ភ្នំពេញៈ ការប្រកួតស៊ីហ្គេម ដែលកម្ពុជាជាម្ចាស់ផ្ទះនៅឆ្នាំ ២០២៣ បានធ្វើឱ្យកីឡាករ កីឡាការិនីវាយកូនបាល់កម្ពុជា ២ រូប បង្ហាញនូវក្ដីសង្ឃឹមតិចតួច ក្នុងការដណ្ដើមយកមេដាយពីការប្រកួតលើវិញ្ញាសាឯកត្តជន ថ្វីបើពួកគេមានឆន្ទៈខ្ពស់ក្នុងការត្រៀមខ្លួនការហ្វឹកហាត់។ តែទោះបីជាយ៉ាងណា ពួកគេមានការជឿជាក់ថា នឹងអាចដណ្តើមបានមេដាយមាស សម្រាប់ការប្រកួតលើវិញ្ញាសាវាយគូ ដើម្បីឈានទៅសម្រេចគោលដៅរបស់សហព័ន្ធកីឡាវាយកូនបាល់កម្ពុជា ដែលមានមហិច្ឆតាចង់ដណ្តើមឱ្យបានមេដាយមាស លើសការដាក់សម្ទុះរបស់ CAMSOC។
កីឡាករសម្បូរដោយបទពិសោធ ឡុង សំនៀង អាយុ ២៩ ឆ្នាំ ដែលធ្លាប់បានឈ្នះមេដាយសំរឹទ្ធ លើការប្រកួតវិញ្ញាសាជាក្រុម នៅស៊ីហ្គេម ឆ្នាំ ២០១១ ប្រទេសឥណ្ឌូនេស៊ីនោះ ហាក់មិនសូវមានសង្ឃឹមខ្ពស់លើខ្លួនឯងប៉ុន្មានឡើយ សម្រាប់ការឈានទៅរកការឈ្នះបានមេដាយ លើវិញ្ញាសាឯកត្តជន សម្រាប់ស៊ីហ្គេម ឆ្នាំ ២០២៣ នៅកម្ពុជា លើកនេះ។ ជាក់ស្តែងដូចជាវៀតណាម ដែលកាលពីឆ្នាំ ២០១១ មានកម្រិតក្រោមកម្ពុជានោះ តែពេលនេះ គេឡើងខ្លាំងមែនទែន និងឈ្នះបានមេដាយមាស កាលស៊ីហ្គេម ឆ្នាំ ២០២២ ខណៈថៃ និងឥណ្ឌូនេស៊ី នៅតែខ្លាំង។ រីឯប្រទេសផ្សេងទៀត ដែលធ្លាប់មានកម្រិតលេងនៅក្រោមកម្ពុជា ដូចជាឡាវ គឺពេលនេះ បានយកកីឡាករបារាំង មកលេង ធ្វើឱ្យកម្រិតលេងលើវិញ្ញាសាឯកត្តជនរីកចម្រើនដូចគ្នា។
សំនៀង ថ្លែងថា៖ «ខ្ញុំ និងក្រុមយើងហ្វឹកហាត់ត្រៀមខ្លាំង តែរូបខ្ញុំផ្ទាល់ហាក់មានសម្ពាធ និងមានការបារម្ភ ព្រោះនេះជាស៊ីហ្គេម លើកដំបូង នៅកម្ពុជា ដែលត្រូវខំប្រឹងធ្វើឱ្យបានល្អជាងស៊ីហ្គេមមុនៗ ហើយជាមួយគ្នានេះ ខ្ញុំមើលឃើញថា កម្រិតនៃការប្រកួតប្រជែង នៅស៊ីហ្គេម ពេលនេះ មានការកើនឡើងខ្លាំង»។
ប៉ុន្តែកីឡាករវ័យក្មេងរូបនេះ ដែលធ្លាប់មានបទពិសោធប្រកួតច្រើន នៅក្រៅប្រទេស ក៏បានថ្លែងដោយបង្ហាញនូវក្ដីសង្ឃឹមខ្ពស់ទៅលើការប្រកួតវាយជាក្រុម ជាពិសេសវាយគូបុរស ដែលគេជឿថា ឱកាសនៃការឈានទៅរកមេដាយមាស អាចនឹងកើតមាន បើសិនជារូបគេ បានចាប់ដៃគូជាមួយកីឡាករឆ្នើម ប៊ុន កេន្នី ដែលកំពុងហ្វឹកហាត់ នៅក្នុងជម្រើសជាតិ ជាមួយគ្នា។
ឡុង សំនៀង បានបញ្ជាក់ថា៖ «ប៊ុន កេន្នី មានបទពិសោធខ្លាំងមែនទែន ហើយខ្ញុំនៅតែជឿជាក់លើគាត់ថា អាចនឹងឈានទៅរកការឈ្នះបានមេដាយមាស។ ទន្ទឹងនឹងនេះបើសិនជាខ្ញុំ បានឈរវាយគូជាមួយគាត់ ក៏ខ្ញុំគិតថា អាចឈានទៅឈ្នះបានមេដាយមាសផងដែរ គឺខ្ញុំត្រូវមានគោលដៅខ្ពស់បែបនេះ ព្រោះខ្ញុំវាយគូល្អ ជាងការប្រកួតឯកត្តជន ហើយខ្ញុំជឿជាក់ថា ការចាប់គូជាមួយ ប៊ុន កេន្នី យើងនឹងធ្វើបានល្អ ចំណែកការប្រកួតជាក្រុម ក៏យើងសង្ឃឹមថា នឹងអាចបានមេដាយផងដែរ»។
ចំណែកកីឡាការិនី វ៉ាង ច័ន្ទណាលីន បានថ្លែង ដោយបង្ហាញភាពអន្ទះសារ ចង់មានស្នាដៃ សម្រាប់ការប្រកួតជាលើកដំបូង ក្នុងស៊ីហ្គេម ឆ្នាំ ២០២៣ នៅកម្ពុជា នេះផងដែរ។
កីឡាការិនីរូបនេះថ្លែងថា៖ «ខ្ញុំនៅមិនទាន់ប្រាកដថា ខ្ញុំនឹងត្រូវបានដាក់ឱ្យចូលរួមការប្រកួត នៅស៊ីហ្គេម ឆ្នាំ២០២៣នេះ ឬយ៉ាងណានោះទេ ព្រោះបច្ចុប្បន្ន ខ្ញុំទើបមានអាយុ ១៦ ឆ្នាំ និងស្ថិតនៅក្រុមថ្នាលជម្រើសជាតិ ប៉ុន្តែខ្ញុំបានត្រៀមខ្លួនខ្លាំង ដើម្បីចាប់យកឱកាសនេះ»។
ច័ន្ទណាលីន ដែលបានចូលក្រុមថ្នាលជម្រើសជាតិ នៅឆ្នាំ ២០២០ នោះ បានថ្លែងថា៖ «ចំពោះការប្រកួតជាលក្ខណបុគ្គល ខ្ញុំមិនមានសង្ឃឹមច្រើនទេ គឺត្រឹម ៥០ ភារយ ៥០ ភារយ ព្រោះខ្ញុំមិនទាន់មានបទពិសោធប្រកួត នៅក្រៅប្រទេស និងក្នុងស៊ីហ្គេមនេះទេ ប៉ុន្តែសម្រាប់ការប្រកួតជាក្រុម ខ្ញុំសង្ឃឹមថា នឹងអាចឈានទៅដល់ការដណ្តើមបានមេដាយ ព្រោះពួកយើង បានត្រៀមខ្លួនខ្លាំង សម្រាប់ការប្រកួតស៊ីហ្គេមនេះ ហើយកីឡាការិនីជម្រើសជាតិផ្សេងទៀត គាត់មានបច្ចេកទេសល្អ និងមានបទពិសោធច្រើន ក្នុងការប្រកួតជាលក្ខណអន្តរជាតិ អ៊ីចឹងគិតថា យើងនឹងអាចធ្វើបាន»។
ទោះយ៉ាងណាក៏ដោយ សហព័ន្ធកីឡាវាយកូនបាល់កម្ពុជា បាននឹងកំពុងផ្តោតការយកចិត្តទុកដាក់កាន់តែខ្លាំង សម្រាប់ការឆ្ពោះទៅរកការឈ្នះមេដាយមាស ជាកំណត់ត្រាប្រវត្តិសាស្ត្រលើកដំបូង នៅពេលកម្ពុជា ធ្វើជាម្ចាស់ផ្ទះស៊ីហ្គេម ឆ្នាំ ២០២៣ ហើយសហព័ន្ធនេះ ក៏មានមហិច្ឆតាដណ្តើមឱ្យបានមេដាយមាស លើសការដាក់សម្ទុះរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) ផងដែរ។
ដោយត្រូវបានបង្កើតឡើងវិញ នៅឆ្នាំ ១៩៨១ សហព័ន្ធកីឡាវាយកូនបាល់កម្ពុជា នៅមិនទាន់រកឃើញជ័យជម្នះដ៏ធំ គឺការឈ្នះបានមេដាយមាស នៅស៊ីហ្គេម ដើម្បីឆ្លើយតបទៅនឹងការខិតខំប្រឹងប្រែងអស់រយៈពេលជាង ៤០ ឆ្នាំរបស់ខ្លួននៅឡើយទេ ដោយពួកគេ ដណ្តើមបានត្រឹមមេដាយសំរឹទ្ធចំនួន៥ ពីការប្រកួតស៊ីហ្គេម នៅឆ្នាំ ២០០៧ ឆ្នាំ ២០០៩ ឆ្នាំ ២០១១ ឆ្នាំ ២០១៥ និងឆ្នាំ ២០១៧។
យ៉ាងណាមិញ សម្រាប់ការប្រកួតស៊ីហ្គេម លើកទី៣២ ឆ្នាំ ២០២៣ នៅលើទឹកដីខ្លួន នេះ សហព័ន្ធកីឡាវាយកូនបាល់កម្ពុជា ត្រូវបានគណៈកម្មាធិការជាតិ CAMSOC ដាក់សម្ទុះដណ្តើមមេដាយមាសយ៉ាងតិចឱ្យបាន ១ រួមជាមួយមេដាយប្រាក់ និងសំរឹទ្ធ មួយចំនួនទៀត ប៉ុន្តែជាទិសដៅ និងមហិច្ឆតា គឺក្រុមជម្រើសជាតិវាយកូនបាល់កម្ពុជា ចង់ដណ្តើមមេដាយមាសឱ្យបានលើសពីការដាក់សម្ទុះនេះទៅទៀត។
លោក ជា ពៅ ដែលបានព្យួរតួនាទីជាអគ្គលេខាធិការរងនៃសហព័ន្ធកីឡាវាយកូនបាល់កម្ពុជា ដើម្បីមកកាន់តួនាទីជាគ្រូបង្វឹកក្រុមជម្រើសជាតិ បានប្រាប់ ភ្នំពេញ ប៉ុស្តិ៍ថា៖ «ពិតណាស់ CAMSOC បានដាក់សម្ទុះមេដាយមាសចំនួន ១ ប៉ុន្តែជាមហិច្ឆតារបស់សហព័ន្ធ គឺបើបានមេដាយមាស ១ ហើយ គឺយើងអាចឈានទៅរកមេដាយមាសទី២ ឬលើសពីនេះ បើសិនជាអាចធ្វើទៅបាន»។
ជាមួយការឈានទៅរកការឈ្នះបានមេដាយមាស ជាប្រវត្តិសាស្ត្រ លើកដំបូង នៅស៊ីហ្គេម ឆ្នាំ ២០២៣ នេះ សហព័ន្ធកីឡាវាយកូនបាល់កម្ពុជា បានផ្លាស់ប្តូរយុទ្ធសាស្ត្រ ក្នុងការពង្រឹងសមត្ថភាពរបស់ក្រុមជម្រើសជាតិ ពីការហ្វឹកហាត់ច្រើន និងប្រកួតតិច មកជាប្រកួតឱ្យបានច្រើន ជាងការការហ្វឹកហាត់នៅលើទីលានវិញ។
លោក ជា ពៅ បានបន្តថា៖ «ពីមុនយើងយកការហ្វឹកហាត់ជាធំ ដល់អ៊ីចឹងទៅធ្វើឱ្យកីឡាករ កីឡាការិនីរបស់យើង មានជំងឺស្ត្រេស ព្រោះហាត់ច្រើនពេក តែអត់សូវបានចេញទៅប្រកួត ប៉ុន្តែបន្ទាប់ពីស្ថានភាពកូវីដ ១៩ មានភាពប្រសើរវិញនេះ គឺយើងបានប្តូរយុទ្ធសាស្ត្រ ដោយរក្សាការហ្វឹកហាត់ត្រឹម ៥០ ភាគរយ នឹងចេញទៅប្រកួតឱ្យបានច្រើន ហេតុនេះបន្ទាប់ពីស៊ីហ្គេម នៅវៀតណាម យើងបានចេញទៅប្រកួតនៅក្រៅប្រទេស ជាពិសេសការប្រកួតដណ្តើមយកពិន្ទុពិភពលោក ក្នុងព្រឹត្តិការណ៍ ITF Men’s Future ដោយយើងប្រកួតបាន ៣ ដង និងបាន ២ ពិន្ទុ»។
សម្រាប់ការប្រកួតដណ្តើមយកពិន្ទុពិភពលោកក្នុងព្រឹត្តិការណ៍ ITF Men’s Future នេះ ក្រុមកីឡាវាយកូនបាល់កម្ពុជា ដណ្តើមបាន ១ ពិន្ទុ សម្រាប់ការប្រកួត នៅប្រទេសវៀតណាម កាលពីចុងខែឧសភា និងដើមខែមិថុនា ឆ្នាំ ២០២២ ហើយការចូលរួមប្រកួតលើកទី២ នៅប្រទេសថៃ ក្នុងខែកក្កដា មិនទទួលបានពិន្ទុទេ តែការប្រកួតលើកទី៣ នៅម៉ាឡេស៊ី នាចុងខែកក្កដានោះដែរ កម្ពុជា ដណ្តើមបាន ១ ពិន្ទុ។
ជាមួយគ្នានេះ លោក ជា ពៅ បានអះអាងថា ការប្តូរយុទ្ធសាស្ត្រ ពីការហ្វឹកហាត់ច្រើន ទៅជាការប្រកួតច្រើនវិញនេះ បានធ្វើឱ្យកីឡាករ កីឡាការិនី ជម្រើសជាតិវាយកូនបាល់ មានការរីកចម្រើន ដែលអាចជាក្តីសង្ឃឹម ក្នុងការឈានទៅដណ្តើមយកមេដាយមាស។
លោក ជា ពៅ បានបញ្ជាក់ថា៖ «ក្នុង ១ ឆ្នាំនេះ យើងនឹងបញ្ជូនក្រុមអត្តពលិកទៅប្រកួតនៅក្រៅប្រទេសឱ្យអស់ពីលទ្ធភាព ដែលសហព័ន្ធមាន ព្រោះការដាក់ចេញនៅយុទ្ធសាស្ត្រ ត្រូវចេញទៅប្រកួតឱ្យបានច្រើននេះ យើងមើលឃើញថា កម្រិតសមត្ថភាព និងបច្ចេកទេសរបស់កីឡាករ កីឡាការិនីយើង មានការកើនឡើង និងខុសប្លែកពីមុនច្រើន ដោយសារការចេញទៅប្រកួតនៅប្រទេសគេ ធ្វើឱ្យក្រុមអត្តពលិកយើង មានអារម្មណ៍ស្រស់ស្រាយ និងបានមើលឃើញបច្ចេកទេសរបស់គេប្លែក ហេតុនេះគាត់ក៏ខំប្រឹង អភិវឌ្ឍសមត្ថភាពបានល្អ ទៅតាមហ្នឹងដែរ»។
សម្រាប់ការប្រកួត នៅស៊ីហ្គេម ឆ្នាំ ២០២៣ នៅកម្ពុជានេះ ប្រភេទកីឡាវាយកូនបាល់ មាន៧វិញ្ញាសា គឺវាយគូបុរស វាយគូនារី វាយគូចម្រុះ (ប្រុស ១ ស្រី ១) ប្រកួតឯកត្តជនបុរស ឯកត្តជននារី ព្រមទាំងប្រកួតជាក្រុមបុរស និងក្រុមនារី ហើយចំពោះវិញ្ញាសាទាំងនេះ កម្ពុជាមានរំពឹងដណ្តើមបានមេដាយមាស នៅលើវិញ្ញាសាវាយគូ តែមិនរំពឹងនោះទេ សម្រាប់ការប្រកួតឯកត្តជន។
លោក ជា ពៅ បាននិយាយថា៖ «យើងសង្ឃឹមទៅលើការប្រកួតវិញ្ញាសាវាយគូ ចំណែកការប្រកួតឯកត្តជន យើងមើលឃើញថា កម្រិតបច្ចេកទេសរបស់គេខ្ពស់ជាងយើង ព្រោះប្រទេសមួយចំនួនជាវៀតណាម និងហ្វីលីពីន ជាដើម គេយកសុទ្ធតែកីឡាករក្រៅប្រទេស មកលេង ហើយចំណាត់ថ្នាក់ពិភពលោករបស់ពួកគេ តិចបំផុត ២០០ ចំណែកចំណាត់ថ្នាក់របស់អត្តពលិកយើង ចាប់ពី ១ ២០០ ជាងទៅ ហើយពួកនេះ ផ្តោតខ្លាំងទៅលើការប្រកួតលក្ខណៈបុគ្គលិក ដូច្នេះការផ្តោតទៅលើការប្រកួតវាយគូបុរស និងគូនារី យើងអាចមានសង្ឃឹម ឈ្នះបានមេដាយ»។
គ្រូបង្វឹកជម្រើសជាតិវាយកូនបាល់កម្ពុជា រូបនេះបានបន្ថែមថា៖ «ចំណែកការប្រកួតជាក្រុម គឺបើឆ្នាំ ២០២២ នេះ យើងដណ្តើមបានពិន្ទបន្ថែមទៀត ដើម្បីឈរនៅចំណាត់ថ្នាក់ខ្ពស់នោះ គឺយើងអាចនឹងមានឱកាសជួបក្រុមមានចំណាត់ថ្នាក់ទាប ក្នុងការប្រកួតជម្រុះ អ៊ីចឹងឱកាសដណ្តើមមេដាយ ក៏អាចមានផងដែរ»។
ជាមួយការមើលឃើញពីឱកាស នៃការដណ្តើមនបានមេដាយមាសនេះ លោក ជា ពៅ បានអះអាងថា ការដាក់សម្ទុះមេដាយមាស ១ របស់ CAMSOC នេះ វាគ្រាន់តែជាកម្រិតមធ្យម ព្រោះថ្នាក់ដឹកនាំសហព័ន្ធ ដែលមានលោកឧកញ៉ា សៀ ឬទ្ធី ជាប្រធានសហព័ន្ធ និងលោក ទេព រិទ្ធិវិទ្ធ ជាអគ្គលេខាធិការ គឺបានប្រឹងប្រែងខ្លាំង និងមានមហិច្ឆតាខ្លាំងជាងគ្រូបង្វឹក និងក្រុមអត្តពលិកទៅទៀត សម្រាប់ចង់ឈ្នះបានមេដាយមាសនេះ ហើយចង់បានលើសពី ១ ទៀតផង។
លោកបានសង្កត់ធ្ងន់ថា៖ «ថ្នាក់ដឹកនាំរបស់យើង មានមហិច្ឆតាធំជាងគ្រូបង្វឹក និងក្រុមអត្តពលិកទៅទៀត សម្រាប់ការឆ្ពោះទៅដណ្តើមមេដាយមាស នៅស៊ីហ្គេម ឆ្នាំ ២០២៣ នេះ ដូច្នេះសហព័ន្ធរបស់យើង បានត្រៀមលក្ខណបញ្ជូនក្រុមអត្តពលិកទៅហ្វឹកហាត់ និងប្រកួត ជាលក្ខណៈបោះជំរំរយៈពេលខ្លីៗ អាច ១០ ថ្ងៃ ឬ ២ សប្តាហ៍ នៅតាមប្រទេសផ្សេងៗ ដោយក្នុងខែតុលា ឆ្នាំនេះ យើងមានព្រឹត្តិការណ៍ច្រើន អ៊ីចឹងយើងនឹងផ្តល់ឱកាសឱ្យកីឡាករ កីឡាការិនីយើង បានចេញទៅហាត់ និងប្រកួត ដើម្បីពង្រឹងសមត្ថភាព និងបច្ចេកទេសឱ្យបានល្អ មុនស៊ីហ្គេម ឈានចូលមកដល់»។
ទន្ទឹងនឹងនេះ សហព័ន្ធកីឡាវាយកូនបាល់កម្ពុជា ក៏បានកំពុងពង្រឹងទៅលើធនធានគ្រូបង្វឹកថ្នាក់ជាតិ ឱ្យក្លាយទៅជាគ្រូបង្វឹកកម្រិតអន្តរជាតិ ផងដែរ ហើយនេះជាមូលហេតុ ដែលសហព័ន្ធនេះ បានបើកវគ្គបណ្ដុះបណ្ដាលគ្រូបង្វឹកកីឡាវាយកូនបាល់ ITF/OS ថ្នាក់តំបន់កម្រិតដំបូង និងមធ្យម ដែលទើបបានបញ្ចប់ កាលពីថ្ងៃទី ១២ ខែសីហា កន្លងមកនេះ។ វគ្គបណ្តុះបណ្តាលនេះ មានសិក្ខាកាមជាគ្រូបង្វឹកមកពី ៥ ប្រទេសចូលរួម គឺមីយ៉ាន់ម៉ា ទីម័រ បង់ក្លាដែស ហ្វ៊ីជី និងម្ចាស់ផ្ទះកម្ពុជា ក្រោមការបង្ហាត់បង្ហាញពីគ្រូឧទ្ទេសចំនួន៣នាក់ មានលោក Jonathan Stubbs លោក Gary Pucell និងលោក Amir Borghei មកពីសហព័ន្ធកីឡាវាយកូនបាល់អន្តរជាតិ (ITF)។
ក្នុងនាមជាអ្នកសម្របសម្រួលក្នុងវគ្គបណ្តុះបណ្តាលនេះ លោក ជា ពៅ បានឱ្យដឹងថា៖ «នេះជាលើកដំបូង ដែលសហព័ន្ធកីឡាវាយកូនបាល់កម្ពុជា បានទទួលស្វាគមន៍ជនបរទេស ឱ្យចូលរួមក្នុងវគ្គបណ្តុះបណ្តាលថ្នាក់តំបន់នេះ ហើយវគ្គនេះ ពិតជាមានសារសំខាន់ណាស់ មិនត្រឹមតែត្រៀមស៊ីហ្គេម ឆ្នាំ ២០២៣ ប៉ុណ្ណោះទេ ប៉ុន្តែយើងបានបណ្តុះបណ្តាលគ្រូបង្វឹករបស់យើងទាំងកម្រិតជាតិ អន្តរជាតិ និងឈានទៅកម្រិតកំពូល ដែលអាចនឹងចេញទៅបំពេញការងារនៅក្រៅប្រទេសបាន»។
ចំណែកលោក វ៉ាត់ ចំរើន អគ្គលេខាធិការ CAMSOC បានថ្លែង នៅចំពោះសិក្ខាកាមមកពី ៥ ប្រទេស និងគ្រូឧទ្ទេស ក្នុងពិធីបិទវគ្គនោះថា៖ «កីឡានៅកម្ពុជា ទើបតែងើបឡើងនៅពេលនេះ និងងើបឡើងចំពេលវេលា ដែលយើងខ្ញុំទទួលសិទ្ធិរៀបចំធ្វើម្ចាស់ផ្ទះស៊ីហ្គេម។ កីឡាកម្ពុជា មិនទាន់អាចប្រកួតប្រជែងកម្រិតខ្លាំងជាមួយប្រទេសផ្សេងៗទេ។ ដូច្នេះវគ្គបណ្តុះបណ្តាលនេះ ពិតជាមានសារសំខាន់ខ្លាំងណាស់ ហើយយើងខ្ញុំសង្ឃឹមថា កីឡាវាយកូនបាល់កម្ពុជា នឹងឈានឆ្ពោះទៅមុខ មានសក្តានុពលសម្រាប់ការប្រកួត ជាពិសេសសម្រាប់ស៊ីហ្គេម ដែលកម្ពុជាធ្វើម្ចាស់ផ្ទះឆ្នាំក្រោយ»៕
