ភ្នំពេញៈ ក្រុមបាល់ទះជម្រើសជាតិកម្ពុជា បានធ្វើឱ្យគ្រប់គ្នាមើលឃើញថា ពួកគេនឹងអាចកែប្រែកំណត់ត្រាចាស់ ដើម្បីដើរលើគន្លងផ្លូវក្នុងការឆ្ពោះទៅបង្កើតបានប្រវត្តិសាស្ត្រថ្មី សម្រាប់ការប្រកួតប្រជែង ក្នុងព្រឹត្តិការណ៍ស៊ីហ្គេម លើកទី៣១ ឆ្នាំ ២០២១ នៅទីក្រុងហាណូយ ប្រទេសវៀតណាម។
បើទោះបីជា ក្រុមបាល់ទះកម្ពុជា មិនធ្លាប់បានឆ្លងផុត ក្នុងវគ្គជម្រុះតាមពូលនៅស៊ីហ្គេម ប៉ុន្តែការបង្ហាញសមត្ថភាពលេងយ៉ាងល្អ ដើម្បីយកឈ្នះក្រុមម្ចាស់មេដាយ ប្រាក់ ឆ្នាំ ២០១៩ ហ្វីលីពីន ក្នុងការប្រកួតបើកឆាកកាលពីថ្ងៃសៅរ៍ ដោយលទ្ធផល ៣ សិត ទល់នឹង ១ សិត (២៥-២១, ២៤-២៦, ៣០-២៨ និង ២៩-២៧) វាបានក្លាយជាលទ្ធផលដ៏ល្អបំផុត ដែលធ្វើអ្នកគាំទ្រ នៅកម្ពុជា មានការភ្ញាក់ផ្អើលខ្លាំង ខណៈស៊ីហ្គេម ឆ្នាំ២០១៩ ក្រុមបាល់ទះកម្ពុជា បានចាញ់ក្រុមម្ចាស់ផ្ទះហ្វីលីពីន ដល់ ៣-០ នោះ។
សម្រាប់ការទទួលបានជ័យជម្នះ ជាមួយការប្រកួតយ៉ាងស្វិតស្វាញនេះ វាអាចនឹងជួយឱ្យក្រុមកម្ពុជា បង្កើតបាននូវប្រវត្តិសាស្ត្រថ្មី សម្រាប់ការទទួលបានឱកាស ឡើងទៅវគ្គបន្តជាលើកដំបូង ព្រោះបើសិនជា ក្រុមហ្វីលីពីន បានបន្តចាញ់ក្រុមធ្លាប់ឈ្នះពាន ៨ សម័យកាលរបស់ថៃ នាការប្រកួតចុងក្រោយរបស់ពួកគេ ប្រចាំពូល B នារសៀលម៉ោង ២ ថ្ងៃចន្ទនេះ គឺក្រុមកម្ពុជា នឹងបានឡើងទៅវគ្គបន្ត ដោយស្វ័យប្រវត្តិតែម្តង បើទោះបីជា ការប្រកួតលើកទី២ ចុងក្រោយ ពួកគេបានទៅចាញ់ក្រុមថៃក៏ដោយ។
សម្រាប់ជំនួប នៅថ្ងៃនេះ វាក៏ជាការប្រកួតសងសឹករបស់ក្រុមថៃ ទៅលើហ្វីលីពីនផងដែរ ព្រោះកាលស៊ីហ្គេម ឆ្នាំ ២០១៩ ក្រុមម្ចាស់ផ្ទះហ្វីលីពីនបានទម្លាក់ថៃ ដោយការឈ្នះ ៣-២ នៅវគ្គ ១/២ ផ្តាច់ព្រ័ត្រ ប៉ុន្តែក្រុមហ្វីលីពីន បានទៅចាញ់ក្រុមម្ចាស់ជើងឯក ៩ សម័យកាល ឥណ្ឌូនេស៊ី ៣-០ នៅវគ្គផ្តាច់ព្រ័ត្រ៕