ក្រុមអត្តពលិក ថតជាមួយថ្នាក់ដឹកនាំ និងគ្រូបង្វឹក ក្រោយពិធីបំពាក់មេដាយ។ សហការី
ភ្នំពេញៈ មន្ត្រីជំនាញរបស់សហព័ន្ធកីឡាទូកក្តោងកម្ពុជា បានធ្វើការវាយ តម្លៃខ្ពស់ថា ការប្រកួតកីឡាទូកក្តោងជ្រើសរើសជើងឯកថ្នាក់ជាតិ ឆ្នាំ ២០២១ ដែលទើបបានបញ្ចប់ កាលពីចុងសប្តាហ៍មុននេះ គឺមានការរីកចម្រើនខ្លាំង ទាំងបច្ចេកទេសនៃការរៀបចំ និងសិទ្ធផលរបស់កីឡាករ-កីឡាការិនី។
លោក សោម សុទ្ធរិទ្ធិពង្ស អគ្គលេខាធិការសហព័ន្ធកីឡាទូកក្តោងកម្ពុជា បានប្រាប់ថា សម្រាប់ការប្រកួតថ្នាក់ជាតិ ដែលធ្វើ នៅលើឆ្នេររាម ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ និងទើបបានបញ្ចប់កាលថ្ងៃទី ១៣ ខែកុម្ភៈនោះ គឺការរៀបចំ ត្រូវបានអនុវត្តតាមស្តង់ដាអន្តរជាតិ ដូចការប្រកួតកីឡាទូកក្តោងជើងឯកអាស៊ីអាគ្នេយ៍ ឆ្នាំ ២០២១ នៅព្រះសីហនុដែរ។
លោកបានប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា៖ «សម្រាប់ការវាយតម្លៃនៃការប្រកួតជើងឯកថ្នាក់ជាតិនេះ គឺយើងទទួលបានលទ្ធផលល្អកម្រិតខ្ពស់ ព្រោះយើងបានយកបទពិសោធ ដែលយើងទទួលបានពីគណៈកម្មការអន្តរជាតិ ក្នុងការប្រកួតជើងឯកអាស៊ី កាលពីខែធ្នូ ឆ្នាំ ២០២១ មកអនុវត្តនៅក្នុងព្រឹត្តិការណ៍នេះ គឺក្នុងលក្ខណៈស្តង់ដាតែមួយតែម្តង»។
អគ្គលេខាធិការវ័យក្មេងរូបនេះបន្ថែមថា៖ «ចំណែកសិទ្ធផលរបស់ក្រុមអត្តពលិក យើងមើលឃើញថា ពួកគាត់មានគុណភាពឡើងខ្ពស់ ដោយសារមួយរយៈកន្លងមកនេះ ពួកគាត់បានហ្វឹកហាត់ត្រៀមបានល្អ ហើយអ្នកមួយចំនួន ក៏បានចូលរួមការប្រកួតជើងឯកអាស៊ាន នៅខេត្តព្រះសីហនុ កន្លងមកផងដែរ»។
សម្រាប់ការប្រកួតកីឡាទូកក្តោងថ្នាក់ជាតិនេះ មានក្លិប៣បានចូលរួម គឺក្លិបទូកក្តោងកែប, ទូកក្តោងសុខា និងក្លិបទូកក្តោងតារាសាគរ ដោយមានកីឡាករ២៣រូប និងកីឡាការិនីម្នាក់។ អ្នកទាំងនេះ ត្រូវប្រកួតប្រជែងគ្នា នៅលើវិញ្ញាសា ៤ ប៉ុន្តែសម្រាប់អ្នកចូលថ្មី អាចប្រកួតបានតែវិញ្ញាសា Byte Boat Open មួយទេ ចំណែក៣វិញ្ញាសាផ្សេង ជាការប្រកួតប្រជែងគ្នារវាងអ្នកមានពិសោធ និងក្រុមជម្រើសជាតិទាំង ១០ នាក់ (ស្រី ១)។
ជាលទ្ធផល កីឡាករ ប៉ាល់ សិលា បានឈ្នះមេដាយមាស លើវិញ្ញាសា Windsurfing RS:One លេខ ២ សែម ប្រុសពៅ លេខ ៣ ហេន សុភី ចំណែកវិញ្ញាសា Windsurfing Techno 293 លេខ ១ បានទៅកីឡាករ កែវ ភារុណ លេខ ២ កែវ ភានុន លេខ ៣ សុខ គុយសៀន ហើយវិញ្ញាសា Laser Byte លេខ ១ កីឡាករ ស៊ុន ចាន់ឌឿន លេខ ២ ញ៉ូវ ចាន់ លេខ ៣ កីឡាករ ឡុច ដារ៉ុង ខណៈវិញ្ញាសា Byte Boat លេខ ១ បានទៅកីឡាករ ស៊ីន សំណាង លេខ ២ មាច ឫទ្ធីវង្ស និងលេខ ៣ កីឡាករ ស៊ុ សរ៉ា។
ទាក់ទងលទ្ធផលនេះ លោក សោម សុទ្ធរិទ្ធិពង្ស បានបញ្ជាក់ថា៖ «ចំពោះអ្នកទទួលបានជយលាភី នៅក្នុងការប្រកួតថ្នាក់ជាតិនេះ គឺភាគច្រើនជាកីឡាករ នៅក្នុងក្រុមជម្រើសជាតិ ដោយសារចំនួនអត្តពលិករបស់យើង នៅមានកំណត់ ដ្បិតអីនេះជាប្រភេទកីឡាថ្មី តែមានការប្រកួតប្រជែងខ្ពស់ ទាំងជាមួយធម្មជាតិ និងជាមួយមនុស្ស ចំណែកការហ្វឹកហាត់ ក៏មានការពិបាក ហេតុនេះយើងពិបាកក្នុងការរកធនធានកីឡាករឱ្យបានច្រើន ដូចប្រភេទកីឡាផ្សេងៗទៀតដែរ ហើយសម្ភារប្រើប្រាស់ ដូចជាទូក ក៏មានតម្លៃថ្លៃ ដែលយើងត្រូវកំណត់ចំនួនអ្នកចូលរួមផងដែរ»៕
