កីឡាការិនី ស្រួង ភាវី បានឈ្នះមេដាយ ១ និងសំរឹទ្ធ ១ ពីការប្រកួតស៊ីហ្គេម នៅកម្ពុជា ហើយនាងនឹងយកប្រាក់រង្វាន់ ពីការឈ្នះបានមេដាយទាំងនេះ សម្រាប់ជួយដល់ក្មេងៗក្រីក្រ នៅកម្ពុជា។ រូបថត សហការី
ភ្នំពេញ៖ កីឡាការិនីជម្រើសជាតិដ៏មានទេពកោសស្យ ផ្នែកប៊ីយ៉ាការ៉ុម ស្រួង ភាវី បានសម្រេចបរិច្ចាគថវិកាលើកទឹកចិត្ត ដែលទទួលបានពីការឈ្នះបានមេដាយ ក្នុងការប្រកួតស៊ីហ្គេម លើកទី៣២ ឆ្នាំ ២០២៣ នៅកម្ពុជា ចូលទៅក្នុងមូលនិធិសប្បុរសធម៌ទាំងអស់ ដើម្បីជួយដល់ជនក្រីក្រនៅក្នុងប្រទេសកម្ពុជា ជាពិសេសក្មេងៗ ដែលត្រូវការជំនួយជាចាំបាច់ ក្នុងការស្វែងរកការរៀនសូត្រក្រេបយកចំណេះដឹងទៅថ្ងៃអនាគត។
ស្រួង ភាវី ដែលបានបញ្ចប់ការប្រកួតស៊ីហ្គេម លើកទី៣២ ដោយឈ្នះបានមេដាយមាស ១ និងសំរឹទ្ធ ១ ជូនម្ចាស់ផ្ទះកម្ពុជានោះ បានបង្ហោះសារ នៅលើផេចហ្វេសបុកផ្ទាល់ខ្លួន នាព្រឹកថ្ងៃអាទិត្យនេះថា៖ «រាល់ថវិកា ដែលខ្ញុំប្រកួតបានជ័យជម្នះ ទាំងប៉ុន្មាន ក្នុងការប្រកួតឈ្នះ ឬចាញ់ ទោះតិចក្ដី ច្រើនក្ដី គឺខ្ញុំប្រមូលដាក់ទៅក្នុងមូលនិធិសប្បុរសធម៌ទាំងអស់។
«តាមពិតទៅ ខ្ញុំមិនមែនជាអ្នកមានទ្រព្យធនច្រើនអីទេ តែខ្ញុំធ្វើនេះ គឺព្រោះចង់បង្ហាញឱ្យឃើញថា រាល់សកម្មភាពពីមុន និងឥឡូវ ហើយទៅអនាគត គឺនៅដដែល ក្នុងការជួយដល់ប្អូនៗនៅក្នុងប្រទេសខ្មែរ ដែលត្រូវការជំនួយជាចាំបាច់ ក្នុងការស្វែងរកការរៀនសូត្រ ក្រេបយកចំណេះដឹងទៅអនាគត។ ខ្ញុំផ្ទាល់ទាំងបេះដូង និងអាយុជីវិត គឺខ្ញុំលះបង់ ដើម្បីកម្ពុជា។ អរគុណពុកម៉ែបងប្អូនណាស់»។ ស្រួង ភាវី បានបញ្ជាក់។
សម្រាប់ការបង្ហាញខ្លួន ជាលើកដំបូង ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្រ្តនេះ កីឡាការិនីជើងខ្លាំងលំដាប់លេខ ១ ប្រចាំនៅប្រទេសកូរ៉េខាងត្បូង ស្រួង ភាវី បានឈ្នះមេដាយមាស លើវិញ្ញាសាប៊ីយ៉ាការ៉ុម ៣ បាំង (3 Cushion) បន្ទាប់ពីនាង បានយកឈ្នះកីឡាការិនីរបស់វៀតណាម Hoang Yen Nhi Nguyen ដោយពិន្ទុ ២៥-២០ នៅវគ្គផ្តាច់ព្រ័ត្រ បន្ថែមទៅលើការឈ្នះ កីឡាការិនី វៀតណាម Kien Tuong Phung ដោយពិន្ទុ ២៥-១០ ក្នុងវគ្គ ១/២ ផ្តាច់ព្រ័ត្រ និងឈ្នះកីឡាការិនីហ្វីលីពីន Chezka Luy Centrno ២៥-៦ នៅវគ្គជម្រុះ ៨ នាក់ដំបូងនោះ។
បន្ទាប់ពីការឈ្នះបានមេដាយមាស សម្រាប់ការប្រកួតផ្តាច់ព្រ័ត្រ ធ្វើនៅផ្សារទំនើប AEON 2 ជាន់ទី៣ កាលពីព្រលប់ ថ្ងៃទី ៨ ខែឧសភា កន្លងមកនោះ ស្រួង ភាវី បានបន្តឈ្នះលើកីឡាការិនីថៃ Vutthiphan Kongkaket ដោយពិន្ទុ ៥០-២៦ សម្រាប់ការប្រកួតវគ្គជម្រុះ៨នាក់ដំបូង វិញ្ញាសាការ៉ុម១បាំង (1 Cushion) ប៉ុន្តែ ភាវី បានចាញ់វៀតណាម Kei Tuong Phung ដោយពិន្ទុ ៥០-២១ ក្នុងវគ្គ ១/២ ផ្តាច់ព្រ័ត្រ ដោយបាន
ត្រឹមមេដាយសំរឹទ្ធ ខណៈមេដាយមាសលើវិញ្ញាសានេះ បានទៅកីឡាការិនីវៀតណាម Thi Ngoc Hue Le ក្រោយឈ្នះ Kei Tuong Phung ៥០-១៧ នៅវគ្គផ្តាច់ព្រ័ត្រ។
តាមរយៈការឈ្នះបានមេដាយមាស ១ និងសំរឹទ្ធ ១ ពីការប្រកួតស៊ីហ្គេម លើកទី៣២ ឆ្នាំ២០២៣នេះ ស្រួង ភាវី នឹងទទួលបានប្រាក់រង្វាន់ពីរាជរដ្ឋាភិបាលចំនួន ៥៦ លានរៀល ព្រោះតាមគោលការណ៍ នៃការផ្តល់ប្រាក់រង្វាន់ សម្រាប់ការប្រកួតស៊ីហ្គេមនេះ គឺអត្តពលិកឈ្នះមេដាយមាស នឹងទទួលបាន ៤០ លានរៀង មេដាយប្រាក់ បាន ៣០ លានរៀល និងមេដាយសំរឹទ្ធ ទទួលបាន ១៦ លានរៀល៕
