ភ្នំពេញៈ លោកនាយក​រដ្ឋមន្ត្រី ហ៊ុន សែន បាន​រំឭក​ជាថ្មី ពី​តម្លៃ​មិនអាច​កាត់ថ្លៃ​បាន​របស់​កម្ពុជា សម្រាប់​ការធ្វើជា​ម្ចាស់ផ្ទះ​ការប្រកួត​ស៊ី​ហ្គេម លើក​ទី​៣២ ដែល​បានបញ្ចប់ កាលពី​ថ្ងៃទី​ ១៧ ខែឧសភា និង​ការប្រកួត​អាស៊ាន​ប៉ា​រ៉ា​ហ្គេម លើក​ទី​១២ ដែល​កម្ពុជា​កំពុង​រៀបចំ​ដំណើរការ​ប្រកួត នៅក្នុង​រាជធានី​ភ្នំពេញ​។​


​បើទោះបីជា​កម្ពុជា បាន​ចំណាយ​គ្រប់បែបយ៉ាង សម្រាប់​ការធ្វើជា​ម្ចាស់ផ្ទះ ជា​លើកដំបូង​សម្រាប់​ព្រឹត្តិការណ៍​ទាំង​ ២​ នេះ ប៉ុន្តែ លោក ហ៊ុន សែន បាន​អះអាងថា ការចំណាយ​របស់​កម្ពុ​ជា បានទទួល​មកវិញ​នូវ​កេរ្តិ៍ឈ្មោះ និង​កិត្តិយស​ល្អ ដែល​អាច​បន្សល់​ទុកឱ្យ​កូនចៅ​ជំនាន់​ក្រោយៗ​រាប់រយឆ្នាំ តាមរយៈ​ការ​ឆ្លាក់​ស្នាដៃ​ទាំងអស់នោះ​នៅ​វិមាន​ឈ្នះ​-​ឈ្នះ គឺ​ដូចគ្នា​ទៅនឹង​ដូនតា​ខ្មែរ បាន​ឆ្លាក់​ស្នាដៃ និង​ប្រវត្តិ​ល្អៗ​ពី​អតីតកាល នៅតាម​សិលា​ចារិក រូបសំណាក​នានា នៅ​អង្គរ និង​ប្រាង្គ​ប្រាសាទ​ផ្សេងៗ​ផងដែរ​។


​លោក​បាន​ថ្លែង​នៅក្នុង​ពិធី​ប្រគល់​សញ្ញាបត្រ​ជូន​និស្សិត​សាកល​​វិទ្យាល័យ​ភូមិន្ទ​នីតិសាស្ត្រ និង​វិទ្យា​សាស្ត្រ​សេដ្ឋកិច្ច កាលពី​ថ្ងៃទី ​៥ ខែមិថុនាថា​៖ «​កេរ្តិ៍ឈ្មោះ ដែល​កម្ពុជា ធ្វើ​ស៊ី​ហ្គេម និង​អាស៊ាន​ប៉ា​រ៉ា​ហ្គេម​ឆ្នាំ​ ២០២៣ ទុក​បន្សល់​ឱ្យ​កូនចៅ​យើង​រាប់រយឆ្នាំ​បន្តទៅទៀត​។ យើង​ប្រទេស​ក្រ ប៉ុន្តែ​បេះដូង​វា​ធំ កុំ​ចាំបាច់​ធ្វើជា​មនុស្ស​មុខលុយ​ខ្លាំងពេក​។ លុយ​ចាយ​អស់ ប៉ុន្តែ​កិត្តិយស​ចាយ​មិន​អស់​ទេ​ហើយ​យើង​នឹង​ឆ្លាក់​នៅ​វិមាន​ឈ្នះ​ឈ្នះ​អំពី​អ្វីដែល វា​បានកើត​នៅក្នុង​ដំណាក់កាល​ស៊ី​ហ្គេម និង​ប៉ា​រ៉ា​ហ្គេម​នេះ​»​។


​ជាមួយគ្នានេះ លោកនាយក​រដ្ឋមន្ត្រី បាន​ប្រាប់​ទៅលើ​គ្រប់ផ្នែក ជាពិសេស​គណៈកម្មាធិកា​រ​​ជាតិ CAMSOC-CAMAPGOC ដែលជា​អ្នកគ្រប់គ្រង និង​រៀបចំ ទាំង​ទៅលើ​ការប្រកួត​ស៊ី​ហ្គេម និង​អាស៊ាន​ប៉ា​រ៉ា​ហ្គេម​ត្រូវ​ចាត់​តាំង​ការប្រកួត​នេះ​ឱ្យ​បានល្អ ដើម្បី​បង្ហាញ​ពី​ស្មារតី​នៃ​សាមគ្គី​ភាព សម្រាប់​ប្រជាជន​នៅ​តំបន់​អាស៊ាន​ទាំងមូល តាមរយៈ​ព្រឹត្តិ​ការណ៍​នេះ ជាពិសេស​អាស៊ាន​​ប៉ា​រ៉ា​ហ្គេម ដែល​កម្ពុជា ត្រូវយក​​ចិត្ត​ទុកដាក់​ឱ្យបាន​កាន់តែខ្លាំង ក្នុងការ​ថែទាំ​ដល់​ប្រតិភូ​កីឡា​ជនពិការ​ទាំងអស់​។​


​លោក​បញ្ជាក់ថា​៖ «​បើទោះបី​​ជា​កម្ពុជា ឈរ​នៅ​ចំណាត់ថ្នាក់​លេខ​ប៉ុន្មាន អាហ្នឹង​វា​ជា​រឿង​ឈ្នះ រឿង​ចាញ់​! រឿង​ធំ​របស់​កម្ពុជា ត្រូវធ្វើ​ម៉េច​ចាត់តាំង​ការប្រកួត​មួយ​ដែល​ធានាបាន​នូវ​សាមគ្គី​​ភាព សម្រាប់​ប្រជាជន​អាស៊ាន​ជាង​ ៦០០​ លាន​នាក់​។ យើង​ត្រូវ​ថែទាំ​កីឡាករ កីឡាការិនី​របស់​ប្រទេស​នានា​ឱ្យបាន​ល្អ​»​។ «​ឥឡូវ​កាន់តែ​យកចិត្តទុកដាក់​ថែមទៀត​ដោយសារតែ​ការពិការ​ភាព​របស់​កីឡាករ កីឡាការិនី​មកពី​បណ្តា​ប្រទេស​នានា ដែល​យើង​ត្រូវ​ថែទាំ​ឱ្យបាន​ហ្មត់ចត់ ហើយ​ខ្ញុំ​អរគុណ​ណាស់​ទៅដល់​គណៈកម្មការ​ប្រកួត​ក៏ដូចជា​គ្រប់​សេវា​ទាំងអស់ រាប់ទាំង​ក្រុម​យុវ​​ជន​ស្ម័គ្រចិត្ត ដែល​បាន​ចូលទៅ​បម្រើ​ផ្នែក​សេវា និង​ធានា​ឱ្យ​កីឡាករ កីឡាការិនី គ្រូបង្វឹក និង​អ្នកគាំទ្រ ដែល​បានមក​ចូលរួម​ក្នុងប្រទេស​របស់​យើង គឺ​យើង​ពិតជា​មានការ​រីករាយ​»​។ លោក ហ៊ុន សែន បាន​បន្ថែម​។​


​ទន្ទឹមនឹងនេះ​លោក ​ហ៊ុន សែន ដែលជា​ប្រធាន​គណៈកម្មាធិការ​ជាតិ​ប៉ា​រ៉ា​ឡាំ​ពិ​ក​កម្ពុជា សម្រាប់​ក្រុម​អត្ត​ព​លិ​កនៅ​ប្រទេស​កម្ពុជា​ផង​នោះ ក៏បាន​លើកឡើង​ពី​ផែនការ​របស់​គណៈកម្មាធិកា​រ​ជាតិ​រៀបចំ​ការប្រកួត​អាស៊ាន​ប៉ា​រ៉ា​ហ្គេម លើក​ទី​ ១២ (CAM-APGOC)​ ដោយបាន​ដាក់​សម្ទុះ​ដណ្តើម​មេដាយមាស​ត្រឹម​ ៨ ក្នុងនាម​ជា​ម្ចាស់ផ្ទះ​។​

​លោក​បាន​ឯកភាព​ទៅលើ​ការ​ដាក់​សម្ទុះ​នេះ ព្រោះ​លោក​បាន​មើលឃើញថា ការប្រកួតប្រជែង​យក​មេដាយ សម្រាប់​ក្រុម​អត្ត​​ព​លិ​ក​ជនពិការ​នេះ មិនអាច​ទៅរួច​ជាមួយ​ប្រទេស​ឥណ្ឌូនេស៊ី និង​ថៃ បាន​នោះទេ ព្រោះ​ម្ចាស់ផ្ទះ​កម្ពុជា ទើប​ដណ្តើមបាន​មេដាយ​មាស​ចំនួន​ ២ ​ទេ ដែល​រកបាន​ដោយ​ក្រុមកីឡា​ការិនី​បាល់បោះ​​រទេះ លើ​វិញ្ញាសា ៣​ ទល់​ ៣​ នាក់ និង​មេដាយមាស​លើ​វិញ្ញាសា​លោត​ចម្ងាយ​របស់​កីឡាការិនី​ពិការ​ជើង​ស្តាំ វ៉ិ​ត ចន្ថា​។​

​លោក​ ហ៊ុន សែន​ បញ្ជាក់ថា​៖ «​ឥឡូវ​យើង​បាន​មេដាយមាស​ ២ ​ហើយ អ៊ីចឹង​សង្ឃឹមថា ៦​ ទៀត យើង​អាចយ​កបាន ហើយ​គ្មាន​អ្នកណា​ទៅយក​ឈ្នះ​ឥណ្ឌូនេស៊ី បានទេ ព្រោះ​គាត់​យក (​អត្ត​ព​លិ​ក​) មក​ច្រើនណាស់ ចំណែក​ថៃ ក៏​បញ្ជូនមក​ច្រើន ព្រោះ​គាត់​ប្រជាជន​ច្រើនជាង​យើង អ៊ីចឹង​បញ្ហា​មេដាយ វា​ជា​រឿង​មួយ​ហើយ ហើយ​លើកទឹកចិត្ត​កីឡាករ កីឡាការិនី ទោះបីជា​បាន​មេដាយ ឬ​មិនបាន​មេដាយ ក៏​នៅតែ​ជា​កីឡា​»​។​

​យ៉ាងណាក៏ដោយ ក្រុម​អត្ត​ព​លិ​ក​កម្ពុជា នៅសល់​ប្រភេទ​វិញ្ញាសា​ជាច្រើន​ទៀត ដែល​ត្រូវ​ប្រកួតប្រជែង ដណ្តើមយក​មេដាយ ដោយ​ក្នុងនោះ​ប្រភេទ​កីឡា​អត្ត​ពលកម្ម ហែល​ទឹក បាល់ទះ​អង្គុយ និង​កីឡា​បូ​ស្យា ជាដើម សុទ្ធតែជា​ប្រភេទ​កីឡា ដែល​កម្ពុជា​ធ្លាប់បាន​ដណ្តើម​មេដាយមាស​ខណៈ​ប្រភេទ​កីឡា​ថ្មីៗ​មួយចំនួនទៀត ក៏​ក្រុម​អត្ត​ព​លិ​ក​កម្ពុជា បានបង្ហាញ​ការប្រកួត​យ៉ាង​ស្វិតស្វាញ ដើម្បី​បង្ហាញ​ពី​ឆន្ទៈ​របស់​ពួកគេ​ផងដែរ​។​

​ជាមួយគ្នានេះ លោកនាយក​រដ្ឋមន្ត្រី បាន​កោតសរសើរ​ទៅលើ​ក្រុមកីឡា​បាល់ទាត់​ជនពិការ​ភ្នែក​របស់​កម្ពុជា ដែល​ពួកគេ បាន​ប្រឹងប្រែង​ប្រកួត​យ៉ាង​ល្អ​។ «​អ្វីដែល​គួរឱ្យ​កោតសរសើរ គឺ​គាត់រ​កបាល់​ឃើញ ហើយ​ស៊ុត​បញ្ចូល​ទី​យ៉ាង​ល្អ​ទៅទៀត​។ ក្រុម​កម្ពុជា​យើង​ចាញ់​ឡាវ (៣-០) ប៉ុន្តែ​នេះ​ជា​លើកដំបូង ដែល​កីឡា​ពិការភ្នែក​កម្ពុជា​បាន​ចូល​​រួម​ប្រកួត​ខ្នាត​អន្តរជាតិ​បែបនេះ អ៊ីចឹង​អ៊ំ​លើកទឹកចិត្ត​ឱ្យមាន​ការ​​ខិតខំ ក៏ប៉ុន្តែ​ទោះបីជា​បាន ឬ​មិនបាន សូម​ក្មួយៗ កូនៗ​កុំ​បាក់​ទឹកចិត្ត​»​។

​លោក ហ៊ុន សែន បាន​សង្កត់ធ្ងន់ថា​៖ «​កីឡា​មាន​ឈ្នះ មាន​ចាញ់​អ៊ីចឹង​ហើយ ប៉ុន្តែ​អ្វីដែល​សំខាន់ យើង​ធ្វើឱ្យ​បានល្អ ក្នុងនាម​ជា​ម្ចាស់ផ្ទះ តំណាងឱ្យ​ប្រជាជន​ ១៧ ​លាន​នាក់ នៅ​ពី​ក្រោយខ្នង​។ ធ្វើជា​ម្ចាស់ផ្ទះ ដោយមាន​ការទទួលខុសត្រូវ សីលធម៌​របស់​អ្នកកីឡា និង​សេវាកម្ម​នានា ត្រូវតែ​បានផ្តល់ ហើយ​ទីក្រុង​ភ្នំពេញ បានផ្តល់​សេវាកម្ម​ល្អ​ណាស់ ទាំង​ស៊ី​ហ្គេម និង​អាស៊ាន​ប៉ា​រ៉ា​ហ្គេម​»​។​

​ចំពោះ​លទ្ធផល​ប្រកួត​ជា​បណ្តោះអាសន្ន គិត​ត្រឹម​ម៉ោង​ ៥ ថ្ងៃទី​ ៥ ខែមិថុនា ក្រុម​ម្ចាស់ផ្ទះ​កម្ពុជា​បានឈ្នះ​មេដាយមាស ​២ ប្រាក់ ​៦ សំរឹទ្ធ​ ៦ ដោយ​កំពុង​ឈរ​នៅ​ចំណាត់ថ្នាក់​លេខ​ ៨ ក្នុងចំណោម​ប្រទេស​ចូលរួម​ទាំង​ ១១ ខណៈ​ឥណ្ឌូនេស៊ី នៅតែ​បន្ត​ឈរ​នៅ​លេខ​ ១ ដោយ​ឈ្នះ​បាន​មេដាយមាស​៤៣ ប្រាក់​ ៣៦ សំរឹទ្ធ​ ២៧ ហើយ​តាម​ពីក្រោយ​ដោយ​វៀតណាម​ដែល​បាន​មាស ​២៦ ប្រាក់ ​២១ សំរឹទ្ធ​ ៣២ និង​ប្រទេស​ថៃ ឈ្នះ​បាន​មាស​ ២៣ ប្រាក់​២៩ និង​សំរឹទ្ធ​ ១៩៕