Mogni (ស្ដាំទី ២) រត់សម្ដែងការអបអរ ក្រោយស៊ុតឱ្យកូម័រ នាំមុខហ្គាណា ៣-២ អំឡុងការប្រកួត នៅ AFCON។ AFP
.jpg)
ក្រុងយុនដេ: ម្ចាស់ជើងឯក ៤ សម័យកាលរបស់តំបន់អាហ្វ្រិក Africa Cup of Nations (AFCON) គឺក្រុមជម្រើសជាតិហ្គាណា បានធ្លាក់ចេញពីព្រឹត្តិការណ៍ដ៏ធំនេះ ហើយ បន្ទាប់ពីភ្លាត់ចាញ់ក្រុមដ៏តូចកូម័រ ក្នុងលទ្ធផល ៣-២ ពីការប្រកួតចុងក្រោយ ក្នុងវគ្គសន្សំពិន្ទុតាមពូល កាលពីថ្ងៃអង្គារ នាទីក្រុងហ្គារ៉ូ (Garoua)។
ក្រុមហ្គាណា ដែលមានរហស្សនាម «The Black Stars» (តារាខ្មៅ) ឃើញថា ត្រូវបានអាជ្ញាកណ្ដាលផ្ដល់កាតក្រហមដល់ប្រធានក្រុម Andre Ayew នៅនាទីទី២៥ ហើយបន្ទាប់ពីត្រូវនាំមុខ ២គ្រាប់មុន បានរងបរាជ័យ នៅពេលដែលខ្សែការពារ Ahmed Mogni របស់ក្រុមកូម័រ ស៊ុតគ្រាប់ទី២ របស់ខ្លួន នៅប្រមាណជា ៥ នាទី ដែលហ្គេមចុងក្រោយ ប្រចាំពូល C នេះ ត្រូវបញ្ចប់។
ក្រុមម៉ារ៉ុក និងហ្គាបុង ដែលស្មើគ្នា ២-២ សម្រាប់ការប្រកួតក្នុងពូលតែ ១ នៅឯក្រុងយុនដេ បានរក្សាចំណាត់ថ្នាក់លេខ ១ និងលេខ ២ តាមលំដាប់លំដោយ និងបានសិទ្ធិឆ្លងទៅវគ្គ ១៦ ក្រុមចុងក្រោយ ដែលនឹងចាប់ផ្ដើមការប្រកួតនៅថ្ងៃអាទិត្យនេះ។
ក្រុមកូម័រ ដែលតំណាងឱ្យប្រទេសកោះតូចមួយនៅឆ្នេរសមុទ្រភាគអាគ្នេយ៍នៃទ្វីបអាហ្វ្រិក បានបញ្ចប់នៅលេខ ៣ ហើយត្រូវរង់ចាំដល់ថ្ងៃព្រហស្បតិ៍ ដើម្បីបានដឹងថា តើពួកគេស្ថិតក្នុងចំណោមក្រុមចំណាត់ថ្នាក់លេខ ៣ ល្អបំផុតទាំង ៤ ដែលទទួលបានកៅអីចុងក្រោយ នៅវគ្គ ១៦ ក្រុម ឬយ៉ាងណា។
«យើងមិនបានថយក្រោយនោះទេ សូម្បីតែបន្ទាប់ពីក្រុមហ្គាណាតាមស្មើ។ យើងតែងតែជឿថា យើងអាចសម្រេចបាននូវជ័យជម្នះដ៏ល្បីមួយ សម្រាប់ប្រទេសរបស់យើង»។ នេះជាការលើកឡើងរបស់គ្រូបង្វឹកក្រុមកូម័រ លោក Amir Abdou ដែលចូលមកធ្វើតួនាទី តាំងពីឆ្នាំ ២០១៤។
«ខ្ញុំបានបន្ថែមកីឡាករលើតំបន់ប្រយុទ្ធ ដោយមានជំនឿថា យើងអាចរកគ្រាប់បាល់ទី៣ បានជាមិនខាន ហើយការសម្រេចចិត្តរបស់ខ្ញុំ ទទួលបានផល។ ឥឡូវនេះ យើងត្រូវតែរង់ចាំមើលថា តើយើងស្ថិតក្នុងចំណោមក្រុមចំណាត់ថ្នាក់លេខ ៣ ល្អបំផុតទាំង ៤ ហើយតើបានទៅលេងនៅជុំទី២ ឬអត់?»។
«យើងពេញចិត្តចំពោះវិធីសាស្ត្រ ដែលយើងបានលេង។ យើងបានរៀបចំគម្រោងរួចជាស្រេចហើយ និងធ្វើតាមផែនការនោះ។ យើងបានរៀនសូត្រពីកំហុស ដែលយើងបានបង្កើតឡើង នៅក្នុងហ្គេមមុនៗ។ ជាការពិត ខ្ញុំមិនសប្បាយចិត្តទេ ដែលយើងបានរបូតគ្រាប់បាល់ ២ គ្រាប់ តែយើងនឹងប្រសើរឡើងជាក់ជាមិនខាន»។ លោក Abdou បានបញ្ជាក់បន្ថែម។
ចំណែកឯគ្រូបង្វឹករបស់ក្រុមហ្គាណា លោក Milovan Rajevac ដែលមានជាប់សញ្ជាតិស៊ែប៊ីដែរនោះ បានប្រាប់ឱ្យដឹងថា លោកនឹងមិនធ្វើការលាលែងនោះឡើយ បើទោះបីជាក្រុមបានបញ្ចប់នៅបាតពូល ដោយមានត្រឹមតែ ១ ពិន្ទុក៏ដោយ។
«ខ្ញុំមកកាន់ប្រទេសហ្គាណា ដើម្បីដណ្ដើមសិទ្ធិទៅ World Cup។ នោះជាគោលដៅចម្បងរបស់ខ្ញុំ។ ខ្ញុំនឹងបន្តស្នាក់ ហើយដឹកនាំក្រុម ទៅប្រកួតវគ្គចាញ់ធ្លាក់ក្នុងខែមីនា»។ នេះជាការលើកឡើងរបស់លោក Rajevac។
ការចាប់ឆ្នោតនៅក្នុងក្រុងឌូអាឡា (Douala) នឹងសម្រេចថា តើក្រុមហ្គាណា ត្រូវប្រឈមជាមួយសេណេហ្គាល់ ម៉ារ៉ុក អាល់ហ្សេរី ទុយនីស៊ី ឬក៏នីហ្សេរីយ៉ា ក្នុងការប្រកួតវគ្គចាញ់ធ្លាក់ចំនួន ២ជើង ដោយក្រុមឈ្នះ មានសិទ្ធិទៅចូលរួមក្នុងជុំចុងក្រោយនៃព្រឹត្តិការណ៍ World Cup 2022 នាប្រទេសកាតា៕ AFP/VN
