និងប្លែក ជាពិសេសអាចចូលប្រកួតបានដល់ទៅ ៣ សហប័ន្ធ គឺមានប្រដាល់គុនខ្មែរ, ប្រដាល់សកល និងប្រដាល់ឃីកបុកស៊ីង ហេតុនេះ ខ្ញុំក្នុងនាមឱ្យសហព័ន្ធ ក៏ដូចខ្លួនខ្ញុំផ្ទាល់ គឺពេញចិត្ត ព្រមទាំងគាំទ្រខ្លាំងណាស់ ហើយការប្រកួតនេះ ក៏ស្របទៅនឹងផែនការយុទ្ធសាស្ត្ររបស់ប្រដាល់គុនខ្មែរផងដែរ»។
ចំពោះលោក ខៀវ កាញារិទ្ធិ មានប្រសាសន៍ថា៖ «ខ្ញុំគាំទ្រកម្មវិធីនេះ និងបានសហការដោយមានទូរទស្សន៍ជាតិកម្ពុជា ជួយផ្សាយផ្ទាល់ ជូនបងប្អូនទស្សនាទៀតផង ហើយនៅពេលខាងមុខ និងជាបន្តបន្ទាប់ ទូរទស្សន៍ជាតិកម្ពុជា នឹងបន្តសហការជាមួយកម្មវិធីនេះ ដើម្បីផ្សាយផ្ទាល់ តាមការរៀបចំឯកភាពគ្នា»។
សម្រាប់លទ្ធផលការប្រកួតវិញ អ្នកទស្សនាភាគច្រើនលើសលុប បានកោតសរសើរដល់ការប្រឹងប្រែងរបស់ លោក ស៊ន អេលីត ដែលជាស្ថាបនិក និងក្រុមការងារស្ម័គ្រចិត្តរបស់លោក ដែលបានយកចិត្តទុកដាក់ខ្ពស់ ក្នុងការរៀបចំប្រកួត ទើបសម្រេចបាននូវលទ្ធផលគួរឱ្យមោទនៈបែបនេះ។
តាមរយៈការប្រកួតនោះ កីឡាករវ័យក្មេង ឆូយ សុថាត់ បានក្លាយជាម្ចាស់ខ្សែក្រវាត់ ប្រភេទទម្ងន់ ៤៥ គីឡូក្រាម និងប្រាក់រង្វាន់សរុបចំនួន ៤ លានរៀល ក្រោយផ្តួលកីឡាករ អេលីត សំណាង ឱ្យសន្លប់ទឹកទី៣ នៅក្នុងការប្រកួតផ្តាច់ព្រ័ត្រ នៃកម្មវិធីពន្លកគុនខ្មែរ។
ចំណែកការប្រកួតលក្ខណៈឃីកបុកស៊ីង កាន់ ម៉េងហុង ឈ្នះពិន្ទុ ខាំ ខ្លានាង រីឯ គង់ សំបូរ ឈ្នះ សោម ពិសិដ្ឋ ដោយពិន្ទុ ហើយ អេលីត សាន់ ក៏បានឈ្នះ វ៉ាន់ វឿន ដោយពិន្ទុដែរ តែ លន បញ្ញា បានវ៉ៃឱ្យ វី សម្ភស្ស ខូចដៃ នៅទឹកទី២ ខណៈ ឃីម បូរ៉ា បានឈ្នះពិន្ទុ អេលីត ចំរើន វិញ សម្រាប់ប្រកួតគុនខ្មែរ ៣ ទឹក។ ចំពោះការវ៉ៃរុំអំបោះឆៅ ធន់ ចាន់តាក់ បានផ្តួល អេលីត ភក្តី នៅដើមទឹកទី១ និង ឡៅ ចន្ទ្រា បានឈ្នះ ផល សោភ័ណ្ឌ ដោយពិន្ទុ៕