កីឡាការិនី ស្រួង ភាវី បានឈ្នះមេដាយមាសស៊ីហ្គេម ជាលើកដំបូង ជូនម្ចាស់ផ្ទះកម្ពុជា កាលពីថ្ងៃទី៨ ខែឧសភា ឆ្នាំ២០២៣។ រូបថត សហការី
ភ្នំពេញ៖ កីឡាការិនីជើងខ្លាំងផ្នែកកីឡាស្នូកឃ័រ និងប៊ីយ៉ា ស្រួង ភាវី បានសម្រេចគោលដៅដ៏ធំសម្រាប់ការប្រកួតតំណាងឱ្យជាតិ ក្នុងព្រឹត្តិការណ៍ស៊ីហ្គេម ជាលើកដំបូង របស់ខ្លួនបានហើយ បន្ទាប់ពីស្រ្តីមានដើមកំណើត នៅខេត្តត្បូងឃ្មុំរូបនេះ បានឈ្នះមេដាយមាស ក្នុងការប្រកួតវិញ្ញាសាប៊ីយ៉ាការ៉ុម៣បាំង (3 Cushion) ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ដែលកំពុងដំណើរការ លើទឹកដីកម្ពុជា។
សម្រាប់ការប្រកួតផ្តាច់ព្រ័ត្រ ដែលធ្វើនៅផ្សារទំនើប AEON2 ជាន់ទី៣ កាលពីព្រលប់ ថ្ងៃទី៨ ខែឧសភា ស្រួង ភាវី បានយកឈ្នះកីឡាការិនីរបស់វៀតណាម Hoang Yen Nhi Nguyen ដោយពិន្ទុ ២៥-២០ ដើម្បីឈ្នះបានមេដាយមាសយ៉ាងរំភើបបំផុត ហើយនេះជាជ័យជម្នះលើកទី៣ជាប់ៗគ្នា ដែល ភាវី ធ្វើបាន បន្ទាប់ពីស្រ្តីរូបនេះ បានយកឈ្នះ កីឡាការិនី វៀតណាម Kien Tuong Phung ដោយពិន្ទុ ២៥-១០ ក្នុងវគ្គពាក់កណ្តាលផ្តាច់ព្រ័ត្រ និងឈ្នះកីឡាការិនីហ្វីលីពីន Chezka Luy Centrno ២៥-៦ នៅវគ្គជម្រុះ៨នាក់ដំបូង។
អ្នកទស្សនាផ្ទាល់ និងប្រជាជនកម្ពុជាស្ទើរមួយប្រទេស ដែលបានមើលការប្រកួតនេះ តាមរយៈការផ្សាយផ្ទាល់ បានបង្ហាញការអបអរសាទរយ៉ាងខ្លាំង និងមានមោទនភាពចំពោះ ស្រួង ភាវី ដែលបាននាំយកកិត្តិយសជូនជាតិ ទៅតាមការប្តេជ្ញាចិត្ត ព្រោះនៅមុនការប្រកួតចាប់ផ្តើម ភាវី បានសន្យាថា នឹងយកបទពិសោធន៍ និងភាពជោគជ័យពីការប្រកួតនៅប្រទេសកូរ៉េ ដើម្បីដណ្តើមមេដាយមាស នៅស៊ីហ្គេមនេះឱ្យបាន។
ជាមួយការឈ្នះបានមេដាយមាស ជាលើកដំបូង ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ដែលកម្ពុជា បានធ្វើជាម្ចាស់ផ្ទះ ជាប្រវត្តិសាស្រ្តនេះ ស្រួង ភាវី បានអះអាងថា នេះជាការសម្រេចក្តីសុបិន ដែលនាងបានទន្ទឹងរង់ចាំអស់រយៈពេល១០ឆ្នាំមកហើយ ហើយស្ត្រីខ្មែរ បានទៅរស់នៅប្រទេសកូរ៉េខាងត្បូងរូបនេះ បានឧទ្ទិសលទ្ធផលដ៏ធំធេងនេះ ជូនចំពោះមហាបុព្វបុរសខ្មែរ និងប្រជាជនខ្មែរគ្រប់រូប ដែលបានផ្តល់កម្លាំងចិត្តយ៉ាងសំខាន់ដល់នាង សម្រាប់ការឈ្នះបានមេដាយមាសនេះ។
«ក្តីសុបិន១០ឆ្នាំ យកមេដាយមាសជូនជាតិ ឥឡូវនេះ ខ្ញុំធ្វើបានហើយ ហើយជាដំបូងកូនស្រីកម្ពុជាម្នាក់នេះ សូមគោរពឧទ្ទិសលទ្ធផលនេះ ជូនចំពោះមហាបុព្វបុរសខ្មែរគ្រប់ជំនាន់ គោរពជូនថ្នាក់ដឹកនាំ និងប្រជាជនខ្មែរគ្រប់រូប ដោយក្ដីមោទនភាពដ៏ខ្ពង់ខ្ពស់ក្រៃលែងរបស់នាងខ្ញុំ»។ នេះជាអ្វី ដែល ស្រួង ភាវី បានបង្ហោះនៅលើផេចហ្វេសប៊ុក ក្រោយនាងឈ្នះបានមេដាយមាសស៊ីហ្គេម ជាលើកដំបូងនេះ។
ស្រ្តី ដែលមានប្តីជាជនជាតិកូរ៉េ ស្រួង ភាវី បានបន្ថែមថា៖ «សារជូនពររបស់ពុកម៉ែបងប្អូន ពិតជាមានតម្លៃមហាសាល និងមិនអាចកាត់ថ្លៃបាន។ ប្រជាជនស្រុះស្រួល សាមគ្គីគ្នា នោះនាវាកម្ពុជាប្រាកដជាលឿនលយឆ្ពោះទៅមុខប្រកបដោយភាពជឿជាក់បំផុត។ កម្លាំងចិត្តពុកម៉ែបងប្អូន ក្ដីស្រឡាញ់របស់ពុកម៉ែបងប្អូន ការលើកទឹកចិត្តពីសំណាក់ពុកម៉ែបងប្អូន គឺពិតជាធ្វើឱ្យសម្រេចបាននូវក្ដីស្រមៃរបស់កម្ពុជា។ សូមពុកម៉ែបងប្អូនទទួលនូវការគោរពស្រឡាញ់អំពីនាងខ្ញុំ»។
បន្ទាប់ពីឈ្នះបានមេដាយមាស លើវិញ្ញាសា 3 Cushion នេះ កីឡាការិនី នឹងត្រូវប្រកួតវិញ្ញាសា 1 Cushion មួយទៀត ដែលវិញ្ញាសាចុងក្រោយនេះ មានអត្តពលិកចូលរួមចំនួន៧នាក់ មកពី៤ប្រទេស ដោយក្នុងនោះ ថៃ វៀតណាម និង ហ្វីលីពីន បានដាក់កីឡាការិនីចំនួន២នាក់ ឱ្យចូលប្រកួតដូចគ្នា ចំណែកកម្ពុជា មានតែ ស្រួង ភាវី ម្នាក់ទេ ហើយសម្រាប់ការប្រកួតជម្រុះបើកឆាកវគ្គ៨នាក់ដំបូង ភាវី ត្រូវជួបថៃ Vutthiphan Kongkaket ដើម្បីយកឈ្នះឡើងទៅវគ្គពាក់កណ្តាលផ្តាច់ព្រ័ត្រ៕
