ណារ៉ុង កក្កដា ប្រជែងយកបាល់ជាមួយកីឡាករម៉ាឡេស៊ី។ រូប FFC
.jpg)
ភ្នំពេញៈ ក្រុមជម្រើសជាតិបាល់ទាត់កម្ពុជា អាយុក្រោម ២៣ ឆ្នាំ បានត្រឹមបំភ័យក្រុមជម្រើសជាតិម៉ាឡេស៊ី សម្រាប់ការប្រកួតជម្រុះលើកចុងក្រោយរបស់ពួកគេក្នុងព្រឹត្តិការណ៍ស៊ីហ្គេមលើកទី៣១ ឆ្នាំ ២០២១ ដែលកំពុងដំណើរការនៅទីក្រុងហាណូយ ប្រទេសវៀតណាម គឺមុនពេលពួកគេបានធ្វើដំណើរដោយយន្តហោះពិសេស ត្រឡប់មកមាតុប្រទេសវិញ កាលពីយប់ថ្ងៃចន្ទ ម្សិលមិញ។
តាមរយៈការប្រកួតជម្រុះចុងក្រោយ កាលពីល្ងាចថ្ងៃចន្ទនោះ ក្រុមជម្រើសជាតិកម្ពុជាក្រោមការដឹកនាំផ្ទាល់របស់វីរបាល់ទាត់ជប៉ុន លោក Keisuke Honda មិនបានប្រើអារម្មណ៍តូចចិត្ត ចំពោះការធ្លាក់ពីការប្រកួតនេះ ដើម្បីប្រកួតបង្រ្គប់កិច្ចជាមួយក្រុមម៉ាឡេស៊ីនោះទេ គឺក្រុមដ៏កម្សត់នេះ បានប្រឹងប្រែងលេងយ៉ាងយកចិត្តទុកដាក់បំផុត ដើម្បីពង្រឹងសមត្ថភាពខ្លួនឯងបន្ថែមទៀត។
ជាមួយការព្យាយាមលេងវាយបក ដោយភាពប្រាកដប្រជានោះ ក្រុមកម្ពុជាបានទទួលឱកាសដ៏ពិសេសមួយ នៅពេលខ្សែការពាររបស់ក្រុមម៉ាឡេស៊ី Zikri Khalili បានយកដៃទៅប៉ះបាល់នៅក្នុងតំបន់គ្រោះថ្នាក់ ហើយខ្សែការពារ ជួន ចាន់ចាវ ជាអ្នកស៊ុតបាល់ពិន័យ ១១ ម៉ែត្រនោះ បានសម្រេចដើម្បីជួយឱ្យក្រុមកម្ពុជា ១-០ នាំមុខនៅនាទីទី៤៥។
ជាមួយការនាំមុខនេះ បានធ្វើឱ្យក្រុមម៉ាឡេស៊ី ដែលត្រូវការឈ្នះជាដាច់ខាត ដើម្បីទទួលបានលេខ ១ ពីការប្រជែង ដោយប្រយោលជាមួយក្រុមថៃនោះ បានផ្លាស់ប្តូរសមាសភាពនៅតំបន់ប្រយុទ្ធមួយចំនួន ដើម្បីវាយបករកគ្រាប់បាល់មកវិញ ហើយភាពសប្បាយរីករាយពិតជាបានកើតមានឡើងចំពោះពួកគេមែន នៅពេលក្រុមនេះ បានទទួលបាល់ពិន័យ ១១ ម៉ែត្រវិញ ហើយខ្សែប្រយុទ្ធ Muhammad Hadi Fayyadh ជាអ្នកស៊ុតបានសម្រេចនៅនាទីទី៥១។
យ៉ាងណាក៏ដោយ ការព្យាយាមវាយបករបស់កម្ពុជាបានបង្កើតឱកាសមាស សម្រាប់ខ្សែប្រយុទ្ធ ណារ៉ុង កក្កដា ដោយរូបគេអាចប្រើដើមទ្រូងដក់យកបាល់ពីការលើកឱ្យរបស់មិត្តរួមក្រុមយ៉ាងល្អ រួច កក្កដា បានស៊ុតបាល់នោះ ផុតដៃអ្នកចាំទីរបស់ក្រុមម៉ាឡេស៊ី បញ្ចូលទីបានយ៉ាងល្អបំផុតនៅនាទីទី៦២។
គ្រាប់បាល់ទី២ របស់ក្រុមកម្ពុជានេះ បានដាក់សម្ពាធក្រុមម៉ាឡេស៊ីជាថ្មីម្តងទៀត ប៉ុន្តែត្រឹមរយៈពេល ៦ នាទីនៃការរកបានគ្រាប់បាល់របស់
ណារ៉ុង កក្កដា នេះ គឺខ្សែប្រយុទ្ធ Muhammad Hadi Fayyadh បានពាំងយកបាល់ពីការចេញមកបិទរបស់ ជួន ចាន់ចាវ រួចស៊ុតបាល់នោះ បញ្ចូលទីយ៉ាងស្អាតបំផុត ដើម្បីជួយឱ្យក្រុមម៉ាឡេស៊ីតាមស្មើ ២-២ វិញនៅនាទីទី៦៧ ហើយនេះក៏ជាគ្រាប់បាល់ចុងក្រោយ នាជំនួបនេះផងដែរ ព្រោះការព្យាយាមវាយបកសងគ្នាទៅវិញទៅមករបស់ក្រុមកម្ពុជា និងម៉ាឡេស៊ី សម្រាប់នាទីដែលនៅសល់ គឺគ្មានគ្រាប់បាល់កើតឡើងទៀតឡើយ។
ជាមួយការចែកគ្នាម្នាក់ ១ ពិន្ទុ នេះ ក្រុមម៉ាឡេស៊ីនឹងត្រូវឡើងទៅកាន់ការប្រកួតវគ្គ ១/២ ផ្តាច់ព្រ័ត្រ តំណាងឱ្យពូល B នេះ ជាមួយក្រុមជម្រើសជាតិថៃ ជាមួយការឈ្នះ ២ និងស្មើ ២ ប្រកួត ប៉ុន្តែក្រុមគោព្រៃជំទង់កម្ពុជា ដែលបានបញ្ចប់ការប្រកួតទាំង ៤ លើក ដោយឈ្នះ ១ ស្មើ ១ និងចាញ់ ២ ប្រកួតនោះ បានធ្លាក់ចេញពីការប្រកួតស៊ីហ្គេមនេះហើយ ហើយពួកគេបានធ្វើដំណើរមកដល់មាតុប្រទេសវិញ កាលពីយប់ថ្ងៃចន្ទ នោះតែម្តង៕
