ខ្សែប្រយុទ្ធរបស់ប្រេស៊ីល បានព្យាយាមអូសបាល់រំលងកីឡាកររបស់ក្រុមវិសាខា សម្រាប់ការប្រកួត កាលពីយប់ថ្ងៃសៅរ៍។ រូបថត ណាហ្គាវើលដ៍
ភ្នំពេញ៖ ក្រុមណាហ្គាវើលដ៍ ពិតជាធ្វើបានយ៉ាងល្អ ក្នុងការការពារជ័យជម្នះរបស់ខ្លួន ដើម្បីទម្លាក់ក្រុមវិសាខា ចេញពីការប្រកួតពានរង្វាន់ខេមបូឌានលីគខាប់ (Cambodian League Cup) ឆ្នាំ២០២៣ ដើម្បីឡើងទៅកាន់វគ្គផ្តាច់ព្រ័ត្រ ជាលើកដំបូងយ៉ាងរំភើបបំផុត។
ជ័យជម្នះរបស់ក្រុមណាហ្គាវើលដ៍ ពិតជាបានបង្កើតឱ្យមានការភ្ញាក់ផ្អើលខ្លាំង ចំពោះអ្នកគាំទ្រ ហើយវាជាលទ្ធផលដែលធ្វើឱ្យក្រុមអ្នកមានទ្រព្យ វិសាខា ខកចិត្តខ្លាំងបំផុត ខណៈពួកគេ មិនអាចគ្រប់គ្រងឱកាសមាស ដើម្បីរកបានគ្រាប់បាល់ ទៅតាមស្ថានភាពប្រកួតជាក់ស្តែង នាជំនួបកាត់សេចក្តីជើងទី ២ វគ្គពាក់កណ្តាលផ្តាច់ព្រ័ត្រ កាលពីថ្ងៃសៅរ៍ កន្លងមកនេះ។
បើទោះបីជា វិសាខា បានចាញ់ក្រុមណាហ្គាវើលដ៍ ១-០ ក្នុងការប្រកួតជើងទី ១ នៅកីឡដ្ឋានខេត្តកំពង់ស្ពឺ ប៉ុន្តែសម្រាប់ការប្រកួតជើងទី ២ នៅកីឡដ្ឋានព្រីសន៍ ដែលជាទឹកដីរបស់ពួកគេ កាលពីយប់ថ្ងៃសៅរ៍នោះ វិសាខា គួរណាស់ អាចដណ្តើមបានជ័យជម្នះមកវិញ ដើម្បីឡើងទៅកាន់វគ្គផ្តាច់ព្រ័ត្រ ខណៈពួកគេ បានបង្កើតឱកាសមាស ជាច្រើនលើកនោះ ប៉ុន្តែពួកគេ ធ្វើមិនបានសម្រេច។
កីឡាករមានកម្ពស់ ស៊ិន សុផាណាត់ គួរណាស់ អាចតែតបាល់បញ្ចូលទីឱ្យ វិសាខា តាំងពីដើមតង់ទី១ ប៉ុន្តែរូបគេ បានតែតបាល់ដាច់នោះ ផុតរបារទី ចំណែក ឡេង ណូរ៉ា ដែលឈរចាំស៊ុតបាល់ដាច់តែឯង ពីការបញ្ជូនយ៉ាងស្អាតរបស់ ស៊ិន កក្កដា នោះ ក៏ទាត់បាល់ដាច់នោះ ហើរឡើងទៅលើ រីឯខ្សែប្រយុទ្ធរបស់ជប៉ុន Takumu ក៏មានឱកាសស៊ុតពេញជើង នៅមុខទីក្រុមណាហ្គាវើលដ៍ ផងដែរ តែការស៊ុតរបស់គេ គ្មានប្រសិទ្ធភាព។
ផ្ទុយពីនេះ ការបញ្ជូនបាល់កាត់ពីចំហៀង កាត់មុខទីយ៉ាងស្អាតរបស់ម្ចាស់អាវលេខ២៣ Cristian បានផ្តល់ឱកាសឱ្យខ្សែប្រយុទ្ធប្រេស៊ីល Marcio ជាមិត្តរួមជាតិរបស់គេ អាចរត់ទៅទាត់បាល់នោះ បញ្ចូលទីយ៉ាងល្អបំផុត នៅនាទីទី២២ ដើម្បីធ្វើការនាំមុខ វិសាខា ជាបណ្តោះអាសន្ន ២-០ សម្រាប់ការប្រកួតទាំង២ជើងនេះ។
ជាមួយលទ្ធផលជាបណ្តោះអាសន្ននេះ ក្រុមវិសាខា បានព្យាយាមវាយសម្រុកទៅលើក្រុមណាហ្គា កាន់តែខ្លាំង ហើយក៏បានបង្កើតឱកាសជាបន្តបន្ទាប់ផងដែរ ប៉ុន្តែពួកគេ បានរង់ចាំរហូតដល់នាទីទី ៩០+៧ ទើបអាចរកបាន១គ្រាប់ ដែលជាការស៊ុតបញ្ចូលទីរបស់ ស៊ិន សុផាណាត់។
តែទោះបីជាយ៉ាងណា គ្រាប់បាល់របស់ ស៊ិន សុផាណាត់ វាបានធ្វើឱ្យក្រុមវិសាខា កាន់តែមានភាពឈឺចាប់ ព្រោះពួកគេ មិនមានពេលវេលាបន្ត ក្នុងការលេងទៀតនោះទេ។ ជាមួយការចាញ់ ណាហ្គា ២-១ នេះ កីឡាកររបស់វិសាខា មួយចំនួន ជាពិសេសកីឡាករជប៉ុន Takumu បានយំ បង្ហាញការសោកស្តាយខ្លាំង ចំពោះការធ្លាក់ចេញពីការប្រកួតពានរង្វាន់ Cambodian League Cup ត្រឹមវគ្គពាក់កណ្តាលផ្តាច់ព្រ័ត្រនេះ។
ផ្ទុយពីនេះ ក្រុមណាហ្គាវើលដ៍ ពិតជាមានការរីករាយខ្លាំង ចំពោះការទម្លាក់ វិសាខា នេះ ។ ក្លិបបាល់ទាត់ណាហ្គាវើលដ៍ បានបង្ហោះសារ ក្រោយទទួលបានជ័យជម្នះបែបនេះថា៖ «យើងធ្វើបានហើយ ពួកយើងនឹងបន្តទៅកាន់វគ្គផ្តាច់ព័ត្រនៃពានរង្វាន់ខេមបូឌានលីគខាប់។ អរគុណដល់ទាំងអស់គ្នា ដែលតែងតែគាំទ្រ! រួមគ្នាដើម្បីកំពង់ស្ពឺ»។
ជាមួយគ្នានេះ ខ្សែប្រយុទ្ធ Marcio ត្រូវបានជ្រើសរើសជាកីឡាករលេងល្អជាងគេប្រចាំការប្រកួតនេះ ហើយជាមួយនេះ កីឡាករចាស់វស្សា គួច សុកុម្ភៈ ជាប្រធានក្រុមណាហ្គាវើលដ៍ បានសរសើរទៅដល់មិត្តរួមគ្នា ដែលបានរួមគ្នា សម្រេចបានលទ្ធផលដ៏ប្រសើរនេះ តាមរយៈការលេងប្រកបដោយអត់ធ្មត់ ផ្តោតអារម្មណ៍ លេងជាក្រុម និងយកចិត្តទុកដាក់សម្រាប់ហ្គេមទាំងមូល តាំងពីដើមរហូតដល់ចប់៕
