ការបញ្ជាសេះឱ្យលោតផ្លោះរបារឧបសគ្គ នៅក្នុងការប្រកួតកីឡាជិះសេះផ្លោះរបារ ឆ្នាំ ២០២២ កាលពីថ្ងៃអាទិត្យ។ រូប CAMSOC
ភ្នំពេញៈ បើទោះបីជាក្រុមអត្តពលិក ជិះសេះកម្ពុជា ធ្លាប់ឈ្នះបានត្រឹមមេដាយសំរឹទ្ធស៊ីហ្គេម កាលឆ្នាំ ២០១៧ ប៉ុន្តែប្រធានសហព័ន្ធកម្ពុជាបង្ហាត់ជិះសេះ លោកស្រី ទេព ម៉ូណា មានជំនឿចិត្តថា ការធ្វើជាម្ចាស់ផ្ទះស៊ីហ្គេម លើកទី៣២ ជាប្រវត្តិសាស្ត្រនៅកម្ពុជា ឆ្នាំ ២០២៣ ខាងមុខនេះ ក្រុមជម្រើសជាតិកម្ពុជា នឹងអាចដណ្តើមបានមេដាយមាស ក្នុងកម្រិតខ្ពស់ជាងបណ្តាប្រទេសជាភ្ញៀវនៅលើប្រភេទកីឡាជិះសេះនេះ។
លោកស្រី ទេព ម៉ូណា បានថ្លែងថា៖ «ការហ្វឹកហាត់ និងការរៀបចំឱ្យមានការប្រកួតជាបន្តបន្ទាប់នេះ យើងសង្ឃឹមថា យើងនឹងមានលទ្ធភាពល្អ ក្នុងការប្រកួត ហើយចំពោះការប្រកួតស៊ីហ្គេម ឆ្នាំ ២០២៣ ហ្នឹង យើងត្រៀមឆ្ពោះទៅយកមេដាយមាស ព្រោះយើងមានឱកាសល្អណាស់ សម្រាប់ប្រទេសកម្ពុជា និងកីឡាករ កីឡាការិនីជម្រើសជាតិរបស់យើង ហើយយើងសង្ឃឹមថា យើងនឹងដណ្តើមឱ្យបានមេដាយមាសខ្ពស់ជាងគេ គឺពិតប្រាកដហើយ»។
ការបង្ហាញពីទំនុកចិត្ត និងការដាក់គោលដៅ ឆ្ពោះទៅរកការឈ្នះបានមេដាយមាសជាប្រវត្តិសាស្ត្ររបស់ប្រធានសហព័ន្ធកម្ពុជាបង្ហាត់ជិះសេះរូបនេះ ត្រូវបានធ្វើឡើង នៅក្រោយការប្រកួតកីឡាជិះសេះផ្លោះរបារ ឆ្នាំ ២០២២ នៅក្លិបកីឡា Cambodian Country Club កាលពីថ្ងៃអាទិត្យ ដោយសហព័ន្ធបានកំណត់ធ្វើនៅរៀងរាល់ ៦ សប្តាហ៍ម្តង ដើម្បីផ្តល់ឱ្យក្រុមក្រុមជម្រើសជាតិ បានប្រកួតគ្នាដើម្បីពង្រឹងសមត្ថភាព ធ្វើឱ្យមានការស៊ីចង្វាក់គ្នា ទាំងការលោត និងអារម្មណ៍រវាងសេះ និងអ្នកជិះ។
លោកស្រី ទេព ម៉ូណា ពេលថ្លែង នៅក្នុងពិធីបិទការប្រកួត ពីថ្ងៃអាទិត្យ។ រូប CAMSOC
លោកស្រី ទេព ម៉ូណា បានបន្ថែមថា៖ «ការប្រកួតកីឡាជិះសេះផ្លោះរបារនេះ យើងបានវាស់ស្ទង់ពីសមត្ថភាពរបស់សេះ និងអត្តពលិករបស់យើង ដោយសង្ឃឹមថា ទៅមុខទៀត នឹងអាចមានភាពប្រសើរឡើង ដ្បិតអីយើងពង្រឹងទាំងទៅលើលទ្ធភាពរបស់សេះរបស់យើង ព្រោះកីឡានេះ មិនមែនជាកីឡាធម្មតាទេ តែវាជាកីឡាដែលយើងត្រូវហ្វឹកហាត់ទាំងជាមួយសេះ និងកីឡាករ កីឡាការិនី ដោយយើងត្រូវពង្រឹងទាំងសងខាងឱ្យមានការស៊ីចង្វាក់គ្នា ដើម្បីឱ្យគាត់លោតបានខ្ពស់ មានភាពរលូន និងមិនលោតប៉ះរបារឧបសគ្គ»។
តាមប្រធានសហព័ន្ធរូបនេះ ឱ្យដឹងថា ការប្រកួតស៊ីហ្គេម ឆ្នាំ ២០២៣ កម្ពុជាក្នុងនាមជាម្ចាស់ផ្ទះ ត្រូវការសេះយ៉ាងតិច ២៥ ក្បាល ដើម្បីប្រើនៅក្នុងការប្រកួតនោះ ហើយគិតមកដល់ពេលនេះ សហព័ន្ធកម្ពុជាបង្ហាត់ជិះសេះ បានទិញសេះពីក្រៅប្រទេស និងនៅក្នុងស្រុកបានជាង ១០ ក្បាលហើយ ហើយនៅក្នុងចំណោមសេះទាំងនោះ ក៏មានសេះ ដែលមានសមត្ថភាពខ្ពស់ អាចលោតបានកម្ពស់ ១,២០ ម៉ែត្រផងដែរ។
«គិតមកដល់ពេលនេះ សេះរបស់យើងមួយចំនួន អាចលោតបានកម្ពស់ពី ១,១០ ទៅ ១,២០ ម៉ែត្រទៅហើយ គ្រាន់តែយើងត្រូវការធ្វើឱ្យគាត់មានភាពស្មើដៃគ្នាជាមួយអ្នកជិះ ហើយសេះត្រូវមានអារម្មណ៍ល្អ និងយល់ចិត្តគ្នាជាមួយអ្នកជិះទៀត ព្រោះយើងចង់លោតឱ្យបានល្អ និងស្របដៃគ្នា សម្រាប់ការលោតទាំង ១២ ឧបសគ្គតែម្តង»។
លោកស្រី ទេព ម៉ូណា បានថ្លែងប្រាប់ទៀតថា៖ «ការប្រកួតស៊ីហ្គេមនៅឆ្នាំ ២០២៣ យើងកំពុងសម្លឹងដាក់វិញ្ញាសាលោតកម្ពស់ ១,២០ ទៅ ១,២៥ ម៉ែត្រ ហើយយើងមានសេះ ១ ទៅ ២ ដែលអាចចូលរួមប្រកួតកម្រិតនេះបាន ប៉ុន្តែយើងនៅមានពេលវេលាហ្វឹកហាត់ជាមួយពួកគាត់ ដើម្បីឱ្យមានភាពស៊ីចង្វាក់គ្នារវាងសេះ និងអ្នកជិះ ហើយសព្វថ្ងៃនេះ យើងមានគ្រូបង្វឹកនៅក្នុងស្រុក និងគ្រូបង្វឹកមកពីក្រៅប្រទេស មកជួយបណ្តុះបណ្តាលថែមទៀត»។
ប្រធានសហព័ន្ធរូបនេះ បានបញ្ជាក់ថា៖ «បន្ថែមលើនេះ យើងបានបញ្ជូនគ្រូរបស់យើង ទៅបណ្តុះបណ្តាលថែមទៀតនៅក្រៅប្រទេស ហើយកន្លងមកក្រុមអត្តពលិករបស់យើង បានចេញទៅហ្វឹកហាត់ និងប្រកួតនៅក្រៅប្រទេសផ្សេងៗ អ៊ីចឹងនៅពេលស្ថានភាពជំងឺកូវីដ ១៩ បានស្ងប់ស្ងាត់វិញ សង្ឃឹមថា យើងនឹងបានចេញទៅហ្វឹកហាត់ និងប្រកួតនៅក្រៅប្រទេសជាបន្តទៀត ដូចជានៅបារាំង និងថៃ ជាដើម»។
លោកស្រី ម៉ូណា បានបង្ហើបទៀតថា៖ «យើងមានផែនការ ទទួលយកប្រទេស នៅក្នុងតំបន់អាស៊ាន ដូចជាម៉ាឡេស៊ី ថៃ និងប្រទេសមួយចំនួនទៀត មកប្រកួតជាមួយយើង ដោយយើងនឹងធ្វើម្តងមួយៗ ជាមួយប្រទេសទាំងនោះ ដើម្បីជាការវាស់ស្ទង់ និងទទួលបានបទពិសោធបន្ថែមទៀត នៅមុនពេលការប្រកួតស៊ីហ្គេមលើកទី៣២ ឆ្នាំ ២០២៣ នៅកម្ពុជា ឈានចូលមកដល់៕
