ភ្នំពេញ៖ អ្នកចាត់ការក្រុមជម្រើសជាតិកម្ពុជា លោក Keisuk Honda បានមើលឃើញថា ក្រុមកម្ពុជា គួរតែអាចស៊ុតបញ្ចូលទីបាន ១ ឬ ២ គ្រាប់ ជាពិសេសនៅតង់ទី១ ប៉ុន្តែកម្ពុជា បែរជាមិនអាចធ្វើបាន ហើយបានបន្តចាញ់ក្រុមម៉ាឡេស៊ី ៣-១ នៅក្នុងការប្រកួតបើកឆាក ប្រចាំពូលB នៃពានរង្វាន់ AFF Suzuki Cup 2020 កាលពីយប់ថ្ងៃចន្ទ ម្សិលមិញ។
វីរបុរសបាល់ទាត់របស់ជប៉ុន Keisuke Honda ដែលបានធ្វើដំណើរទៅកាន់ប្រទេសសិង្ហបុរី ដើម្បីដឹកនាំក្រុមជម្រើសជាតិកម្ពុជា ដោយផ្ទាល់នោះ បានដាក់កីឡាករសុទ្ធតែជម្រើសល្អៗ ដើម្បីប្រកួតជាមួយក្រុមម៉ាឡេស៊ី ព្រោះអ្នកចាត់ការរូបនេះ ពិតជាចង់ឃើញក្រុមកម្ពុជា អាចកែប្រែប្រវត្តិសាស្រ្តជូរចត់របស់ខ្លួនបាន សម្រាប់ការជួប ម៉ាឡេស៊ី ក្នុងពានរង្វាន់ AFF Suzuki Cup នេះ ប៉ុន្តែកម្ពុជា នៅតែគេចមិនផុតពីការបន្តចាញ់។
«ខ្ញុំគិតថា យើងគួរតែស៊ុតបាន ១ គ្រាប់ ឬ ២ គ្រាប់ ជាពិសេស នៅតង់ទី ១ ដែលយើងមានឱកាសច្រើនដង ប៉ុន្តែមិនថ្មីទេ ព្រោះដូចអ្នកគ្រប់គ្នា បានឃើញហើយថា ការលេងជាមួយ ក្រុមម៉ាឡេស៊ី វាមិនងាយស្រួលនោះទេ»។ លោក Keisuke Honda បានលើកឡើងបែបនេះ នៅក្នុងសន្និសីទកាសែត ក្រោយការប្រកួត បានបញ្ចប់ កាលពីយប់ថ្ងៃចន្ទ ម្សិលមិញ។
ជាមួយគ្នានេះ លោក Keisuke Honda បានលើកទឹកចិត្ត និងជំរុញដល់ក្រុមកម្ពុជា តាំងពីមុនការប្រកួតចាប់ផ្តើម ថាត្រូវខំប្រឹង ដើម្បីកែប្រែប្រវត្តិសាស្រ្តរបស់ខ្លួន ព្រោះកម្ពុជា មិនធ្លាប់ឈ្នះ ម៉ាឡេស៊ី សោះ ក្នុងពានរង្វាន់ AFF Suzuki Cup នេះ គឺកម្ពុជាបានចាញ់ក្រុមម៉ាឡេស៊ី ៣-០ កាលពីឆ្នាំ ២០០០ ហើយបានបន្តចាញ់ ៣-២ កាលពីឆ្នាំ២០១៦ និងចាញ់ ១-០ កាលឆ្នាំ ២០១៨។
លោក Keisuke Honda បានបញ្ជាក់ថា៖ «វាជាប្រវត្តិសាស្រ្ត! ដូចដែលខ្ញុំបានប្រាប់កីឡាករថា យើងមិនដែលឈ្នះ ម៉ាឡេស៊ី នោះទេ នៅក្នុងពានរង្វាន់បាល់ទាត់អាស៊ាននេះ ដូច្នេះវាជាឱកាសរបស់យើង។ តែទោះបីជាយ៉ាងណា យើងបានប្រឹងប្រែងណាស់ហើយ ហើយខ្ញុំមានមោទនភាព ចំពោះក្រុមការងារ និងកីឡាករទាំងអស់»។
សម្រាប់ការប្រកួតនៅ ពហុកីឡដ្ឋាន Bishan Stadium ប្រទេសសិង្ហបុរី កាលពីថ្ងៃចន្ទនោះ ក្រុមកម្ពុជា បានបង្ហាញទម្រង់លេងល្អ នៅដើមតង់ទី ១ ប៉ុន្តែអ្វីៗ បានប្រែប្រួល នៅពេលខ្សែការពារ កែន ច័ន្ទសុភ័ក្រ្ត បានបង្កើតកំហុស ដោយបានជ្រុលជើងធាក់ឱ្យកីឡាករម៉ាឡេស៊ី ដួល នាំឱ្យអាជ្ញាកណ្តាលពិន័យបាល់ ១១ ម៉ែត្រ ហើយ កីឡាករ Safawi ជាអ្នកស៊ុតបានសម្រេចឱ្យ ម៉ាឡេស៊ី នៅនាទីទី ២៣។
ជាមួយការចាញ់ប្រៀប ១-០ នេះ ក្រុមកម្ពុជា បានបង្កើនការវាយលុកជាបន្តបន្ទាប់ ក្នុងបំណង រកគ្រាប់បាល់បានវិញ ប៉ុន្តែការព្យាយាមវាយបកលឿនៗ ប្រកបដោយភាពច្បាស់លាស់របស់ ម៉ាឡេស៊ី បានផ្តល់ឱកាសឱ្យ ខ្សែប្រយុទ្ធ Akhyar និង Kogileswaran រកបានម្នាក់ ១ គ្រាប់ទៀត នៅនាទីទី ៦១ និងទី ៧៨ គឺមុនពេល សេត រ៉ស៊ីប រកបាន ១ គ្រាប់ឱ្យកម្ពុជា តាមរយៈការស៊ុតបាល់ពិន័យ ១១ ម៉ែត្រ បានសម្រេច នៅនាទីទី ៩០។
ការចាញ់ក្រុមម៉ាឡេស៊ី ៣-១ នេះ វាបានបន្ថែមសម្ពាធកាន់តែធ្ងន់ សម្រាប់ក្រុមកម្ពុជា ក្នុងការឈានទៅប្រកួតលើកទី ២ ជាមួយក្រុមជម្រើសជាតិឥណ្ឌូនេស៊ី នៅថ្ងៃព្រហស្បតិ៍ ខាងមុខនេះ ចំណែកក្រុមឡាវ ក៏បានជួបការបរាជ័យ នៅថ្ងៃប្រកួតបើកឆាកនេះ ផងដែរ ដោយពួកគេ បានចាញ់ក្រុមការពារតំណែងជើងឯក វៀតណាម ២-០ កាលពីយប់ថ្ងៃចន្ទ នោះដែរ៕