ភ្នំពេញ៖ ក្រុមជម្រើសជាតិ​កាយសម្ព័ន្ធ​កម្ពុជា បាន​នឹង​កំពុង​បង្ហាញ​ឱ្យ​ឃើញ​ពី​ភាពរីកចម្រើន​ខ្លាំង ទៅ​​លើបច្ចេក​ទេស បន្ទាប់ពីពួកគេ ដណ្តើម​បានមេដាយ​ប្រាក់​ ២ និងសំរឹទ្ធ ​១ ជូនប្រទេសជាតិ ពី​​ការ​​ប្រកួតកីឡាកាយសម្ព័ន្ធអេរ៉ូប៊ិក​ជើងឯកអាស៊ី លើក​​ទី​៧ ឆ្នាំ ២០២២​ (7th Aerobic Gymnastic ASIAN Championships 2022) ដែល​កំពុង​ធ្វើ​​នៅ​ប្រទេស​ថៃ​នោះ ហើយ​កម្ពុជា ក៏​ត្រូវប្រកួត​ផ្តាច់​ព្រ័ត្រ ចំនួន ​៤ វិញ្ញាសា​ទៀត នៅ​រសៀល និង​ល្ងាច​ថ្ងៃ​ចន្ទ​នេះ ផងដែរ។


សម្រាប់មេដាយប្រាក់ចំនួន ​២ និងមេដាយសំរឹទ្ធ ​១ ​នេះ គឺ​ក្រុមជម្រើសជាតិ​កាយសម្ព័ន្ធ​កម្ពុជា​ ដណ្តើម​បាន នៅក្នុងការប្រកួតប្រភេទ​អាយុ​​ក្រោម ​១៥ ​ឆ្នាំ និង​ប្រភេទ​អាយុ​ក្រោម ​១៨​ ឆ្នាំ ចំណែក​ការ​ប្រកួត​ប្រភេទ​អាយុ​លើស ១​៨ ​ឆ្នាំ នឹង​ត្រូវ​ប្រកួត​ផ្តាច់ព្រ័ត្រ ​ទាំង​លើ​វិញ្ញាសា​វាយគូ, ទ្រីយ៉ូ និង​វិញ្ញាសា​ជា​ក្រុម នៅ​ថ្ងៃ​ចន្ទ​នេះ រីឯ​ក្រុម​អាយុ​ក្រោម​ ១៨ ​ឆ្នាំ ក៏​នៅសល់ការ​ប្រកួត​​ផ្តាច់​​ព្រ័ត្រ ១​ វិញ្ញាសា​​ទៀត ផងដែរ។


គិត​ត្រឹមព្រឹក​ថ្ងៃ​ចន្ទនេះ ​ក្រុមកីឡាកាយសម្ព័ន្ធ​កម្ពុជា ក្នុងប្រភេទ​អាយុ​ក្រោម​ ១៥ ​ឆ្នាំ បាន​បញ្ចប់​​ការ​​ប្រកួត ដោយការ​ដណ្តើមបានមេដាយ ទាំង ​២ ​វិញ្ញាសាតែម្តង ដោយ​ក្នុង​នោះ​កីឡាករ ស៊្រាន វួចទ្រី និង​កីឡា​ការិនី ឈួន ស្រីនាត បាន​ឈ្នះមេដាយប្រាក់ លើ​វិញ្ញាសា​គូ ហើយ ស៊្រាន វួចទ្រី និង ឈួន ស្រីនាត ដដែល បានសហការ​គ្នាជាមួយ​កីឡាការិនី ច្រឹង ចាន់ត្រា ដើម្បី​ឈ្នះ​បាន​មេដាយសំរឹទ្ធ លើ​វិញ្ញាសាទ្រីយ៉ូ ​១ ​ទៀត។


ចំណែក​មេដាយប្រាក់ ១ ទៀត គឺ​ដណ្តើម​បានដោយ​ក្រុម​អាយុ​ក្រោម ​១៨ ​ឆ្នាំ កាលពី​ថ្ងៃ​អាទិត្យ លើ​វិញ្ញាសា​ក្រុម​ របស់កីឡាការិនី ឌឹម អ៊នធីតា, ណេម សុខហេង, ស៊ីវ ចន្ថា, សួស ស្រីពៅ និង​កីឡាការិនី ឈួន សុវណ្ណបញ្ញា ហើយ​នៅរសៀលថ្ងៃ​ចន្ទ​នេះ កីឡាការិនី​ ណេម សុខហេង នឹង​ត្រូវ​ប្រកួត​ផ្តាច់ព្រ័ត្រ លើ​វិញ្ញាសាឯកត្តជន​ផងដែរ ដែល​កម្ពុជាសង្ឃឹម​ថា នឹង​ដណ្តើម​​បានមេដាយ​បន្ថែម​ទៀត។



លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធ​កម្ពុជា បាន​​ប្រាប់ ​ភ្នំពេញ ប៉ុស្តិ៍ ពី​ប្រទេសថៃ​មក​ថា៖ ​«នៅរសៀល​ថ្ងៃ​ចន្ទ​នេះ កីឡាការិនី​ ណេម សុខហេង នឹង​ត្រូវ​ប្រកួត​ផ្តាច់ព្រ័ត្រ លើ​វិញ្ញាសា​ឯក​ត្តជន ផ្នែកអាយុ​ក្រោម​ ១៨ ឆ្នាំ ចំណែក​ក្រុម​អាយុ​លើស​ ១៨ ​ឆ្នាំ​​របស់​យើង ក៏ត្រូវ​ប្រកួត នៅថ្ងៃ​នេះដូចគ្នា ដោយពួកគេ បាន​​ឡើង​ទៅកាន់​ការ​ប្រកួត​ផ្តាច់​ព្រ័ត្រ ទាំង​​ ៣ ​វិញ្ញាសា ហើយនេះជា​មោទនភាពមួយ​ទៀត ដែល​យើងបានមើល​ឃើញពី​ភាព​រីក​ចម្រើន​​របស់​អត្តពលិក​យើង»។

ប្រតិភូដឹកនាំ​ក្រុមកីឡាកាយសម្ព័ន្ធ​កម្ពុជា លោក ណយ ផាណា បាន​បន្ថែម​ថា៖ «សម្រាប់​ក្រុម​អត្តពលិក​អាយុ​ក្រោម​ ១៨ ឆ្នាំ​របស់យើង មានបច្ចេក​ទេស​រីក​ចម្រើន​ខ្លាំង បើ​ប្រៀប​ធៀប​ទៅនឹងការ​ប្រកួត​មុនៗ ហើយ​នេះ​ជា​ការ​កត់សម្គាល់មួយ សម្រាប់​ជា​ក្តី​សង្ឃឹម​ទៅ​​​ថ្ងៃ​អនាគត ដោយ​ខ្ញុំ​សង្ឃឹម​ថា យើង​នឹង​អាច​ឈានទៅដណ្តើម​បានមេដាយមាស ​១ នៅស៊ីហ្គេម ឆ្នាំ​ ២០២៣ តាមការ​ដាក់​សម្ទុះ​មេដាយ​របស់ CAMSOC ជា​មិនខាន»៕