ក្រុមជម្រើសជាតិបាល់ទះកម្ពុជា បាននាំគ្នាស្រែកអបអរ ទាំងទឹកភ្នែក បន្ទាប់ពីពួកគេ បានយកឈ្នះក្រុមជម្រើសជាតិថៃ នៅវគ្គផ្តាច់ព្រ័ត្រ។ រូបថត ហុង មិនា
ភ្នំពេញ៖ ក្រុមជម្រើសជាតិបាល់ទះក្នុងសាលរបស់កម្ពុជា បានបង្កើតរឿងដ៏អស្ចារ្យ និងរំភើបបំផុត ដែលគ្រប់គ្នាមិននឹកស្មានដល់ ដោយពួកគេ អាចវាយបកយកឈ្នះលើក្រុមជម្រើសជាតិថៃ ក្នុងលទ្ធផល ៣-២ ដើម្បីឡើងទៅដណ្តើមយកមេដាយមាស ជាមួយគូសត្រូវចាស់ ឥណ្ឌូនេស៊ី សម្រាប់ការប្រកួតផ្តាច់ព្រ័ត្រ ដែលនឹងត្រូវធ្វើនៅវិមានពហុកីឡដ្ឋានជាតិអូឡាំពិក នាយប់ម៉ោង ៧:៣០ ថ្ងៃចន្ទនេះ។
តាមរយៈការប្រកួតវគ្គពាក់កណ្តាលផ្តាច់ព្រ័ត្រ កាលពីយប់ថ្ងៃអាទិត្យ ម្សិលមិញនេះ ក្រុមម្ចាស់ផ្ទះកម្ពុជា បានធ្លាក់ទៅដល់មាត់ជ្រោះនៃការបរាជ័យទៅហើយ ខណៈពួកគេ បានចាញ់ក្រុមជម្រើសជាតិថៃ ២សិតជាប់ៗគ្នា ជាមួយគ្រាប់បាល់ ២៥-១៨ និង ២៥-២១ នោះ ព្រោះថៃ ត្រូវការឈ្នះតែ១សិតទៀតប៉ុណ្ណោះ នឹងទទួលបានជ័យជម្នះ ដើម្បីឡើងទៅកាន់វគ្គផ្តាច់ព្រ័ត្រ។
ជាមួយការនាំមុខ ២-០ នេះ ក្រុមជម្រើសជាតិថៃ អាចគ្រប់គ្រងការប្រកួតបានល្អជាងក្រុមម្ចាស់ផ្ទះកម្ពុជា ដែលអ្នកគាំទ្រកម្ពុជា គិតថា ពួកគេ នឹងអាចយកឈ្នះ១សិតទៀត ដើម្បីទទួលបានជ័យជម្នះ ដោយគ្មានអ្វីត្រូវសង្ស័យឡើយ។ ប៉ុន្តែអ្វីៗ បានប្រែប្រួលខ្លាំង ខុសពីការគិតនេះដាច់តែម្តង បន្ទាប់ពីក្រុមកម្ពុជា អាចកែប្រែស្ថានប្រកួតវិញបានយ៉ាងល្អ និងបានយកឈ្នះក្រុមថៃ នៅសិតទី ៣ ជាមួយគ្រាប់បាល់ ២៥-២១ នោះ។
ការប្រកួតរវាងក្រុមបាល់ទាត់កម្ពុជា (ស) និងក្រុមជម្រើសជាតិថៃ នៅវិមានពហុកីឡដ្ឋានជាតិអូឡាំពិក កាលពីថ្ងៃអាទិត្យ។ រូបថត ហុង មិនា
តាមរយៈការដណ្តើមបានជ័យជម្នះ ១សិតមកវិញនេះ ក្រុមបាល់ទះកម្ពុជា កាន់តែមានទំនុកចិត្តប្រកួតខ្លាំង ហើយអ្នកគាំទ្រផ្ទាល់រាប់ពាន់នាក់ ក៏បាននាំគ្នាស្រែកលើកទឹកចិត្ត យ៉ាងកងរំពង ពេញកីឡដ្ឋាន ហើយរឿងដែលនាំស្មានមិនដល់ ក៏បានកើតមានឡើងជាបន្តទៀត ដោយកម្ពុជា បានបន្តយកឈ្នះក្រុមថៃ ២៥-១៦ នៅសិតទី៤។
សម្រាប់ការប្រកួតនៅសិតទី ៥ ដែលកំណត់ការឈ្នះចាញ់ត្រឹម ១៥ គ្រាប់នោះ ក្រុមម្ចាស់ផ្ទះកម្ពុជា អាចរកបានគ្រាប់បាល់នាំមុខ ជាបន្តបន្ទាប់ រហូតយកឈ្នះ ១៥-១០។ ជាមួយជ័យជម្នះនេះ គេមើលឃើញថា ក្រុមកម្ពុជា បានបង្ហាញការលេង និងគ្រប់ស្ថានភាពប្រកួតបានល្អ សម្រាប់៣សិតចុងក្រោយ។
ផ្ទុយពីនេះក្រុមថៃ បែរជាបង្ហាញទម្រង់លេងធ្លាក់ចុះ ទាំងការលោតគប់ ការលោតបាំង និងការទទួលបាល់ពីកម្ពុជា ហើយនេះការឈឺចាប់លើកទី២ របស់ក្រុមបាល់ទះជម្រើសជាតិថៃ ក្រោមដៃកម្ពុជា ព្រោះកាលប្រកួតដណ្តើមយកមេដាយសំរឹទ្ធ នៅស៊ីហ្គេម ប្រទេសវៀតណាម កាលពីខែឧសភា ឆ្នាំ២០២២ ក៏ក្រុមថៃ បានចាញ់ កម្ពុជា ដោយលទ្ធផល ៣-២ ដូចគ្នានេះផងដែរ។
ជាមួយលទ្ធផលនេះ ក្រុមជម្រើសជាតិថៃ ត្រូវធ្លាក់ទៅប្រកួតដណ្តើមយកមេដាយសំរឹទ្ធ ជាមួយក្រុមវៀតណាម ដែលត្រូវធ្វើនៅម៉ោង ៥ ថ្ងៃចន្ទនេះ ខណៈការប្រកួតជម្រុះក្នុងពូលB កន្លងមក ថៃ បានយកឈ្នះ វៀតណាម ដោយលទ្ធផល ៣-១ ម្តងហើយ ហើយការប្រកួតវគ្គពាក់កណ្តាលផ្តាច់ព្រ័ត្រ កាលពីម្សិលមិញនេះ ក្រុមវៀតណាម បានចាញ់ ឥណ្ឌូនេស៊ី ៣-០ ដាច់តែម្តង។
យ៉ាងណាមិញ ក្រុមកម្ពុជា នឹងត្រូវឡើងទៅប្រកួតដណ្តើមយកមេដាយមាស ជាមួយគូសត្រូវចាស់ ឥណ្ឌូនេស៊ី ដែលត្រូវធ្វើនៅយប់ម៉ោង ៧:៣០ ដើម្បីរកក្រុមត្រូវឈ្នះមេដាយមាស និងមេដាយប្រាក់ ក្នុងព្រឹត្តិការណ៍ស៊ីហ្គេម លើកនេះ ខណៈការជួបគ្នា នៅក្នុងវគ្គជម្រុះក្នុងពូលA កាលពីថ្ងៃទី៦ ខែឧសភា ក្រុមម្ចាស់ផ្ទះ បានចាញ់ ឥណ្ឌូនេស៊ី ដោយលទ្ធផល ៣-០ ដាច់ម្តងហើយ។
តាមរយៈការចាញ់ ៣-០ ជាមួយគ្រាប់បាល់ ២៥-១៨ ២៥-២១ និង ២៥-១៦ នៅវគ្គ១/២ផ្តាច់ព្រ័ត្រនោះ ត្រូវបានគេគិតថា ក្រុមម្ចាស់កម្ពុជា នៅតែមានការលំបាកខ្លាំង ចំពោះការប្រឈមជាមួយក្រុមឥណ្ឌូនេស៊ី ក្នុងវគ្គផ្តាច់ព្រ័ត្រនេះ ព្រោះទម្រង់លេងរបស់ឥណ្ឌូនេស៊ី ពិតជាល្អខ្លាំងណាស់។
យ៉ាងណាក៏ដោយ ការយកឈ្នះក្រុមថៃ ៣-២ កាលពីម្សិលមិញ វាបានក្លាយជាកម្លាំងចិត្តដ៏សំខាន់មួយទៀត សម្រាប់ក្រុមកម្ពុជា ក្នុងការប្រកួតប្រជែងជាមួយក្រុមឥណ្ឌូនេស៊ី នៅវគ្គផ្តាច់ព្រ័ត្រនេះ ព្រោះទាំងថ្នាក់ដឹកនាំសហព័ន្ធកីឡាបាល់ទះកម្ពុជា អ្នកគាំទ្រ ជាពិសេសក្រុមបាល់ទះកម្ពុជា ផ្ទាល់តែម្តង បានបង្ហាញក្តីរំភើបឡើងស្រក់ទឹកភ្នែក ឯអ្នកខ្លះ បានយំតែម្តង ដោយសារមានអារម្មណ៍រំភើបខ្លាំងពេក ហើយកម្លាំងចិត្តដ៏ធំនេះ ក៏នឹងអាចធ្វើឱ្យអ្វីៗ មានការប្រែប្រួល ក្នុងការប្រកួតដណ្តើមយកមេដាយមាស នៅយប់នេះផងដែរ៕
